الحمد لله والصلاه والسلام على رسول الله صلى الله عليه وسلم
انا حبيت انقل لكم تجربتي مع الشفه الارنبيه علشان يكون فيها فايده لكل اسره يكون فيها طفل مولود بيها .
نبدأ من الشهر الثامن في موعد الزياره الشهريه لطبيبه النساء بلغتني بالخبر ان ابني هيولد بعيب في الشفه العليا وهو المسمى بالشفه الارنبيه (cleft lip ) طبعا كانت صدمه كبيره وكنت حاسه انها كارثه واني مش عارفه اعمل ايه ولا ايه الي هيحصل هيا طبعا قعدت تطمني بس انا ام وكنت خايفه من المصير الي هيكون فيه ابني .
رجعت البيت فتحت النت عملت سيرش كتير قوي بالعربي والانجليزي علشان افهم الموضوع وابعاده والي هيترتب عليه وعرفت طبعا ان في انواع واشكال من الشفه الي بيكون بسيط والي بيكون كبير . طبعا لما الانسان بيكون موضوع مجهول عنه بيكون مرعوب وخايف ومش مقدر بس لما بيستوعب ويفهم الامور بتوضح ويقدر يفكر صح .
الحمد لله دي اول حاجه قلناها انا وزوجي ودعينا ربنا يلطف ويكون العيب بسيط وقرب وقت الولاده وطبعا فكرت انه لازم اولد في مستشفى يكون متخصص للاطفال وعندهم خبره في الامور دي فرحت مستشفى اليكس سيدني كيل وكنت قبل كدا ناويه اولد في مستشفى لوران ولكن لوران لسه جديده وخفت ميكنش عندهم خبره في الموضوع دا .
دخلت الولاده ووصل ابني بالسلامه والحمد لله كان الشق احادي في ناحيه واحده ومش واصل للثه او سقف الحلق والحمد لله طبعا دي ابسط انواع الشفه الارنبيه كنت طبعا خايفه انها تأثر على الرضاعه ولكن الحمد لله مأثرتش ابدا وابني رضع طبيعي دي كانت فرحتها متتعوضش .
بدانا نسئل عن احسن دكاتره في الموضوع دا ومتخصصين اطرح علينا اسامي كتير منها دكتور / محمد فتى متخصص في جراحات اللثه والفكين والوجه ورحنا بعد الولاده بفتره بسيطه وكنا طبعا عاوزين نعرف موعد العمليه المناسب فطلب مننا نجيله تاني لما ابني يوصل وزنه 5 كيلو طبعا دا علشان البنج كلي . كنت كل شهر بتاع وزنه مع دكتور الاطفال ولما وصل 5 كيلو كان عنده شهرين ونص رحنا لدكتور فتى وطلب مننا مجموعه تحاليل نعملها وبعدها يحدد موعد العمليه تمت التحاليل بنجاح وحدد موعد العمليه . طبعا صعب ان ام ابنها عنده شهرين يعمل عمليه بس ما باليد حيله امر لابد منه ورنبا معاه يحفظه .
عملت العمليه في مستشفى لوران وكان المفروض يكون مش راضع قبل العمليه ب3 ساعات طبعا وقت طويل الحمد لله قضاهم نوم كانه كان حاسس المهم دخل العمليه الدكتور مكنش عارف ممكن العمليه تاخد وقت قد ايه قال حسب ما يحتاج العميله اخدت ساعه وربع خرج بعدها قعد فتره يصرخ من البينج والالم وبعدها نام . طبعا كان في نظام معين انه لمدة اسبوع ممنوع انه يحرك شفايفه ابدا ولا في اي مجهود دا معناه ان مفيش رضاعه اعصرله و بالقطاره انقط في فمه . طبعا كان الموضوع صعب في الاول بس مع الوقت خلاص اقلمت نفسي وكنت باخد وقت طويل في التعصير لأنه الطفل لما يشفط بفمه غير لما تعصري صدرك سبحان الله . طبعا اتعذبنا كتير في الموضوع دا انا وزوجي لاأن ابني كمان كان متعود على التيتينا فكان ممنوع منها برضو فكان علطول عياط وزن .
والحمد لله عدا الاسبوع ورحنا للدكتور علشان يفك الغرز كانت كتير جدا جدا وصغيره جدا جدا طبعا كنت خايفه ان طفلي يرفض الرضاعه بس الحمد لله رضع تاني الدكاتره قالو ان الرضاعه دي حاجه فطريه متتنسيش . طبعا الدكتر كان كاتب على ادويه ومراهم والي الان بستعمله مرهم يضيع اثر الجراحه . الدكتور شافه بعدها تاني ب10 ايام والمفروض يشوفه اول الشهر الجاي يكون مر 3 شهور على العمليه .
هو طبعا العمليه سايبه اثر بس الدكتور مطمنا انه هيروح مع الوقت وكل مايكبر مش هيبان .
انا مش عارفه ممكن اكون نسيت حاجه اقولها , ويارب اكون قدرت اطمن اي اسره يكون عندها طفل مصاب بالعيب دا .
وربنا يحفظ اطفالنا جميعا من كل سوء .
واي سؤال انا في الخدمه .
الموضوع دا تجربه شخصيه خاصه جدا لن اسامح لاي شخص ينقله دون ذكر المصدر
Cinderella Cinderella 60710_2.gif فتكات ست الكل Fatakat 60710 مدينة السحر والجمال أليكس – مصر أم الدنيا