السلام عليكم ورحمه الله وبركاته
الحمد لله يابنات ربنا كرمنى وولدت يوم
31/10بتوتى حبيبتى سندس ربنا يبارك فيها ويحفظها يارب
كنت كاتبه موضوع يوم 30 وكنت خايفه جدا من الولاده القيصرى بس الحمد لله قدر الله وما شاء فعل
انا اتحددلى ولاده قيصريه بسبب ان الحوض ضيق وكان نفسى جدا اولد طبيعى بسبب كلام البنات اللى ولدوا قيصريه وقالوا انها متعبه اوى وعملت كل حاجه
لانى عرفت ان
الدكاتره بتستسهل ولفيت تقريبا على 5 دكاتره وكلهم قالولى نفس السبب
ويوم 28 رحت لدكتوره وقولت هشوف هتقولى استنى ماشى هتقولى بردو الحوض ضيق هتوكل على الله واروح
وفعلا الدكتوره قالتلى نفس الكلام وقعدت اقول بقا خلاص هولد ان شاء الله بس بلاش يوم 31 عشان اخر يوم فى الشهر
وفضلت اقول كده كتير لحد ما رحت لدكتوره بتاعتى تانى يوم وقولتلى انا فاضلى يومين عشان اخلص التاسع
وخلاص ان شاء الله اولد بس على يوم الجمعه 1/11 قالتلى خلاص ماشى وبعدين قالتلى بلاش تعالى الخميس عشان
انا عندى حساسيه ولازم اخد بنج نصفى انا بقول الكلام ده عشان كل واحده عدت التاسع كله ومفيش وجع تعرف ان ليهامعاد
مهما عملتى مش هتولدى غير فيه وقد كان رحت المستشفى الصبح والدكتوره بسم الله ما شاء الله عليها كويسه جدا
وشاطره جدا الحمد لله واهم حاجه دكتوره التخدير البنج النصفى الابره مش بتوجع خالص والعمليه عملتها فى نص ساعه
بالظبط وطلعت الحمد لله كنت كويسه جدا طول ما البنج موجود واول ما بدا يروح ادتنى مسكن بس للصراحه لما جت
ضغطت على بطنى حسيت بالم وبعدين بس مش مبالغ فيه تستحمليه لان البنج مرحش خالص اديتنى المسكن ولما رجلى بدات تفك اهم حاجه تحركيها
وبعدها بشويه غصبت
على نفسى وقومت اول مره اه صعبه بس شويه مش صعبه اوى اوى يعنى زى ما كنت بشوف البنات كتبين هنا
والحمد لله دخلت الحمام (اكرمكم الله ) على اخر النهار والحمد لله روحت واول يومين فى البيت كان تعب العمليه بس
كنت قاعده بالمسكن والحمد لله على كل شئ مش عاوزه حد يخاف والله ربنا بيسترها معانا جدا وبيخترلنا اللى نقدر
نستحمله لايكلف الله نفسا الا وسعها
ودى بقا شويه نصايح فدتنى جدا
اول حاجه خليكى واثقه ان ربنا كاتبلك الخير ليكى ولابنك او بنتك
تتابعى مع دكتوره واحده تثقى فيها عشان متغلبيش كتير بين الدكاتره
وتدهنى صدرك بكريمات مرطبه فى الحلمه الشهر التامن بس لو جالك اى انقبضات توقفى فورا
واسالى على المستشفى اللى هتوليدى فيها قبل الولاده بفتره لانك لو دخلتى فى التاسع كل تفكيرك انتى امته تولدى وممكن كمان الولاده تيجى فاجاه من غير تحضير
والبنج النصفى كويس جدا ومش مضر ولا اى حاجه الدكتوره بتقولك رتين تمشى عليها اول يومين عشان تتجنبى الصداع واحلى حاجه انك تشوفى ابنك او بنتك
وهو طالع من جواكى وتنسى كل حاجه فى الدنيا اول ما تسمعى صوته تحسى ان الدنيا كلها متساويش وممكن تتعبى قد كده الف مره عشان خاطر عيونه
ربنا ما يحرم حد من الزريه الصالحه يارب
وكمان اول ما رجلك تبدا تفك تحركيها اول ما تفك خالص تقومى تتمشى بس متبوصيش تحت رجلك بصى فوق عشان مش تدوخى
اشربى نعناع ويانسون بقا كتير عشان تتدخلى الحمام وتطلعى فى نفس اليوم
وكمان اغصبى على نفسك ومتتنيش ظهرك وانتى ماشى لان العمليه بتكون شاده عليكى افرديه على قد ما تقدرى عشان ميتعبكيش
ياريت تقيمو الموضوع عشان اى حد خايف من القيصرى زى ما كنت يتوكل على الله مدام ده خير ليه وللبيبى
ربنا يقوم كل الحوامل بالسلامه يارب ويرزقهم ساعه سهله انا كنت دايما بدعى بكده وكنت بقول يارب وقفلى ولاد الحلال
والحمد لله عدت ربنا يكملها على خير ان شاء الله هفك السلك يوم السبت ان شاء الله
ادعولى بقا عشان جالى تشققات فى صدرى لانى مكانتش بحط اى كريم مرطب فى الحمل
الفراق صعب والوداع اصعب الفراق صعب والوداع اصعب 681009_3.gif فتكات رائعة Fatakat 681009 الاسكندريه – القاهره