بســــــــــــــــــم الله الرحمـــــــــــــن الرحـــــــــــيم
السلام عليكن حبيباتى كل عام وانتن بخير
يـــــــــــارب يعيد عليكم الايام الاعياد كلها بخير وسعادة وكل واحده تحقق ماتتمنى يارب العالمين
باذن الله النهارده هنتشارك وصفة من اسهل وصفات اللحمة البارده وباذن الله تعجبكن وتكون لذيذة كمان
بس بقى عشان نبقى متفقين كده من اولها ههههههههههههههههه اللى مش هتقييم ولا هترد همسكها تيجى تعيد معايا وهاخد منها العيدية كمان
فقصروا الشر كده و قيموا وردا عليا هههههههههههههههه عشان كمان اتشجع واقولكم على طريقة حلوة لسندوتشات اللحمة الباردة يلا اغراء كمان اهو
دى صورة طبق اللحمة الباردة بالخضار المشكل
وده صورة السندوتشات ممكن تتعمل فى فطار العيد وممكن تتعمل كغدا على السريع جدا وممكن تتعمل فى العشا يعنى انتى وخيالك يافتوكة
يلا بينا مع بعض على المطبخ ونقول بســــــــــــم الله
المقــــــــــــــــــــــــادير
عرق تربيانكو او فلتو (يفضل تربيانكو طبعا لانه اسهل فى الطهى) وتربطيه بدبارة بتخلى الجزار هو اللى يربطه كويس
كام فص توم حلوين كده
بصل مبشور (اختيارى)
ملح – فلفل اسمر – بهارات مشكلة – بابريكا
كيس صغير باربكيو صوص او معلقة صويا صوص حلوة
نصف ليمونه
الطريقـــــــــــــــــــــــــــــــــــــة
ندخل على الطريقة باذن الله فتوكاتى
هنخرم العرق من كذا مكان ونعمل فيه شقوق ونغرس فيه فصوص التوم
ونتبلها بكل البهارات والبصل المبشور مع بعضه ونسيبها اقل حاجة 4 ساعات فى التلاجة او ليلية كاملة يبقى احسن
بعد كده نحط قطعة سمنة ونبدا نعطيها صدمة من جميع الاتجاهات
بصوا هنا يافتوكاتى انا اعطتها صدمة من جميع الاتجاهات كل شوية اقلبها على ناحية تاخد لون وارجع اقلبها على ناحية تانية وهكذا لحد ماتتحمر باذن الله من كل ناحية
بعد كده بزودها مياه بتغلى و ازود المياة نصف معلقة سكر وفلفل اسمر وممكن مكعب مرقة وعود قرفة وحبهان و ورق لورا
وازود الملح فى الاخر واغطيها واتركها على النار وكل شوية اشوفها عشان ممكن تحتاج مياه تانى
لما تكون قربت على السوا اقطع الخضار اللى هضيفه
انا اضيفت (بطاطس وبسلة وجزر زبصل مقع شرايح )
واتبل الخضار بملح وفلفل اسمر و ربع معلقة بهارات واقلبهم جيدا
وبعدين انزل بالخضار مع اللحمة يكمل سوا وازود الملح بتاعها واظبطه بقى
ولما اللحمة تستوى هى والخضار احطها تحت شوايه الفرن تاخد لون وبس كده
واتركها تبرد عشان اعرف اقطعها وماتنسيش طبعا تقطعى الخيط بتاعها
وتقدم بالهنا
كده انا خلصت طريقة اللحمة و باذن الله فى المشاركة الجاية هكمل
بس ماتنسيش تاخدى تقييمك فى ايديك كده ياسكرة الا هاخد منك العيدية اهو انا نبهت عليكم
وطبعا تتدعولى دعوة حلوة من قلبكم ربنا يهدى عليا معدتى ويشفينى يارب العالمين ولكى مثلها باذن الله
مواضيع هذا القسم برعاية
nonosmontaser nonosmontaser 97277_16.gif هونها يااااااااااااارب 🙂 Fatakat 97277 🙂 – بلاد الله الواسعة