ازيكو يا قمرات يا رب تكونوا كويسين ومبدعين في الاكل وعزومات رمضان كدة علطول
جيبالكوا النهارده اكلة يا ريت تجربوها وان شاء الله هتعجبكوا اوووى
الاكلة دي بقى اساسها صعيدي مامتي حبيبتي ربنا يخليهالي هي اللى بتعملها بالطريقة المظبوطة بتاعة اهل الصعيد
في الاساس بتتعمل من البامية الناشفة ..ويطحنوها في المطحنه بتكون زي البودرة كدة
لكن الجديد في الطريقة دي
ان هنعملها بالبامية الخضرا ..
كمان لو البامية اللى جبتيها طلع نوعها مش حلو صدقيني بالطريقة دي هتطلع تحفة
انا عايزة اقولكوا ان ماليش اصلا في البامية نهااااائي انما حبيتها كدة اكتر
يلا بقى عالطريقة علطول طولت عليكوا
المكوناااااات :
كيس بامية نص كيلو – شوربة فراخ – كزبرة – شبت – بصل – ثوم – طماطم – حمص مجروش
التحضير:
بننقع الحمص في مية سخنة حوالي ساعة بعد ما يتغسل
وبنضرب البصل والثوم في الكبة
ملحوظة:
ضروري الويكة تتعمل بشوربة الفراخ لانها بتحتاج الدسم
الطريقة:
– نغلي شوربة الفراخ غلوتين ووراها نحط البامية
– ونضيف بعد ما يغلوا مع بعض الطماطم متقطعة اربع تربع مع جزء صغير من الكزبرة
– نسيبهم بعد كدة ربع ساعة
– بعد كدة بنسيبها تبرد شوية ونضربها بمضرب الكهربا اليدوي او الخلاط
فهتبقى بالشكل ده
نيجي بقى للمرحلة التانية
هنحط الويكة على جمب وبعدين نجيب حلة نحط فيها معلقة سمنة ونحط فيها البصل والثوم ونقلب بعد كدة الحمص ونقلب ونضيف الكزبرة في الاخر
– نحط الويكة على الخلطة دي وبعدين نسيبهم يغلوا على نار هادية على ما الكل يستوى (حوالى تلت لـنص ساعة )
– ظبطي التقل بتاع الويكة زي مانتى عايزة وبعد اكتمال السوا بنحط فوق الوش الشبت
وبالهنا والشفا يا قمراااااات والاكلة تكفي من 4 لـ 5 اشخاص
مواضيع هذا القسم برعاية
السـاحرة الصغيرة السـاحرة الصغيرة 475965_9.gif سوبر فتكات Fatakat 475965 القاهرة – مصر