انهاردا عملت الكنتاكى وطلع الطعم هايل جدا
دى صورته
ندخل على الطريقه بس رددو الاول معايا
اللهم صل وسلم وبارك على سيدنا محمد وعلى آله واصحابه اجمعين
اول حاجه الفرخه لازم تكون صغيره يعنى اصغر حاجه عند الراجل دى حوالى ١٢٠٠ لو كان فى اصغر كنت جبتها بس مكانش فى وقسمتها ٨ قطع المهم تبلتها فى زبادى وخل وبصله وليمون ومعلقتين زيت والبهارات ( ملح وفلفل وتوم بودره وبصل بودره وبابريكا وزعتر وكارى وزنجبيل وشطه وكسبره ) وحطيتهم فى الخلاط وحطيت عليهم شويه ميه صغيرين اوى عشان التتبيله كانت تقيله ، وضربتهم كويس وبعدين صفيتها واخدت الميه بس لانى مبحبش بواقى التتبيله على الفراخ وعملت فى الفرخه فتحات عشان تتبل كويس وسيبتها طول الليل
شايفين هنا الفراخ نضيفه وم عليها اى بواقى بصل او حاجه من التتبيله
تانى يوم هنحط الفراخ فى مصفى عشان تتصفى من التتبيله وتجهز الطبقه الخارجيه هنجهز الخلطه دى وهى عباره عن دقيق محطوط عليه كل البهارات اللى انا تبلت بيها الفراخ برده ( ملح وفلفل وكسبره وشطه وبابريكا وكارى وتوم بودره وبصل بودره وزعتر وجنزبيل بودره )
هناخد ٣ او ٤ معالق من الدقيق نحطه فى طبق ونحط عليه ميه ونقلب احد ما يبقى عندنا خليط عامل زى خليط الكريب كده وباقى الدقيق هنحطه فى علبه يكون ليها غطا بيقفل كويس ونحط عليه كيس بيكنج بودر عشان ده اللى هيخلى الحاجه لونها دهبى وجميل
هناخد ٣ قطع فراخ نحطها الاول فى الخليط الدقيق مع الميه
وبعد كده نحطه فى العلبه اللى فيها دقيق ناشف ونقفل الغطا ونرجها جامد عشان نحصل على طبقه الكرانش نرجها ونسيبها ١٠ دقايق جوه الدقيق وبعدين نرجها تانى عشان تتغلف من كل نحيه
دى صوره ممكن تكون واضحه لشكلها بعد ما رجيناها فى علبه الدقيق
طبعا نكون مجهزين حاجه غويطه نحمر فيها ،، بس الناس المحظوظين اللى عندهم حله الضغط طبعا هتبقى افضل بكتيييييير اووووى لانهم هيحمرو فيها والفراخ هتطلع جميله ، اما بقى لو معندكيش حله ضغط ف هتجيبى حله غويطه وتحطى فيها زيت كتير وتسخنيه اوى وتنزلى بقطع الفراخ ٣ قطع بس كل مره تحطى اول قطعه وتستنى ثوانى وبعدين تحطى التانيه وتستنى ثوانى وبعدين تحطى اللى بعدها ،، واول ما الفراخ تاخد لون دهبى شويه توطى النار وتغطى الحله وتسبيها ،، تانى حاجه او حبيتى تقلبى الفراخ يبقى بمعلقه متستخدميش ملقاط التحمير او الشوكه هى معلقه وتقلبى بالراحه عشان تحافظو على طبقه الكرانش ،، تفضلو موطين النار عليها ولو احمرت منك شويه حتى عادى مش مهم برده طعمها هيبقى حلو ،، لحد ما تستوى طلعوها فى مصفى او ورق نشاف عشان متنزل كل الزيت اللى فيها
فى حله الضغط هتسخنى فيها زيت كتير ولما يسخن اوى هتحطى ٣ قطع وتستنى ثوانى بس تاخد لون دهبى فاتح تروحى قافله الغطا وموطيه النار برده على الاخر ،، وبعد دقيقه تفضى الهوا وتفتحى الغطا تقلبيها وتغطى تانى وتسيبيها دقيقه كمان بعد ما قلبتيها وتفضى الهوا وتفتحى تطلعيها
ودى النتيجه النهائيه
مواضيع هذا القسم برعاية
aya mourad aya mourad 931095_3.gif فتكات متميزة Fatakat 931095 طنطا – مصر