صباح الخيرات على احلى بنوتات
صباحكم معطر بذكر ايات القران ورضا وطاعة من الرحمن
موضوعنا انهاردة عن العيش البلدى المصر ى
شايفين ماشاء الله قابب وروعة ازاى يلا بينا نعرف مقادره وطريقته
{1}كيلو دقيق بلدى اسمر
{2}قطعة خميرة بيرة حجم عين الجمل
{3}معلقة سكر وربع معلقة ملح
{4}ماية دافية للعجن
ادى الخميرة وحجمها مع السكر والملح
اولا هندوب الخميرة مع معلقة السكر حتى تسيل ونصب عليها ربع كوباية ماية دافية زى دمعة العين ونغطى عليها عشان
تتفاعل مع السكر وتخمر
ننخل الدقيق عشان الهوا يدخل فيه ويتفاعل فى عجنه ويخمر كويس وكمان اى شوائب تبعد عن الدقيق
تكون الخميرة تفاعلت مع السكر بالشكل دة
نضيفها للدقيق اللى نخلناه وحطينا معاه ربع معلة الملح الصغيرة ونقلبهم ونضيف الماية الدافية شوية حوالى كوباية ونقلب باطراف اصابعنا ونشوف لسة محتاج ماية نزود بالراحة ونلم لدقيق واول ماتتكون عجينة معانا نبدا ندخلها فى بعضها من كل ناحية تجيبى طرف العجين وتدخليه جوة العجين كانك بتديه بالبوكس بس بالراحة انتى كدة بتدخلى هوا فى العجين وبتقطعى عرقه فى نفس الوقت وتفضلى تعجنى حوالى ربع ساعة كل ماتعجنى كويس كل ماكنت العجنة اجمل وهتساعدك فى الشغل لحد ماالعجين يسيب ايدك كدة تعرفى انك عجنتى كويس
خدى بالك نجاح اى عجينة معاكى حاجتين اتنين
تفعلى الخميرة قبل العجن
والعجن الجيد يعنى ماتسبيش العجين وهو ملزق كدة لسة عايز عجن شوية واهم حاجة انه يسيب ايدك كدة تفرحى بنفسك وتعرفى انك عجنتى صح وعلى فكرة مش شطارة انك تزودى الماية لحد مايبقى مايس منك هيتعبك فى تقريسه وسواه لانه هيبقى مايس ويتفرد زيادة ويلزق اتبعى الخطوات تعملى اجمل عيش وبعد العجن تمام تغطى عليه يرتاح وياخد راحته فى الخمر فى مكان دافى عشان الجو بقى بارد شوية
شايفين ماشاء الله حجمه ارتفع ازاى يبقى كدة خد راحته فى الخمر
تحضرى صنية وترشيها بالردة او على رخامة اللى يعجبك وتبدئى تكورى العجين زى كدة وماتنسيش تحطى فى ايدك دقيق قبل ماتاخدى من العجينة
ونغطى عليه بقماشة وتجهزى المطرحة او على صنية واسعة تفردى عليها ويكون عندك مثلا لوح خشب ترشى شوية ردة خفيفة عليه والنشابة وتبدئى تفردى الكورة وعلى وشها تحطى شوية دقيق يسهل الفرد معاكى ومايلزقش
تفرديها وترصيها على اللوح الخشب وتعملى غير ها وهكذا
وتولعى فرنك وبعد مايخن كويس تدخلى العيش الفرن يستوى طبعا اللى اتقرص الاول هو اللى يدخل الاول عشان يقب ويبقى جميل زى دة
شايفين قابب ازاى قولو ماشاء الله
واللى معندهاش فرن زى دة ممكن تعمل فى فرن البوتجاز او على طاسة على البوتجاز فى فتوكات كتير عملو كدة ويلا ورونى شطارتكم
انا كدة خلصت القمرات اللى هيردو ويقيمو ليهم منى اجمل عيش
مواضيع هذا القسم برعاية
نعمة من ربى نعمة من ربى 572666_3.gif Fatakat 572666 كفر الشيخ – مصر