السلام عليكم ورحمة الله وبركاته
اخواتى الاعزاء ارجوكم اللى عندها خبرة بموضوع الاطفال ضعيفى السمع يا ريت ترد عليا واللى معندهاش يا ريت تدعيلى ان ربنا يفرج كربتى ولو بظهر الغيب
بصوا انا بنتى عندها سنة وتسعة شهور من وهى اصغر من سنة لاحظت عليها انها مش بتسمع يعنى لما يحصل حتى صوت قوى فجاءة مكنتش بتتخض
غير كدة هى قعدت متاخر وخدت فترة على ما اتعلمت تزحف وهى دلوقتى بتمشى بس لازم تسند على حاجة
من وهى اقل من سنة اخدت كالسيوم وادوية لتنشيط الذهن
والحمد لله دا خلاها تعرف تقعد وتزحف
نيجى بقا للمشكلة ضعف السمع
كنت روحت لكذا دكتور انف واذن كان يقولى استنى لما تكمل سنة عشان نعملها كشف سمع
وبعدين لما كملت سنة روحت لدكتور اسمه عمرو مصليحى فى كامب شيزار عملت رسم سمع طلعت مش بتسمع ومفيش ميه على ودانها وعملت اشعة على القوقعة لقينا القوقعة سليمة الحمد لله والدكتور قال انها تلبس السماعة وتعمل جلسات تخاطب 3 شهور وبعدين نشوف هى هتعرف تنطق بعض الكلمات ولا لا
وبالفعل عملت سماعة و عملت جلسةتخاطب كل اسبوع لمدة 3 شهور والدكتور كان يعملها تمارين وعلمنى اعملها تمارين عشان كمان تنتبه
وبدأت تستجيب للعب والملاغية
بس المشكلة بعد ال3 شهور وقت نحس انها بتسمع ووقت لا حتى بالسماعة وقت تنتبه للى بيكلمها ووقت لا ودكتور السمعيات قال انا دلوقتى مش عارف اقرر هى بتسمع ولا لا وان دكتور التخاطب اللى انا بتعامل معاه مش كويس وادانى اسم دكتورة فى كفر عبدو اعمل معاها جلسات لمدة شهرين كمان وبعدين هنشوف نعملها عملية زرع قوقعة
انا سعات اكلمها تسمعنى وسعات لا انا مش عارفة ومحتارة وهى دلوقتى بتقولى مم يعنى ماما
ولما تكون عايزة حاجة بتصوت عشان تاخد الحاجة اللى هى عيزاها
انا اسفة لو كان كلامى ملخبط والموضوع طويل بس ارجوكم اللى عندها خبرة بالموضيع دى تدينى فكرة
او تعرف دكتور تانى للسمعيات فى الاسكندرية اخد رايه برضه يبقى جزاها الله كل الخير
نور السويسى نور السويسى 98879_1.gif فتكات رائعة Fatakat 98879 الاسكندرية – مصر
سبحان الله و بحمده