الحمد لله رب العالميين انا يوم الاحد اللى فات 10/11/2015 روحت مستشفى الجلاء الحكومى للحقن المجهرى اللى فى شارع الجلاء فى وسط البلد
كانت اول زياره ليا كانت مع دكتور احمد النقيب
اول حاجه طلبت منى صورة قسيمة الزواج وصور بطاقتى وبصورة بطاقة جوزى
وعملتلى كارت المتابعه بتاعى اللى هروح بيه كل مره وقالتلى اتفضلى استريحى هنا لحد ما ننده عليكى قعدت وكان فى ناس كتير قاعده الريسيبشن كان مليان اللى جايه تسحب بويضات واللى جايه ترجع اجنه واللى لسه اول مره واللى تانى وثالت زياره ليها وهكذا
المهم بعد شويه لقيت الممرضه ندهت اسمى وقالتلى تعالى لوحدك هنوزنك
دخلت وزنتنى وقاست طولى وقالتلى استريحى بره ونبقى ننده عليكى علشان تدخلى للدكتور بعدها بحوالى ربع ساعه دخلت
الدكتور بقى سالنى اساله كتير واخد منى التاريخ المرضى للعائله (يعنى لو فيه اى امراض وراثيه فى العائله )
ومن جوزى نفس الشئ وساله هل انت تزوجت قبل كده تانى ام لا طبعا ايوه بس مخلفشى منها
وانا كمان طبعا لآ عملتى اى عمليات زوجك عمل عمليا وبعدين شرح لنا التكلفه وشرح لنا العمليه بتتعمل ازاى وخطواتها ايه
وقال لنا تكاليف العمليه كالاتى
العمليه ب 2,300 والعلاج هيكلف 3000 بس يعنى العمليه بالعلاج لا تتعدى 5,300 ولو انتى مش هتحتاجى علاج كتير ممكن تتكلف 4,300 بس يارب
وطلب منى تحاليل اعملها انا وزوجى
تحاليلى انا كانت
anti mullerian hormone- 1
2 -E2
3-fsh
4-lh
5-brolactin
6- تحاليل الفيروسات
7 – هيموجلوبين
8- سكر بالدم
ومن زوجى طلب منه تحليل السائل المنوى
وتحاليل الفيروسات
والدكتور قالى لما التحاليل تظهر اتصلى بينا وعرفينا انها ظهرت واحنا هنقولك تجيلنا امتى وتجى علشان نبدء العلاج باذن الله
زقلنا على المعمل اللى نروح فيه المعمل متعاقد مع المستشفى وبيعملو لك خصم كتير اوى
سالت ناس عملو التحاليل دى فى البرج عملوها ب 1300 جنيه سالتهم ليه مراحوش المعمل اللى الدكتور قال عليه قالو ممكن يكون مش حلو احنا نجرب ونروح المهم الدكتور قالنا نروح معمل طيبه فى الدقى روحنا الفرع الرئيسى بصراحه المعمل نظييييييييف جدا جدا
انظف من معمل البرج كمان ومعامله هاديه كده وبجد مكان نظيف انا والله مش بعمل دعايه ولا حاجه انا بس بشرح لكم تجربتى واد ايه انا ارتحت مش اكتر
والتحاليل كلفتنا هناك 530 فى فرق طبعا من اننا كنا دفعنا 1300 جنيه
وادعولى بقى بالله عليكم ربنا يكملى الموضوع على خير وادعولى كده من قلبكم ان اتحاليل تطلع سليمه ونكمل طريقنا
انا حبيت افيدكم واخليكم معايا على الخط من البدايه لحد ما ربنا ياذن لنا باللى جاى
وربنا معانا جميعا دعواتكم
يا بنات
والتحاليل قالو لنا هتظهر بعد اسبوع
ادعولى بالله عليكم
ولو تفضلتو وقيمتو الموضوع يبقى كتر خيركم علشان ناس كتيير اوى نفسهم برده زينا يلاقو اللى يفيدهم
دمعه ساجده دمعه ساجده 348701_17.gif فتكات رائعة Fatakat 348701 حلوان – جمهورية مصر العربيه
ربنا يكرمك ان شاء الله
ربنا يرزقك الذرية الصالحة عاجلا غير اجلا
لوسمحتى تبلغينى بالجديد لانى بفكر اعمل حقن مجهرى نظرا لانى مستاصلة انبوب وانبوب تاثر من نزيف فى البطن بعد حمل خارج الرحم
وربنا يرزقنا جميعا واشرحيلى كافة التفاصيل لو سمحتى بعد اذنك وبخاصة موضوع التكاليف لانى ماديا مقدرش اعملها بمركز غيرحكومى
انا اقصى قدرتى ستة الاف
ويا ترى لو انا من محافظة تانية موضوع المواصلات ده هياثر ولا لا
ممكن اعرف تجربتك لان ظروفي نفس ظروفك .
انا محتاجة اعرف ألتفاصيل لو سمحتي لان الظروف المادية صعبة جدا
الدكتارة حلوه هناك وربنا كرمني علي ايدهم
من غير ولا مليم
ممكن اعرف سنك كان اد ايه وقتها
العنوان فين لوسمحت