وحشتونى ياقمرات فتكات
النهاردة جيبالكم طريقتى فى تمليح الفسيخ (البورى)والسردين
وقبل كل حاجة عاوزة اقولكم ياحبيباتى شم النسيم ده عيد اخواننا المسيحيين
واسمه عيد القبامة المجيد
وهما بيكونوا صايمين عن الاسماك واللحوم وعشان كدة بياكلوا الفسيخ فى عيدهم
بس احنا المصريين بقة نموووووووووت فى الاعياد وكل عيد مرتبط عندنا بالاكل
وبما اننا بنعيش فى بلد واحدة هى مصر المحروسة فبقينا من قديم الازل بنشاركهم فرحتهم وناكل معاهم الفسيخ
ونقول انه شم النسيم او عيد الربيع
بس عشان نتجنب شبهة الحرام بلاش ناكله ايام عيد القيامة او شم النسيم
ايام ربنا كتير والفسيخ متاح عندنا فى اى وقت والحمد لله
واحنا المسلمين ليس لنا الا عيدين الفطر والاضحى وكمان كل يوم جمعة هو عيد للمسلمين
الا هل بلغت اللهم فاشهد
ندخل بقة على طريقة تمليح السردين والفسيخ اللى خلاص اكلناه والحمد لله واتخلصنا من جسم الجريمة
هتجيبى مثلا كيلو سردين وتغسليه كويس
تجيبى طبق بلاستيك بغطا
وكيس ملح
ونبدأ نرص طبقة سردين وفوقها رشة ملح تقيلة تغطى السردين
وبعدين كمان طبقة سردين وفوقها رشة ملح تقيلة
وهكذا لحد مانخلص كمية السردين وترشى فوق اخر طبقة ملح كتير ماتشوفيش السردين منها
ونغطى الطبق كويس ونشيله فى مكان
فى ضلفة الدولاب اللى تحت الحوض مثلا
ممكن تفتحى عليه تانى يوم هتلاقيه نزل مية قلبيه فى المية وغطى عليه تانى
وممكن تاكلى منه بعد يومين تلاتة وبيكون شكله زى الطازة كدة
اما لو عاوزاه مالح جدا ممكن بعد اسبوع او اتنين وزى مانتى عاوزة
وياسلام عليه بعد يومين اتنين باللمون وجنبه طبق سلطة متين وبصل اخضر وااااااو
ملحوظة
لو عندك كمية ومش عاوزاه يبقة ملحه عالى ممكن بعد التمليح تنشليه من المية بتاعته وتحطيه فى التلاجة فى علبة محكمة الغلق
بجد ياجماعة هو افضل كتير من الفسيخ خصوصا للاولاد
طريقة تمليح الفسيخ
كيلو بورى
2كيس ملح وعليه شطة لو حبيبتى او كركم لو عاوزة لونه اصفر
انا عملته بالملح فقط
غسلت السمك كويس وخصوصا من عند الراس والخياشيم
وسبته تحت الرخامة فى المطبخ حوالى 10 ساعات بس متغطى
تانى يوم الصبح جبت زى خمس اكياس وفرخ ورق كبير
وجبت الملح وحشيت خياشيم السمك
وبعدين حطيتهم فى كيس وفوق كل سمكة رشة ملح
كيلو السمك اخد2 كيس ملح يعنى كيلو ملح
ولفيت الكيس كويس ودخلته جوة كيس تانى
وهكذا لحد ماخلصت ال5 اكياس
ولفيتهم لفة كويسة بفرخ الورق
وحطيتها فى طبق كبير جوة دولاب المطبخ(اللى تحت)
وكل يوم اقلب الورقة على ناحية (عشان المية والملح اللى جواها تطول كل السمك)
وبعد 15 يوم فتحت عليه لقيته كدة
وماتنسوش اللمون وطبق السلطة المتين
وياريت مانكترش منه عشان الضغط والاملاح(عفاكم الله)
انا كدة خلصت موضوعى
لو عجبكم ياريت الرد مع التقييم ودعوة حلوة
انا مش طماعة
مواضيع هذا القسم برعاية
ام يوسف واحلى بنات ام يوسف واحلى بنات 429970_11.gif مشرفة الموقع Fatakat 429970 بيتنا الجميل – مصر