ازيكم يا احلى فتوكات انا الحمد لله ولدت يوم السبت اللى فات وجبت ولد. انا كنت هكتب الكلام ده فى تجمع حوامل الشهور الاخيره بس حبيت اكتبه فى موضوع لوحده علشان اقدر افيد الفتوكات حبايبى كلهم وربنا يقوم كل الحوامل بالسلامه ويرزق كل واحده بالذريه الصالحه
اولا ده كان تانى حمل ليا والحمل ده كان اصعب من الاول تعبت فيه مش قئ ولا دوخه لا جسديا كان متعب وحركه البيبى نفسها كانت متعبه . وبالنسبه لنوع البيبى الاول قالوا ولد بعدين بنت وبعدين ولد قلت اسيبها على ربنا والحمد لله ربنا رزقنى بولد أخ لابنى الاول.مع انى كان نفسى فى بنوته بس كل اللى يجيبه ربنا كويس
بالنسبه بقه لشكلى فى الحمل والاعراض اللى بيقولوا عليها بتحدد نوع البيبى ولد ولا بنت انا شكلى ماتغيرش فى الحمل زى ماهو حتى وانا فى التاسع كان اللى يشوفنى يقول انى لسه مثلا فى السادس لانى الحمد لله ماتخنتش اوى فى الحمل .
حركه البيبى ابتديت اخر الثالت تقريبا وكانت فى الشمال وطلع ولد مش بنت زى ما المعتقدات دى بتقول وكمان فى السونار البيبى كان مخبى نفسه وبيقولوا دى بتبقى بنت وبرضه طلع معتقد خاااااااطئ.
انا ولدت فى اخر اسبوع فى التاسع كنت خلاص تعبت اوى وقلت هروح للدكتور اقوله يولدنى قيصرى مع انى ولدت اول مره طبيعى . بس الحمد لله فجائه وبدون مقدمات الساعه 4 الفجر لاقيت فى ميه بتنزل وانا كنت قبلها فى التويلت قلت ممكن يعنى من حركة البيبى سورى عملت حمام ولا حاج ه قمت غيرت ورجعت انام لاقيت نفس الموضوع اتكرر 3 مرات فى نص ساعه قولت لا بقه وقمت اتصلت بالدكتور الساعه 5 الفجر قالى تعالى على المستشفى الساعه 9 هنكشف ونشوف لو حسيتى بالم جامد قبل كده كلمينى.
انا قلت ممكن تكون ولاده وممكن لاء لانى فى حملى الاول العلامه اللى نزلت كانت الافرازات البنى وفضلت من الساعه 8ونص باليل لحد 2 الظهر بولد.
قمت اخدت دش وجهزت نفسى علشان لو ولدت . ماما قالتى ادخلى ريحى شويه مالحقتش يادوب خمس دقايق وفى الم بدا يجيلى على الساعه 7 وفرق بين كل طلقه وطلقه تقريبا 10 دقايق وبعد نص ساعه الالم زاد وبقه الفرق اقل ط بعا انا تلجت وبقيت اترعش وقلت لاء مش هقدر اكمل لاخر الطلق كلمت الدكتور قلتله انا نازله تعالى على المستشفى عايزه اولد قيصرى قالى طيب اسبقينى على هناك قمت البس وابنى الكبير اعينى صحى وكان صعبان عليا اوى وانا نازله وببصله بجد ده كان وقت صعب اوى لانه كان بيعيط وعايز ينزل معايا وانا خايفه اصلا وسايباه ونازله.
المهم وصلت المستشفى وطبعا شغاله تليفونات على الدكتور دخلونى اوضه غيرت هدومى ونمت وجت دكتوره كشفت نسا قلتلها انا عايزه اولد قيصرى كلمى الدكتور قالتى جاى فى الطريق وانا خلاص مصممه اولد قيصرى لانى خايفه اقعد وقت طويل زى الولاده الاولى وكمان مكان الجرح والخياطه من تحت مع كل طلقه كان بيوجع جدااااا. كلمت الدكتور عااااش ر اقوله خليهم يدونى بنج لحد ماتيجى قالى انا طالع على السلم.
وفاجئه جم خدونى على اوضة العمليات ونيمونى على الكرسى الفظيع بتاع الولاده وانا قالوهم انا هولد قيصرى والممرضات والدكاتره يقولولى يا حبيبتى انتى خلاص بتولدى الرحم فاتح عندك 7 سم حرام نولدك قيصرى الناس بتتمنى الطبيعى. وانا مصممه و جيه الدكتور وقعد ياخدنى على اد عقلى ويضحك عليا يوقلى انا بعت اجيب دكتورة البنج وهى جايه فى الطريق قدامها 5 دقايق بس ووبعدين خدنى على خوانه وقالى احنا نجرب نولد طبيعى لو مانفعش هولدك قيصرى وانا خلاص مش قادره وفجائه لاقيته قالى خدى نفس من بؤك وطلعيه من منخيرك وماحسيتش ايه اللى حصل لاقيت نفسى فى عالم تانى غريييب شا يفه الدكتور شكل اى تى بتاع الفضاء واصوات المرضات زى لما نسرع شريط الكاسيت وانوار عمالة تقيد وتطفى وناس رايحه وناس جايه واشكالهم واصواتهم غريبه واحساس ولا افلام الخيال العلمى ولا الكرتون وصرررررريخ فظيع اتارى الاستاذ ابنى شرف وصريخه المزعج هو اللى فوقنى . والحمد لله ولدت طبيعى عكس ماكنت متخيله خالص وفوقونى ورجعونى على الاوضه بس كنت لسه مش فايقه اوى و متلجه لدرجة انهم غطونى ب 4 بطاطين مع ان الجو مش كان ساقعه اوى.
فضلت شو يه لحد ماقدرت اقوم الممرضه جت اخدتنى علشان تنضف مكان الدم وطبعا هم بيبقوا محترمين جدا بعنى ماحدش يخاف من الحكايه دى هم بيشطفوا اصلا بسرعه علشان ماتععرضيش للهوا .
اهم حاجه تستنى شويه لحد ماتشربى حاجه لانى رجعت من البنج 4 مرات علشان جابولى حلبه اشربها رجعت وبعد العصير رجعت بس بيقولوا كده احسن علشان اثر البنج يروح الله اعلم فى المعلومه دى .
قعت فى المستشفى تقريبا ساعتين ونص لحد مافقت خالص وبعدين روحت الحمد لله انا والبيبى بالسلامه.
اهم بقه النصايح اللى عايزه اقولهلكم لازم تدفى نفسك كويس وانتى ماشيه حتى لو الجو حلو او حر انا كنت متلجه بس لما روحت لاقيت نفسى حرانه خففت فى الهدوم لاقيت جسمى بقه مكسر وعظمى كله بيوجعنى
كمان فى نوع كبسولات اسمه هيربانا حلو اوووى هو مصنوع من الحلبه ومدر للبن ده للناس اللى مش بتحب تشرب حلبه زى لان الحلبه طبعا مفيده جدللل بالنسبه للبن بس ريحتها فظيعه ده الدكتور كتبهولى
انا اللبن عندى اتاخر وابنى كان بيعيط وكانوا كتبينله على بيبى درينك بس كان بيصرخ على طول قلت اديله رضعة للبن صناعى وكلمت الدكتور وقالى على اسم بيبى لاك 1 بس هو بصراحه قالى انه مش بيفضل اللبن الصناعى اناق لت رضعه مش هتضر بس للاسف الولد جاله مغص فيع وصريخه زاد نصيحه اذا كان فى امكانيه للرضاعه الطبيعى خليكى ورا البيبى وكل شويه خليه يرضع لان رضاعته دى اللى هتنزل اللبن وبلاش اى اعشاب ولا بيبى كالم ولا بيبى درينك ولا اى حاجه من دى .
بالنسبه لرباط البطن انا سمعت انه مهم بس بصراحه لسه مش جبته علشان لسه ما نزلتش
والاهم من ده كله سبيها على ربنا وادعى ان ربنا يرزقك باللى فيه الخير ليكى انا كنت بدعى بكده ومع انى كنت مصممه اولد قيصرى ولدت طبيعى والحمد لله كانت ولاده اسهل بكتييييييييير من الاولى
التجهيزات بقه الخاصه بيا اللى انا اخدتها معايا كانت:_
2 جلبية بيت واحده لبستها وقت الولاده والتانيه بعد ما خرجت واتشطفت
عباية خروج لبستها وانا مروحه على الجلبيه لانى كنت رايحه بهدوم الحمل بتاعى
فوطه
شاور جل او صابونه ديتول وليفه
طرحه
توكه علشان تلمى شعرك كويس وقت الولاده ومشط طبعا لان شعرك اكيد هيتبهدل
اندرات انا اخدت معايا 3 احتياطى وبرا
طبعا فوط صحيه انا جبت سندريلا وبرايفيت لان الويز بتعملى التهابات
شبشب علشان لو احتاجتى تتمشى فى المستشفى وقت الطلق وكمان وانتى داخله التويلت
شراب ممكن دلوقتى ماتحتجهوش لان الجو بقه كويس بس ابقوا خدوه احتياطى انا سقعت ولبسته
حاجات البيبى:_
انا اخدت 2 طقم احتياطى عباره عن فنله كت وسلوبيت كم بكابسين وسلوبيت خروج وجوانتى ولكلوك وطاقيه لكل طقم
شامبو وشاور جل وزيت جونسون وزنك اوليف كريم كل دول اللى من غير ريحه بس هم فى المستشفى حموا البيبى من عندهم
بامبرز اخدت 5 بس برضه لبسوه من المستشفى
بشكير كبير
ببرونه وتيتينه
كوفرته وبطانيه
سبرتو علشان غيار السره لو قاعدتى شويه فى المستشفى
انا عارفه انى طولت عليكم اوى بس حبيت احكيلكم كل شى بالتفصيل يمكن حد يستفاد منى حاجه ياريت تدعولى ربنا يخليلى زوجى واولادى ويجمعنا احنا وهو فى اقرب وقت ويحفظهملى ويجعلهم قرة اعين لى و لباباهم. وان شاء الله ربنا يقوم كل الحوامل بالسلامه ويرزقهم بأحلى بيبيهات
lavander lavander فتكات هايلة Fatakat 124733 القاهره – مصر