مساء الخير ازيكم يا احلى فتوكات انا لفيت ما فيه الكفاية وحبيت افيدكم وانا وبلف لاقيت معلومات كتير
قولت لازم نفيد بعض
ودة مش كلامى دة كلام ناس متخصصة فى المجال دة
انا اشتغلت في المجال ده 5 سنين الحمد لله وما زلت
وفي خلال الفتره دي اقدر اقولك ايه الموجود في السوق بالظبط
الموجود في السوق كالاتي
صيني وده المنتشر جدا في السوق
وللاسف مش حلو خالص
وملوش ضمان ولا صيانه
الكلام سهل
حتسمع
صيني والموتور تيواني
صيني والموتور كوري
صيني والموتور امريكي
وكل ده ستيكر وكلام عالورق بس
حتسمع ضمان 10 سنين
قطع غيار متوفره
كل الكلام ده ملوش اي اساس من الصحه
وحتعرف ان كلامي صح اما تعاني اما المشايه تبوظ
النوع الموجود تاني ده تيواني بجد
وده بيفرق في السعر عن الصيني من 700 ل 1500جنيه تقريبا
حسب حاله الصيني اللي انتا بتقارن بيه
بس قليل ومستوردينه قليلين ومحتاج تدوير وسؤال كويس وخلوا بالكم فى تايوانى مضروب يعنى استيكر برضوا
النوع التالت الموجود في السوق
الامريكي زي ماركه cybex , life fitness
الالماني زي ماركه kettler
ايطالي زي ماركه panatta
ودول اقل حاجه فيهم ممكن تعمل حوالي 10000 فيما فوق
وقطع غيارهم غاليه اوي اوي
واغلبهم مش بيجيبوا حاجات منزليه لان اغلب شغلهم مع صالات الجيم الكبيره
بكده تقريبا وضحت الصوره
ايه الموجود في السوق
وانصحك لف شويه
وابعد عن الصيني خالص
بالنسبه لموضوع موتورين وموتور واحد
فده معناه ان المشايه فيها موتور incline يعمل زاويه ميل اوتوماتيك او بتقفل
موضوع الحصان ده سيبك منه دلوقتي لانه كله استيكر وحفهمك اما تحدد المكان بس الاول
شركه ويدر شركه محترمه جدا بردو
بس الاجهزه مش امريكي
صيني بس صيني من المحترم
الامريكي عندهم ماركه vision
وده جيم بردو
____________
الفكره والله في التدوير
لان الغش بقي منتشر جدا في المجال ده
اي واحد معاه فلوس يروح الصين
مش فاهم اي حاجه في اي حاجه
يجيب مشايات ويبيعها بالاجل وخلاص علي كده
ولا بيجيب قطع غيار ولا بيدي ضمان للموزع وبالتالي الموزع بيبيع زيه
وتيجي تدور علي قطع غيار يقولك مفيش
وياسلام بقي لو عنده موتور ولا بورده
يبيعها باضعاف تمنها
وتيجي تبوظ يعد شهر عشان مكتوب عالمشايه 2 حصان و3 حصان وكوري
المشايه دي بتكون صيني وملزوق ستيكر زي ماقلت قبل كده
وهيا ولا بتحصل حتي 1ونص حصان
بس للاسف هوا ده المنتشر في السوق
فنصيحه لكل واحد بيشتري مشايه
دور كويس
وشوف مكان مضمون يكون ليه سمعه
ويكون محل محترم
مش شقه مفروشه
الحصان والسرعات
قدره الحصان والكلام ده انا مليش فيه ده شغل فيزياء
انما اللي اعرفه في شغلي
1 حصان بيشيل 90 كجم حد اقصي
1ونص يشيل 100 كجم حد اقصي
2 حصان يشيل 120 كجم حد اقصي
2 ونص يشيل 150 حد اقصي
3 حصان يشيل 170 كجم
الكلام ده للاستخدام المنزلي
واعتمادا علي ان الاستيكر فعلا يبقي بجد
وده عمرك ما حتلاقيه
لان الشركات بتكتب العزم الاقصي للموتور اللي بيتسمي في شغلنا Peak
يعني مثلا ال2 حصان بيتكتب عليه 2.75
وهكذا
انما مش جهاز صيني يتكتب عليه 5 حصان ويبقي ب4000 جنيه
هوا ده اللي تبدأ تقلق منه
طبعا كمان بتفرق في نوع الموتور بتاع المشايه
ان كان AC او DC
الاجهزه المنزليه اغلبها DC
اختصار DIRECT CURRUNT
تيار مستمر يعني
وال AC اختصار ALTERNATIVE CURRENT
تيار متردد
ا
بس المهم ان الALTERNATIVE CURRENT بيشتغل وقت مستمر اكتر
بمعني ان صالات الجيم بتحتاج الاجهزه ال AC عشان بيشتغلوا ساعات اطول
ممكن توصل ل10 ساعات
بس ده طبعا بيفرق في السعر جدا
يعني اجهزه ال AC
تبتدي من 7000 وانتا طالع
نرجع لل DC اللي هوا بيت القصيد
المنزلي اعلي حاجه فيه 3 حصان
وده بيشيل اوزان تقيله 170 زي ماقلت
بالنسبه بقي لموضوع 2 موتور وواحد موتور ده
عشان الناس بس تبقي فاهمه
2 موتور مش اقوي ولا حاجه
كل الحكايه في زاويه الميل
لو عاوز تصعب علي نفسك الموضوع ويبقي مايل كأنك طالع مطلع
بيبقي فيه موتور متوصل بحاجه زي المساعد كده
ترفع المشايه وتنزلها بالكهرباء
وده ملوش دعوه خالص بكفاءه المشايه اصلا
اما الاجهزه الواحد موتور بيكون فيها مستويات مانيوال يدويه تقدر تعملها بايدك عادي جدا
فانتا براحتك بقي
ملحوظه : بعض الاجهزه الصيني مليانه حركات من دي
والموتور الحصان بتاعه قليل
فمتتغرش بالحاجات دي عن الاساس اللي هوا الموتور الاساسي بتاع المشايه
____________
الاسبرى وكيفية رشة
السبراي سيليكون ده بيستعملوه في المصانع للحفاظ علي السيور بتاعت المكن
فايدته انك دلوقتي وانتا بتجري بتعمل احتكاك بين الكوتشي بتاعك وبين السير من فوق
والسير من تحت بيعمل احتكاك بردو
وده بيؤدي لسخونه السير جدا
مين بقي اللي بيقلل الاحتكاك ده ويعمل سطح عازل بين الخشبه والسير
السيليكون سبراي
من غيره يحصل ايه
السير يعمل احتكاك الخشبه
الخشبه عليها طبقه فورمايكا ناعمه فوق طبقه الخشب العاديه ملزوقه عليها
يبتدي السير ياكل في طبقه الفرومايكا دي لحد ما يشيلها ويظهر وش الخشب البني العادي
يبتدوا بقي ياكلوا في بعض وانتا بتجري ومش حاسس
وخلال سنه ده بيؤدي لضرب البورده وحرق الموتور
كيفيه استخدامه
جبتلكو صوره توريك بتحط السيليكون فين وهوا متوفر منه قطاره زي الصوره وفيه منه سبراي
زي ده
اما اجي استخدمه بقي اهم حاجه اجيب فوطه ناشفه مفيهاش ميه ولا اي حاجه
وارفع السير من الجمب زي كده
وادخل القماشه من طرف وامسك طرف
بكده القماشه تدخل تحت السير وتبقي انتا ماسك طرفين
تروح وتيجي بطول السير وانتا مرخي القماشه بحيث تمسح الخشبه اللي تحت السير من التراب والعفار الخفيف اللي بيكون تحت السير
من اثر الكوتشي او من الهواء العادي
بعد كده تشيل القماشيه وترش سبراي زي الصوره بالظبط بطول السير علي الاطراف فقط يمين وشمال رايح جاي
وتمشي 5 دقايق بعد الرش عشان تفرش السبراي وتحافظ عليه
طول مانتا بتعمل كده السير يعيش معاك سنين
انما لو معملتش كده السير موتوره حيتحرق خلال سنه لو المشايه اي كلام
كل 15 يوم
بعد التنظيف ترشي
والمفروض يكون موجود عند الناس اللي بتبيع المشايات
احذرووووواوالحذر كل الحذر من استخدام بدائل مش عارفين هيا ايه
زي ده مثلا
ناس كتير استخدمته
وبوظت المشايات
ده مزيل للصدأ
وبيعمل اثر عكسي عالسير
الماده اللي فيه بتاكل السير وتهريه
وفيه ناس بتحط زيت اكل
وناس تحط بودره تلك بتاعت الاطفال
وناس تانيه زيت اكل
علي اساس ان اللي فاهمه ان وظيفه السبراي ده هيا ليونه السير
فبيحط اي حاجه تزحلق وخلاص
انا حبيت افيدكم على قد ما اقدار
mony moon alex mony moon alex فتكات ست الكل Fatakat 559822 Alex – مصر