ازيكم يا فتوكاتى القمرات
بناء على طلب السادة المشاهدين(مفيش مشاهدين ولا حاجة بس الواحد بيعمل منظر)
انا قررت اقولكم طريقة الفراخ المحشية بالارز على طريقتى انا وماما (كدة وكدة عشان ماما متزعلش)
والله والله الموضوع من مطبخى وبالصور حصرى جدااا .. وتحدى
بالله عليكم لو عجبكم الموضوع قيمولى انا تعبت اوى فيه
ندخل بقى على المقادير
فراخ صغنتوتة وحلوة كدة عشان تستوى كويس
رز طبعا انا حشيت اربع فرخات ب1 ك رز واتبقى منى شوية كل واحده بقى تقسم المقدار ده على العدد بتاعها
6 بصلات
ملح/فلفل/صلصة/بهارات فراخ/كركم/زيت او سمنة/
6 ثمرةبطاطس
2ثمرة طماطم
الطريقة بقى
اولا بنجيب الفراخ ونغسلها وندعكها بالليمون والدقيق لحد اما نخليها قشطة ونقطع اجنحتها
تبقى ياعين امها مكسورة الجناح
ونتبلها بالملح والفلفل ونسيبها شوية انا تبلتها من بليل
ثانيا بنجيب الرز ونسويه نص سوى
ونحمر الكبد والاوانص بتاعت الفراخ فى السمنة
وبعد اما يبرد الرزبنضيف عليه البصل المبشورالمتبل بالملح والفلفل
:وحبه كركم وزبيب ومكسرات لو عندك والكبد اللى حمرناها
مش عارفة الصورة عاملة كدة ليه ماعلينا
بعد كده بنجيب الفرخة الحلوة بتاعتنا ونحشيها بالخلطة بتاعتنا
ولحد اما تبقى حلوة وملظلظة كدة بنبتدى نقفلها بخلة
بعد كدة نمسك الفرخة من دول ندعكها بالزيت والملح والفلفل وبهارات الفراخ والصلصة
كدة الفرخة بقت فلة شمعة منورة
نيجى بقى للصينية اللى هنسوى فيها نحط فى الارضية البطاطس والطماطم بعد اما قطعناها شرايح تخينة
ونحط عليهم زيت اه ولااجنحة اللى احنا قاطعناها فاكرينها
وبعدين نحط الفراخ وندخلها الفرن
طبعا بنسيبها تحت لحد اما تستوى كويس وبعدين نطلعها فوق للشواية
شوفتو شكلها حلو ازاى وريحتها جايبة اخر الشقة
وده شكلها النهائى
وديه بتاعتى انا كلتها لوحدى اوعو تقولو عليا مفجوعة شايفاكو يابتوع الكاميرا المخفية
مع السلامة ياقمرات وياريت اللى يعجبها موضوعى تقيمهولى لو يستاهل يعنى
مواضيع هذا القسم برعاية
hossam habiby ana hossam habiby ana 552346_6.gif فتكات رائعة Fatakat 552346 الاسكندرية – مصر