السلام عليكم يا فتوكات
معلش انا محتاجة استشارة منكو ضروري أوي ويا ريت تردوا عليا بسرعة، واعذروني لو هطول عليكو شوية
أختي عندها 25 سنة ومن سنة تقريباً اكتشفت ان عندها ذئبة حمراء لما راحت لدكتورة رجاء الحفناوي في محطة الرمل، وكانت بتديها كورتيزون وأدوية كتير 9 وبعدين بقوا 7 وف الفترة الأخيرة كانت بتاخد 3 بس هما كيناكورت وألتيازيم وهيدروكين، وف الفترة الأخيرة قالتلها تاخد فوليك أسيد
وبعدين من فترة قصيرة بدأت تحس بحكة ف إيديها ودراعاتها ورجليها ويحمرو، وما كانتش د رجاء شغالة فراحت لدكتورة جلد كبيرة فمحطة الرمل اسمها د مريم …
المهم بأه ان د مريم طلبت منها تعمل تحليلين واحد بتاع الذئبة العادي الل كانت بتعمله اسمه ANTI_DNA (DS، والتاني اسمه LE (Cell Test، وقالتلها تغير معمل التحاليل وقالتلها على واحد تاني غير البرج والمختبر – للأسف مش فاكره إسمه دلوقتي – بس كل الناس بتشكر فيه بيقولوا متخصص في أمراض المناعة
التحليل الأولاني بتاع الذئبة النورمال بتاعه من 0 ل 30 وهيا طلعت 30، والتاني الل مش عارفين بتاع إيه أصلاً ده طلع نيجاتيف،فالدكتورة قالتلها انتي كده معندكيش ذئبة ولا حاجة وقفي الأدوية، مع انها كانت مورياها التحاليل القديمة الل النسبة فيها عالية، وطلع ف تحليل البراز الل كانت طالباه منها ديدان متحوصلة ف الإثنا عشر اسمها الجارديان قالتلها ان هيا الل مسببة كل الأعراض الغريبة الل عندها وادتها علاج ليها وخلصته وعادت التحليل والديدان اختفت الحمد لله
المشكلة بأه دلوقتي انها طلعت حامل – وهي عندها ابن عنده 3 سنين – ومكانتش بتستعمل أي موانع حمل طول التلت سنين دول، ومع ذلك مكانش بيحصل حمل .. فراحت أول امبارح لدكتورة نسا ومعاها طبعاً كل التحاليل، ودي بأه قالتلها مفيش حاجة اسمها مرض مناعي يروح خالص، دي بس النسبة قلت وانها لازم ترجع تاخد الأدوية والكورتيزون تاني
ودلوقتي هيا مش عارفة تعمل إيه، ولا تسمع كلام مين، وتاخد الأدوية ولا لأ، وخايفة ع البيبي وخايفة من الحمل على قد ما كان المفروض تفرح بيه، فيا ريت تشيروا علينا الله يخليكو .. ولو ممكن قولولي تروح لمين دكاترة مناعة يكونوا متخصصين ف الذئبة ونسا يكون عندهم فكرة ازاي يتعاملوا مع الحامل الل عندها ذئبة بردو – بس يا ريت ف اسكندرية – عشان هيا صعب عليها السفر، وربنا يجزيكو كل خير يا رب ويحققلكو كل الل بتتمنوه.
وربنا يحفظ الجميع ويشفي جميع مرضى المسلمين
peace_angle peace_angle فتكات متميزة Fatakat 93658 Giza – Egypt