السلام عليكم
ازيكم يأحلى فتوكات
الحمد لله قمت بالسلامه وولدت يوم الجمعه تاني ايام العيد وكانت بصراحه ولاده لا على البال ولا على الخاطر لاني كنت عند الدكتور اليوم العاشر من التاسع على اساس يحدد موعد ولاده وقالي بما ان كل حاجه ماشيه تمام كلميني تالت يوم العيد اللي هو كان السبت على اساس اروح اولد الاحد او الاتنين وكان كل شيء تمام وخطوبه اختي كانت تاني يوم العيد وخطوبه اخويا تالت يوم العيد وقولنا هنحضر الافراح ونولد ومرتبين نفسنا على كدا.
المهم صحيت تاني يوم العيد كالعاده الساعه 7الصبح من الحموضه مش عارفه انام خالص قمت دخلت الحمام عادي ورجعت قعدت على السرير مسكت الموبايل قعدت شويه على الفيسبوك عشان اضيع وقت على مالحموضه تروح وبعد شويه هديت واستعديت اني انام تاني حسيت اني مبلوله بلل بسيط محطتش في دماغي لاني ولاداتي الاتنين اللي قبل كدا كان بتحديد مع الدكتور. قلت يمكن رطوبه ولا حاجه اكمني لسه خارجه من الحمام بس للاحتياط جبت فوطه صغيره وحطيتها على الاندو واستعديت للنوم.
بتقلب حسيت اني مبلوله قمت من على السرير لقيت السرير غرقان ميه والبنطلون والاندر والفوطه وكمان ميه سخنه نازله مني عرفت انها ميه الجنين صحيت جوزي وقام كلم الدكتور قاله في خلال نص ساعه تكون عندي قمت بسرعه صحيت امي واختي العروسه عشان ماما تروح معايا واختي تلم معايا هدوم العيال عشان العيد والافراح لأني هرجع على بيت بابا مش بيتي.
لميت الللي عايزه المه ودخلت اخدت دش وتوكلت على الله وصلت مركز السلامه للولاده في شبين الكوم لقيت الدكتور مستنيني عملي سونار قالي الميه فعلا قلت شويه وهنتوكل على الله ونفتح على فكره انا ولاداتي الاتنين اللي قبل كدا قيصري
المركز ممتاز نضافه وتمريض فوق الممتاز
المهم ركبولي واحده محلول ولما خلصت دخلت العمليات لقيت دكتوره البنج. سلمت عليا لانها عارفاني من ولادتي اللي قبل كدا وكمان عشان جوزي دكتور وصممت جوزي يدخل معايا وابتدت تعقم ظهري وقالتلي ارتاحي في الققعده ومتشديش نفسك وسمعت كلامها واديتني البنج في ظهري والحمد لله محستش بيها يمكن الكانيولا حسيت بيها اكتر
رفعولي رجلي لانها ابتدت تتخدر وركبولي قسطره البول وحطتلي الكمامه على بقي قالتلي دي هتنيمك على ميطلعو البيبي وفقت على هزار الدكتوره مع الدكتور وع جوزي طبطبت عليا وقالتلي لو حسيتي باي حاجه قوليلي بصراحه اللي كان تاعبني الترجيع ودي اول مره تحصل معايا حتى بعد مقمت اتمشيت الترجيع مستمر راج الدكتور كتبلي لبوس والحمد لله ارتحت
وخرجت من العمليات قبل اذان الجمعه بخمس دقايق وخرجت من المركز الساعه 6 المغرب وربنا رزقني بمازن ربنا فيخليه ويجعله ابن بار صالح يارب
ومحدش يخاف من الولاده رحمه ربنا اوسع من اي خوف او قلق وعقبالكو كلكم يارب لما تقومو بالسلامه وتفرحو بأولادكم وربنا يرزق كل محروم بالذريه الصالحه ويهدي حال بلدنا يارب
ذكريات قلب ذكريات قلب 277969_1.gif فتكات متميزة Fatakat 277969 المنوفيه – مصر