ازيكم ياأحلى بنات فى الدنيا
كل سنه أنتم جميعا بخير
ويارب ينعاد علينا وعلى أمه الاسلام بكل الخير
بمناسبه دخول العيد واللحمه جبتلكم طريقه البرجر بتاعى
أولا انا مش بحب أى لحوم مصنعه لانها لها ضرر كبير جدا وكلنا عارفين كده
لاننا مش عارفين مصدرها ولا طريقه تصنيعها
فالاحسن والاضمن ان كل أكلاتنا تبقى معموله بايدينا جوه بيتنا
أن شاء الله طريقتى تكون سهله وتعجبكم
*
*
نبدأ بسم الله
كيلو لحمه حمرا مقطعه مكعبات بدون عروق
*
*
2 بصله متوسطه الحجم …………….. 2 فص توم كبير
*
*
2 كوب فيجيتار أو عيش فينو محمص أو بقسماط المتاح ليكى استعمليه
*
*
ملح………..بهارات مشكله ………..2مكعب مرقه دجاج
*
*
صوره المقادير
وده عيش فينو مقطع ومحمصاه فى الفرن
*
*
قبل منبدأ الطريقه يابنات أحب بس أقولكم نقطه مهمه
أهم حاجه فى عمل البرجر هى المفرمه
وده الريفيو بتاعها
ريفيو ((♥مفرمه مولينكس 1800 وات فرنسيه الصنع )) بالتفصيل الممل والصور
أنا جربت البرجر قبل كده فى الكبه أو الفود بروسيسور
فعلا فى اختلاف وفرق فى النتيجه
بس ده مش معناه انك معندكيش المفرمه يبقى متعمليش
لا طبعا أهم حاجه لو حتعمليه فى الكبه تكونى جايبه اللحمه مفرومه ناعمه
وتستخدمى البقسماط مطحون أنا استخدمت العيش الفينو قطع عادى لان االمفرمه
حتتطحنه جامد مش زى سلاح الكبه
نبدأ بسم الله
*
*
اول حاجه قطعت البصل وفصين التوم مع التوابل والملح وضفتهم على اللحمه
وقلبتهم كويس
وشغلت المفرمه وركبت شبكه الفرم الوسط
وبدأت أحط المكونات بتاعتى واحده واحده والعيش الفينو كنت بضيفه بالتدريج
ودى صوره الخليط بعد الفرم أول مرحله
حعيد الفرم كمان مره بنفس الشبكه الوسط
ودى صوره بعد تانى مرحله
حتلاحظوا ان المكونات بدات تتداخل وكونت عجينه
خلصت بالشبكه دى بشيلها وأركب شبكه الفرم الناعم جداا
وبرده حنفرم الخليط باستخدامها مرتين
أدى صوره بعد أول مرحله
ودى بعد تانى مرحله والاخيره
تمام لحد هنا خلصنا الفرم بنلم الخليط فى الطبق كويس ونغطيه وندخله
التلاجه حوالى نص ساعه عشان يسهل تقطيعها لانها عجينه بمعنى الكلمه
ودى ميزه استخدام المفرمه
بعد منخرجها من التلاجه بجيب كيس بلاستيك نضيف وأفتحه وأفرد العجينه
وأخلى سمكها معقول وباستخدام القطاعات أو كوبايه حجمها معقول
تبدأى تقطعى أقراص البرجر بالشكل ده
بتشيلى الاقراص ترصيها
وبعدين تدخليها الفريزر وحدات منفرده أوعى تحطيها
فوق بعض لانها حتلزق طبعا (لو عاوزه تجمديها على طول فوق بعضها
يبقى بين كل قرص والتانى قطعه ورقه زبده )مجرد متتماسك وحدات منفرده براحتك بقى
شيليها على بعضها لانها بتكون مجمده مش حتمسك فى بعض
ودى صوره لايف بالبث المباشر من الفريز شخصيا
اتفرجو على حلاوتهم وقولوا ماشاء الله
أحلى برجر تاكليه وتأكليه لولادك وأنتى مطمنه للمكونات
وهنا بقى ساعت التحمير
ممكن تسويه بالطريقه اللى تحبيها عالجريل او متحمر أو عالبخار
عادى زى ماتحبى
اتفضلو ياحبيباتى الطبق ده لكل بنوته كتكوته دخلت موضوعى نورته
ملاحظات
سر طعم البرجر يابنات هو التوابل مع البصل والتوم الفريش
أحسن من التوم البودر مليووووووووون مره
والاهم كمان البقسماط أو الفيجتار
هو ده اللى بيكمل طعامه البرجر وبيخليه يفرق عن طعم الكفته
وأخيرا أتمنى تكون طريقتى عجبتكم وتجربوها ان شاء الله بألف هنا شفا
التقيييم والرد لو شايفه الموضع يستحق
السلام عليكم
مواضيع هذا القسم برعاية
مونى مونا مونى مونا 750847_35.gif فتكات ست الكل Fatakat 750847 كفر الزيات – مصر