حبيباتي الفتوكات دي طريقة مامتي ربنا يخليها في الخبيزة
اولا دة شكل الخبيزة
بنقطفها ونغسلها وبنجيب حزمتين سلق نقطفهم ونغسل الورق وحزمتين كسبرة نغسلها ونقطعها
نحط الخبيزة والسلق وحزمة واحدة كسبرة في حلة
ونحط عليهم شوية مية يدوب تغطيهم ونحطهم ع النار
بعد كدة نصفيهم من المية وناخد اللي طلع مع حزمة الكسبرة التانية ونعملهم في المصفاة ام ايد دي
لغاية كدة دي الطريقة التقليدية
المهم حاولت اعمل بالمصفاة بتعمله كويس بس متعبة بالنسبة لي (خدنا ع الراحة ) وهتاخد وقت وحسب تعليمات ماما بلاش اعمله في الخلاط او الكبة
بس بصراحة جربت اعمل جزء منه لقيت النسيج والالياف بتاعة الخبيزة والخضرة موجودة وقلت كان عندك حق يا ماما ،طيب اكمل بقي بالمصفاة لكن في الوقت دة اختي اتصلت بيا وعرفت انا بعمل ايه ولقيتها بتقولي طب ليه دة كله اعمليها بطريقتي ……..اللي هي ايه يعني ؟
قالتلي بعملها بالمفرمة …..طبعا كنت مش مقتنعة لكن قلت اجرب وخلاص وزي ما تيجي وطلعت المفرمة
وفعلا لقيتها بتتعمل في منتهي السهولة وبسرعة جدا والالياف طبعا مش بتنزل من المفرمة
ربنا يكرمك ويبارك في اولادك يا اختي يا حبيبتي
ودي شكلها بعد الفرم
واكون حاطة ع النار حلة فيها شوية شوربة صغيرين ومعلقتين تلاتة رز واسيبهم يغلوا علي ما الرز يستوي
وبعد كدة احط الخبيزة المفرومة علي الشوربة والرز واسيبها تغلي غلوة او اتنين بالكتير ويكون غطا الحلة مفتوح علشان تفضل خضرا
واعمل الطشة بتاعة الملوخية اللي توم وكسبرة ناشفة ونحمرهم في سمنة واضيفها عليها
ودة شكلها بعد الغرف
وكدة خلاص خلصت الخبيزة لكن دعواتي لمامتي ولاختي مش بتخلص ابدا
شكرا يا احلي فتوكات وارجو الموضوع يفيدكوا
[/quote] مواضيع هذا القسم برعاية
جوجو نونو جوجو نونو 425241_2.gif فتكات غالية قوي Fatakat 425241 القاهرة – مصر