ازيكوا يا جماعة عاملين ايه يارب تكونوا كلكوا كويسين أعرفكم بنفسي انا عضوة جديدة اسمي مي انا فرحانة أني عضوة في مدونة فتكات الجميل وأتمنى أني أبأه عضوة افيد واستفيد من المدونة الجميل دا
معلش يا جماعة عارفة أن موضوعي صعب شوية وتقيل وهو سرطان الثدي (Breast Cancer) و العياذ بالله ربنا يحفظنا جميعا وينعم برحمته وقدرته على كل اللي اختبرهم بهذا المرض بالشفاء بس والله اللي دافعني إلى الكتابة عنه هوا أني بجد حاسة انا المرض دا أصبح منتشر ولازم كلنا نبأه عندنا وعي من ناحيته، علشان كدا أنا دخلت على الموقع الرئيسي لسرطان الثدي (Breast Cancer) وهو
www.breastcancer.org/
وقريت عن خطوات الفحص الذاتي اللي لازم البنت والست تعملها كل شهر للاطمئنان من غير ما طول عليكوا أنا هاعرض عليكوا الخطوات وربنا يسترها معانا جميعا ويمتعنا بصحتنا دايما بإذن الله:
أولا: بالنسبة لبنات والسيدات اللي بتجيلهم البيريود يستحسن أن الفحص يبأه
بعد انتهاء البيريود بأيام قليلة يعني
أما بالنسبة لسيدات اللي انقطعت من عندهم البيريود ممكن يحددوا يوم معين للفحص مثلا أول يوم من كل شهر
الفحص شهري يا جماعة نبتدي بأول خطوة
الخطوة الأولي
أنك تقفي ادام مرايا وايدك في وسطك وبصي لشكل الصدر لازم تحفظي حجم صدرك بالظبط وشكله ولونه علشان لا قدر الله لو لاحظت بعد كدا أي تغير ترصديه على طول. بعد كدا تلاحظ أن الجلد ناعم مفهوش حاجة غريبة
لا قدر الله لو لاحظتي أي حاجة غريبة زي مثلا تجعيد أو طفح جلدي شكله غريب أو دمامل أو انتفاخ أو ورم في الصدر يبأه يستحسن استشارة الطبيب.بالنسبة للحلمة لازم برده تاخدي بالك من شكلها لو أنتي مثلا من النوعية اللي حلمة الصدر طالعة لبرا مش داخلة زي بعض البنات يبأه لازم تاخدي بالك لو لقيتي واحد منهم مدفوسة كدا او داخلة لجوا وطبعا شكلها بوجه عام لو فيه أي شيء شكله غريب ، بالاضافة بأه لأي احمرار أو حرقان او طفح أو وانتفاخ أو تورم زي ماقلت بوجه عام في الصدر عامة.
الخطوة التانية
أن تقفي وترفعي ذراعيكي لفوق و تشوفي برده إدا كان فيه أي تغيرات غريبة.
الخطوة التالتة:
بالنسبة لحلمة تاني خدي بالك من أي افرازات طالعة من حلمة واحدة أو من الاتنين سواء كانت شفافة او لبنية أو صفراء أو فيها دم.
الخطوة الرابعة ودي من أهم الخطوات:
نامي على الأرض وابتدي بعمل فحص شامل لجميع أجزاء الثدي من تحت الابط منطقة لغاية تحت الصدر استخدمي ايدك اليمين لفحص الصدرك الشمال والعكس الايد الشمال لفحص الصدر اليمين طبعا الفحص بصوابعك يعني ضمي كدا صوابعك وابتدي في الفحص ابتدي بالضغط على جميع أجزاء صدرك بحركات دائرية ومن أسفل لأعلى ومن اعلى لأسفل وهكذا علشان تبأي فحصتي كل اجزاء الصدر وضغطي على كل جزء الخطوة دي مؤلمة شوية علشان الضغط على الصدر وكدا بس معلش اهي مرة في شهر
الخطوة الخامسة:
هيا شبيهة جدا بالخطوة الرابعة بس هاتعمليها وأنتي واقفة أو قاعدة برده هاتفحصي الصدر بالضغط عليه الخطوة دي بينصح انك تعمليها و انتي تحت الشاور علشان المية هاتسهلك عملية الفحص بالضغط على الصدر وبرده يا جماعة لازم تخدوا بالكوا من فحص منطقة الصدر كلها وأسفل الإبط وأسفل الصدر.
في النهاية النصيحة اللي بيقدموها الدكاترة على الموقع أن البنت أو الست مفروض ميجلهاش حالة هلع وذعر في حالة ملاحظتها لأي شيء غريب لازم تحتفظ بهدوء أعصابها لغاية لما تستشير الدكتور لأن أصلا منطقة الصدر من المناطق المعرضة لظهور الأورام وفي كثير من الأحيان الأورام دي بتيأه الحميدة مش خبيثة والعياذ بالله علشان كدا ينصح بعدم الذعر.
أنا عارفة يا جماعة أننا ممكن نكسل أنا نفسي باكسل بس نحاول على اد ما نقدر ندوام على عمل الفحص
في النهاية باكرر دعائي بالشفاء لكل المختبرين بالمرض دا ربنا يحفظنا جميعا يارب.
ملحوظة: أنا ارفقت بالموضوع الصور الايضاحية
المصدر: https://www.breastcancer.org/symptoms/testing/types/self_exam/bse_steps.jsp
aurora100 aurora100 فتكات نشيطة Fatakat 180754 الإسكندرية – مصر