انا النهردة هعملكم اكلة من بلدى تجنن المندى طبعا كلنا بنحبه من المطاعم
النهردة هعمله احلى من المطاعم وطبعا المندى بيتحفر ليه فى الارض وافران
خاصة وانا طبعا هعمله ف الفرن العادى يلا نبدا المقادير بالصور
التوابل الناعمة ملح فلفل كمون مكعب ماجى قرفة ناعمة
باقى التوابل ورق لورة 3 فصوص حبهان 7 مسمار اللى هوا (القرنفل)
ولو عندك ليمون اسود حطى واعواد الدارسين اللى هيا (القرفة) بس كان خلصانين من عندى
وطبعا بصلة مقطعة جوانح وفص ثوم مقطع صغير
دجاجة مغسولة كويس ومتغرسة بالسكين نغزات
كاسين ارز بسمتى انا بحب ارز ابو كاس منقوعين فى مية سخنة لمدة نص ساعة
هنبدا يلا بسم الله الرحمن الرحيم هيا كلمة السحر لطبخة ممتازة
هنتبل الدجاجة كالتالى نص معلقة كركم عليها شوية زيت وملح وبهارات فراخ
نشوح البصل تشويح بسيط مع الثوم بس مايخدش لون فى معلقتين زيت
ونحط التوابل كلها ملح فلفل كمون مسمار حبهان ورق اللورا القرفةوبهارات الفراخ ماعدا مكمعب الماجى
وبعدين 3 كوبايات مية لان مقدار الرز كوبايتين ولو 3 كوبايات رز يبقى 4 كاسات مية ونفتت مكعب الماجى ع المية
نقفل النار علطول بعد ما نذوب الماجى فاكرين الارز المنقوع نصفيه ونحطه فى حلة متقطع عليه طمطاية جوانح
ونحط شوربة التوابل عليها
ونحط طبقتين قصدير ع الحلة ونخرم بالسكينة
ونحط الدجاجة المتبلة بعد تصفيتها ع وش القصدير
ونحط ع الدجاج زبدة
ونقصدر ع الدجاج بطبقة قصدير
وع الفرن علطول بدرجة حرارة 180ومنفتحش عليه غير بعد ساعة بالظبط
نطلعه بعد ساعةونكشف ورقة القصدير اللى ع الدجاجة ونحطه الفرن ياخد وش تحمير
واثناء ما ولعنا الشواية نحمر وش الدجاجة نولع ع فحمة
بعد ما الدجاجة اتحمرت نشيل القصدير عن الارز ونحط الدجاجة ع الارز وفى نص الحلة فنجان هنحط فيه الفحمة ونطفيه بالزيت
ونغلق ع الحلة عشان تاخد ريحة الشواء
ونقدمه فى صحن التقديم
وبالهنا والشفا
وهتاكلى مندى احلى من المطاعم وادعولى ربنا يخليلى ابنى يوسف
نسيت اقول ليكم جوزى والله قالى تسلم ايدك احلى من اللى باكله برة
ملحوظة احنا خرمنا القصدير قبل ما نحط الدجاج عشان بخار الارز يسوى الفرخة ومية الدجاجة هتسوى الارز
مواضيع هذا القسم برعاية
كيوت بيبى كيوت بيبى 297248_1.gif فتكات هايلة Fatakat 297248 المنصورة – مصر