النهاردة حبيت أعمل معاكم بطة محشية في الفرن و عملت جنبها قلقاس و رز بالشعرية
أول حاجة جبت البطة و فركتها بالدقيق و الليمون و الخل و الملح من برة ومن جوة كويس جدااا و شطفتها بمياة جارية كويس و بعدين نقعتها بمية و ليمون ساعة تقريبا
و دعتكتها تاني بشرايح الليمون و بعدين شطفتها و سيبتها تتصفا أثناء تصفيتها كنت بأحضر الحشو اللي بالفريك
حمرت البصل ياخد لون دهبي
و بعدين نزلت عليه بالفريك المسلوق نص سلق و كنت حطيت معاه شوية رز صغننين أد كبشة إيد كدة
و تبلته بالملح و الفلفل الأسمر و سيبته يتفلفل ع النار مع التقليب
سيبته يبرد و كنت عاملة تتبيلة للبطة عبارة عن بصل و طماطم واحدة بس و ملح و فلفل أسود و شوية بهار بسيييييط أوي ضربتهم في الكبة و بعدين ضيفتهم ع البطة و دعكتها بالتتبيلة من برة و جوة و سيبتها تتشرب شوية من التتبيلة و يكون الفريك هدي شوية
كنت في أثناء كدة كنت بأسلق لحمة عن النار عشان القلقاس لأن جوزي مش بيحب شوربة البط في أي أكل
هنا اللحمة و هي بتتسلق
جبت كيس القلقاس لأني أصلا في غربة و القلقاس بأجيبه معبأ في أكياس بس بصراحة في الخضروات المجمدة مش بجيب غير خضار بسمة خضاره كأنه فريش و دة شكل الكيس و على فكرة بيكون جواه كيس صغنن للخضرة بتاعة التقلية
و حتى الكسبرة بأجيبها أحيانا كدة برضه أحتياطي في حالة لو ملقيتهاش فريش و بتكون نفس الطعم و دة شكل كيس الكسبرة الخضراء
بأحط القلقاس في الشوربة و هي بتغلي و معاها نص حبة طماطم و حتة من التقلية بس نية توم و خضرة
و لما تدخل في السوا أحضر التقلية مع راس توم و الخضرا في حتة سمنة حلوة كدة
و نحمر فيها لغاية ما تاخد لون غامق و نضيفها على الحلة و نغطي على طول دقيقتين و نطفي عليها
نرجع بأة للبطة اللي كانت في التتبيلة نجهز شرايح جزر و بصل و كرفس متقطعين كبار شوية و نتبلهم في ملح و فلفل و نحطهم في الصينية اللي حيتحط فيها البطة كفرشة ليها يعني كدة
نحشيها بالفريك و نحشي الرقبة و نحطها فوق فرشة الجزر و البصل و الكرفس
و بعد كدة نغطي الصينية بالفويل كويس جدااا
و ندخلها الفرن الساخن في الرف اللي تحت لمدة ساعة ثم في الرف الوسط ساعة كمان و بعدين نتابعها لما تستوي نفتح عنها الفويل و نفتح الشواية عشان تتحمر
و دة الأكل بعد ما أتغرف
و دة طبق مخلل بيتي أنا اللي مخللاه
و طبعا كنت عاملة رز بالشعرية و شوية شوربة بلسان عصفور بشوربة اللحم طبعا
أتمنى يا رب يارب تكون سفرتي المتواضعة جدااا تعجبكوا
باي مواضيع هذا القسم برعاية
*** هداوة السر *** *** هداوة السر *** فتكات متميزة Fatakat 270933 أتمنى أن أعيش في قلب و عقل زوجي – قطر