السلام عليكم ورحمه الله وبركاته
حبيباتى الفتوكات
وحشتونى الكام يوم دول
بقالى كام طبخه طالبه معايا تصوير لبعض الوصفات
بصراحه مروركم لمواضيعى وردودكم وتقيمكم
شجعنى استمر
ويارب اكون بفيدكم
النهارده جيبالكم طريقه طبخ الديك الرومى
ينفع فى العزومات
ندخل فى المهم
المقادير
ديك رومى ابيض نوعه تركى من اى هايبر كبير والوزن اللى تحبوه
ديكى النهارده وزنه 3كيلو و400 جرام
اول معلومه فى شوى الديك الرومى فى الفرن انه يكون ابيض مش بلدى
باقى المقادير
بصل / جزر / حبه طماطم / صلصه وزيت للدهن / ملح / فلفل / بهارات / زعتر
روزمارى / قرفه /
زنجبيل بودره /ريحان / معلقه خل ابيض
الطريقه
اخدت البصل والجزر والطماطم والتوابل ومعلقه الخل
ضربتهم فى الخلاط
وقلبت معلقتين الصلصه مع حبه زيت ادهن بيهم الديك بعد التتبيل
هنا كنت غسلت الديك كويس جدا بالخل والدقيق والملح
بدأت اتبل فيه
بنتى حاولت تصور وانا بتبله ونوعا ما قدرت توضح
هنا بدأت اخد من التتبيله واحشى الديك من الداخل وبين الجلد وعند الرقبه
يارب الصور تكون موضحه
خصلت تتبيله من كل النواحى
وجبت الصلصه مع الزيت ودهنته من الخارج
الخطوه ديه مهمه عشان يتحمر وفى نفس الوقت ميلزقش فى الكيس
جبت دباره ولميت الرجلين على بعض مع الزلموكه وربطهم
خلصت وجبت الكيس الحرارى ودخلت صاحبنا الديك فيه وقفلته
واهم خطوه فى الكيس الحرارى انك بعد ما تقفليه تفتحى الكيس من 4 او 5 نواحى فتحات بسيطه عشان وهو فى الفرن يطلع البخار من الفتحات
عايزه اقولكم ان فكره الكيس الحرارى ممتازه جدا جدا احلى واصح من الورق الفويل
فى خطوه مهمه جدا نسيت اكتبها فكرتنى بيها عضوه جزاها الله خيرا بيها
انا يا بنات بتبله واقفله بالكيس الحرارى وبشيله من بليل لتانى يوم
ولو فى نفس اليوم يفضل يتبل قبل التسويه ب 6 ساعات
معلومه مهمه جدا ناخد بالنا منها لان فى كتير ميعرفش ايه هى مده سوا الديك الرومى فى الفرن
هى ان كل كيلو بياخد ساعه فى الفرن
بمعنى ان ديكى المحترم 3 كيلو و400 جرام اخد بالظيط 3 ساعات ونص تقريبا بعد تحميره كمان
هنا فتحت عليه بعد 3 ساعات وتلت
شايفين بقى تمام وحسيته لقيته استوى كويس
خرجته وقلبت عمنا الديك على وشه وشلت الكيس من عليه وشغلت الشوايه عشان الظهر كمان يتحمر
اخد حوالى 5 دقايق تحمير الظهر والجوانب
وديه كانت النتيجه
مره كمان عشان خاطر عيونكم
بجد الطريقه سهله والنتيجه شيك جدا لو عندك عزومه
وممكن تقدمى معاه اللى تحبيه من انواع الاكل
انا كنت عامله محشى ورق عنب وبدنجان وفلفل وسلطه بابا غنوج ومخلل
يارب اكون قدرت اقدم طبق ينال اعجابكم
وتستفادو
تحياتى ليكم جميعا حبيباتى
والى اللقاء فى اكله جديده
مواضيع هذا القسم برعاية
* مرجانة * * مرجانة * 98580_9.gif فتكات غالية قوي Fatakat 98580 الرياض – السعوديه