سلام عليكم
ممكن تصبروا شوية فى قراية موضوعى وتقروه للاخر لو سمحتم لو عايزين تساعدونى ..
انا يا جماعة بقالى سنة من بعد ما ولدت بنتى انا تعبانة وصحتى بتدهور لحد ما وصلت لدرجة لا تحتمل حاسة انى بموت وبخلص واحدة واحدة ببقيت جثة ماشية على الارض ارهاق دااااااائم لا يزول ولا حتى بالنوم بالعكس بصحى من النوم مجهدة اكتر من قبل ما انام والم جامد فى الصدر وما يقابله فى الظهر والم فى الاكتاف زى ما اكون عاملة مجهود جبار وجسمى مكسر منه … دا غير هبوط باستمرار كدا مش قادرة اعمل اى مجهود وكمان وانا ماشية بحس انى ماشية بالعافية وزى ما اكون بترنح من الدوخة والتعب من قادرة اصلب طولى….دا غير بحس اوقات ان السرير بيتهز بيا جاااااامد زى ما يكون زلزال قوى او حد ماسكه وبيحركه….وكمان وانا ماشية او قاعدة وهقوم علشان امشى الاقى الارض من تحتى مش ثابتة خالص زى ما اكون راكبة مركب والموج عمال بيرفعها ويحطها تانى وانا مش قادرة اقف ولا احافظ على التوازن …. بحس بدوخة ودوار جامدين وبحس انى بيغمى عليا وفبنام على السرير لما بفقد توازنى وبحس انى هيغمى عليا ….كتييييييير ويمكن دايما وانا ماشية(ماشية بالعافية طبعا مش عارفة ازاى)بحس انى فقدت وعيى لثانية واحدة مبعرفش ايه اللى حصل فى الثانية دى اقول لنفسى (هو انا وقعت لوقتى وقومت تانى ولا حصل ايه ؟؟؟ وابص للناس حوليا فى الشارع الاقيهم ماشيين عادى محدش واخد باله فأقول لأ خلاص لو كنت اغمى عليا وقومت تانى كان زمان الناس ملمومة يبقى انا اكيد موقعتش) طبعا مش عارفة اوصف انا بكون حاسة بعذاب ايه فى اللحظة دى من التعب وبتمنى حتى انام على رصيف الشارع من التعب والارهاق لكن مينفعش للاسف……..وعندى وجع فى كل سم فى جسمى مش فى المفاصل لأ فى كووووووول جسمى كلله كله كل سم …..وبنهج من اقل مجهود او اقل مشى ..ولو طلعت سلم دا عذاب ومعاناه بالنسبالى وبنهج بشكل مش طبيعى بعد ما بطلع السلم وبحس انى بنهار ورجلى مش شايلانى وبتنفس بالعافية…
فضلت الف على دكاترة واعمل تحاليل كتيييير وفى الاخر عملت تحليل بروسيلا وظهر فيها نسبة بروسيلا فضلت اخد علاج 7 شهور للبروسيلا وبرده تعبانة زى ما انا… فى الاخر بدأت احس بتحسن نسبى فرحت وقولت بدأت اخف لكن للاسف مخفتش والتعب علق معايا لا عايز يخف ولا عايز يدى أى مؤشر جديد … يعنى جه عند النسبة الاخيرة ووقف على كدا ومش عايز يتحسن وانا حاسة انى خلاص مبقاش فيا نفس تانى للمقاومة …لأنى مع كل دا بشتغل وشغل مرهق كمان مش اى شغل وبستعمل فيه كمان صدرى واكتافى اللى تاعبنى اوى فبيتعبوا اكتر واكتر بالشغل وبروح جثة هامدة لكن بعد ما بروح بلاقى برده البيت فيه شغل وفى بنوتة صغيرة عايزة طلبات … فأنا تعبانة بجد مش قادرة اعمل المجهود دا بالتعب والاعراض دى حاسة انى بتمنى الارض تنشق وتبلعنى ارحم من العذاب دا
المهم نرجع للبروسيلا … قولنا انها بقالى حوالى 7شهور وبرده تعبانة مخفتش المهم روحت لدكاترة تانى حميات وقالولى سيبك من التحاليل فى معامل التحاليل دى اى كلام وتعالى اعملى التحليل فى مستشفى الحميات هى فيها التحاليل اليقينية واللى نقدر نحكم منها حكم نهائى … روحت المستشفى وعملت التحليل مظهرش فيها بروسيلا خاااااااااالص ……. طبعا انا كدا دخلت فى دوااااامة كبيرة ومش عارفة اعمل ايه ازاى اعرف انا عندى ايه (على فكرة التحاليل اللى عملتها وظهر فيها بروسيلا كانت فى اكتر من معمل تحليل ومنها معمل المختبر اللى كلنا نعرفه ومع ذلك الدكتور معترفش بيها …. وانا مش فاهمة ازاى كل التحاليل اللى عملتها فى المعامل على مدار الشهور دى كلها ظهر فيها بروسيلا وتحليل المستشفى مظهرش فيه …طيب لو معنديش بروسيلا ازاى ظهرت فى كوووول التحاليل اللى عملتها على مدار شهور فى المعامل لو معنديش بروسيلا بتظهر ليه فى التحاليل ؟؟؟؟؟؟؟؟؟ هنقول غلطة فى التحليل …ماشى غلطة فى تحليل …اتنين …. لكن غلطة فى حوالى عشر تحاليل على مدار حوالى 7 شهور ….. طب ازاى ؟؟ هى الغلطة ممكن تتكرر بالشكل دا …وبعدين معامل المختبر معامل كويسة ازاى بتزهر فى تحاليلها بروسيلا لو انا معنديش؟؟؟؟؟؟؟؟؟
الدكاترة تعبونى اواى وتعبوا نفسيتى معاهم محدش عايز يساعدنى او يسمع حتى شكوتى كل ما ادخل على دكتور يقولى انتى معندكيش حاجة دى حالة نفسية …حتى مش بيهتم يسمع احكيله كل الاعراض اللى عندى ……. هو خلاص يعنى لو معنديش بروسيلا يبقى مرض نفسى ؟؟؟؟ ليه هى الاعراض دى مبتجيش غير مع البروسيلا بس .؟؟؟؟؟؟ ايه فشل الدكاترة دا هو عشان مش قادر يعرف انا عندى ايه بيدارى فشله بانى معنديش حاجة عضوية واروح لدكتور نفسى … حسبى الله ونعم الوكيل فيهم …….وكل ما اطلب من دكتور انه يصدقنى انى انا تعبانة بجد وشايلة فوق طاقتى من التعب وعايزة يدلنى على تحاليل او امراض تتفق اعراضها مع الاعراض اللى عندى ياخد كلامى باستخفاف وميرضاش يقولى على حاجة ويقولى معندكيش حاجة متوهميش نفسك
ايه الدكاترة دى والله انا كانت نفسيتى احسن وهما اللى تعبوها باللى بيعملوه دا
انا عايزة دكاترةتساعدنى بجد تفضل معايا لحد ما تعرف انا عندى ايه .. ندور فى كل الامراض المحتملة من تحاليل واشعة مش مهم التكاليف المهم اعرف انا عندى ايه عشان ابدأ اخد العلاج الصح وارتاح من العذاب دا
انا لا بعرف راحة لا فى نوم ولا قعاد ولا وقفة ولا مشى فى كل وضع انا تعبانة وبتوجع ومرهقة وجسمى مكسر وصدرى وظهرى جبت اخرى منهم ومن الوجع فيهم .
ودلوقتى بعد ما عرفتم قصتى ممكن ….
ممكن انتو يا دكاترة تقلولى ايه الامراض وايه التخصصات اللى امشى فيها مع الاعراض اللى عندى دى ؟؟؟؟
ممكن تدلونى حتى على دكاترة كويسين اروحلهم ..مفيش مكان اقدر اروحه فيه(مستشفى يعنى)فيها دكاترة كويسين واقدر اعمل فيه فحوصات شاملة لحد ما اعرف انا عندى ايه … بس يكون دكاترة بجد مش تجار عايزين ادفع فلوس وخلاص
ممكن تساعدونى انا تعبانة
ســها ســها 74982_2.gif سوبر فتكات Fatakat 74982 المنيا – مصر