بسم الله الرحمن الرحيم
النهارده عمالكم فراخ بريانى جديدة بصدور فراخ مكعبات للاسف انا وجوزى مش بنحب صدور الفراخ خالص فبضطر افرمها
او
اقطعها شاورما او اعملها مكعبات واخترعلها اى طريقه عشان نعرف ناكلها النهارده جات ف بالى اعملها بريانى وايه المشكله يعنى
بس اقطعها مكعبات تعالوا نشوفوا عملتها ازاى ممكن تظهر للناس انها غلبه وصعبه شويه بس معايا حتعمليها وبطريقه سهله والطعم اكتر من روعة
ندخل ع المفيد من غير لوك لوك كتييييير
اولا المقادير
1 _ صدور فراخ (انا استخدمت صدرين من الفراخ وقطعتها مكعبات )
2 _ التوابل بتاعتنا عبارة عن ( ملح _ فلفل اسود _ كمون _ كسبره ناشفه _ بابريكا _ جوز الطيب _ كركم _ قرفه _ جنزبيل بودرة _ ورق لورى _ ليمون )
3 _ فلفل رومى شطه بارده اوحاره اللى يعجبك اللى موجود عندك انا ضفت الاتنين
4 _ طماطم مكعبات 5_ كسبره خضراء
6 _ ا زبادى 7_ شوربه (حوالى من ربع لنص كوب بس عشان يكون الصوص تقيل شويه مش ميه )
8 _ بصل 9 _ توم
ثانيا الطريقه
بعد ما غسلت الفراخ غسله تمام قطعتها مكعبات صغيره وضفت ليها ليمون وورق لورى زى الصوره ما حتوضح
بعد كده خلط التوابل كلها ف طبق صغير ورشيتهم على مكعبات الفراخ وسبتهم من بليل للصبح ف التلاجه ممكن تتبليها الصبح ع الاقل ساعتين
نجيب حله ونقطع بصله كبيره ونسيبها تتشوح شويه وبعدين نضيف توم قطعته ترنشات مع شويه ملح صغيرين نتركهم يتشوحوا
وبعدين اضيف الفراخ واقلب وبعدين نضيف باقى المقادير الفلفل الرومى والشطه البارده انا حطيت الشطه البارده زى ماهى ما قطعتهاش وكان طعمها جاااامد
نضيف الكسبره الخضراء والطماطم ونقلب ونسيب الفراخ تتشوح مع كل ده شويه
ثم نضيف الشوربه والزبادى
ونظبط الملح وخلى بالك احنا ضيفين ملح ف تتبيله الفراخ وملح مع البصل والتوم وملح ف الشوربه بلاش تملحى اوى عشان مش تبوظ منك ملحى شويه شويه لحد ما توصلى للطعم المظبوط
نسيبها ع نار هاديه خالص وهى مش حتاخد وقت كبير خالص ف السوا عشان دى مكعبات
ثالثا الارز بالخلطه بالكبد والقوانص والزبيب :
طريقه الرز :
شوحت بصله فى شويه سمنه وزيت ولما اصفرت ضفت معلقه
صغيرة كركم وقلبت وسبتهم دقيقتين ثم زود الشوربه
2 كوب رز بسمتى يبقى حضيف 4 كوب شوربه واضيف الملح والفلفل الاسود ونغطى عليه ع نار هاديه يستوا براحته
طريقه الكبد والقوانص والزبيب :
حجيب طاسه واشوح برضه بصله مع سمن وزيت ولما تصفر البصله حضيف الكبد والقوانص طبعا بتاعه الفراخ واقلب حت السوا وهى مش حتاخد وقت كتير ف السوا انا بسلق الاول القوانص لانها بتتاخر ف السوا لكن الكبده بطيب ف ثوانى
ولما تطيب الكبد والقوانص اضيف الزبيب ف النهايه خالص ويدوب اقلب تقلبتين وبعدين اقفل عليه
كده خلصنا الفراخ والرز وخلطه الرز اللى حنحطها ع الوش
رابعا :
نعمل بصل زى بصل الكشرى كده ف شويه دقيق ونقليه بالزيت بس مش تحمريه اوى زى بصل الكشرى المصرى افتح شويه
نيجى بقى لتقديم الطبق ده يارب يعجبكم زى ما عجبنى جدا تحفففففة من هنا لبكرة الطعم خيال مش معقول ولو انتى يافتوكه شايفاه متعب هو طعمه يستاهل اووووى
بس الاول صلى عل النبى يا فتوكه انتى وهى
يارب الموضوع يكون عجبكم بجد تعبت جدا من التصوير ورفع الصور وكتابه الموضوع مش حطلب منك غير دعوة حلوه
ربنا يقومنى بالسلامه لانى حولد الاسبوع الجاى ان شاء الله والبيبى يكون سليم ومعافى
ويخليلى ابنى ويشفى ولدتى ويوسع رزق اختى ياريت ما تبخلوش عليا بدعواتكم الحلوة
مواضيع هذا القسم برعاية
zyelmalayka zyelmalayka 1088985_1.gif فتكات هايلة Fatakat 1088985 مصر – مصر