كل سنة وانتو طيبين فتوكاتي الغاليات
وعام هجري جديد وسعيد عليكم
يارب
النهاردة جيبالكم
طريقة البرجر بالجبنة الشيدر
إن شاء الله تعجبكم
نقول بسم الله ونبدأ
المقادير
كيلو لحم مفروم , بصلة كبيرة مفرومة, ملح ,فلفل اسود
جزر مبشور , بقدونس مفروم , بيضة , 2 ملعقة أكل بقسماط ناعم
الطريقة
نخلط اللحم بالبصل والملح والفلفل
ونقسمها
نصين
ونحط على جزء منها شوية بقدونس
وهنا خلطنا على جزء من اللحمة شوية بقدونس
ودي الفورمة بتاعة البرجر
وممكن تستخدمي اي فورمة عندك
غطاء برطمان مثلا
أو غطاء علبة الجبنة المثلثات المدور
بس تحطي جواه كيس نايلون الاول عشان يسهل عليكي
لما تطلعيه
نحط طبقة من اللحم جوة الفورمة
ونحط عليها قطعة جبنة شيدر
ونغطيها بطبقة تانية من اللحم
زي الصورة كدة
ونغطيها بطبقة تانية من اللحم ونكبسها كويس
زي الصورة كدة
وبعدين نطلعها من الفورمة
ودة الشكل بعد ما خلصت الكمية
شوية بالبقدونش وشوية من غيره
وحطيتها في الفريزر نص ساعة
دهنت الشواية بالزيت وسخنتها كويس
وحطيت عليها البرجر
ولما يتحمر من وجه اقلبه ع الوجه التاني
ودي النتيجة و الجبنة سايحة وطالعة منها
وهنا لما فتحتها والجبنة تجنن جواها
ومدياها طعم روعة
ودي الكمية لما خلصت
ملحوظة : طبعا ممكن تسويها على صينية عادية
مدهونة زيت
مش لازم شواية.
وممكن ترصيها في صينية وتدخليها الفرن تتحمر
بس تقلبيها ع الوجهين
وواحدة صاحبتي عملتها وغمستها في البيض والبقسماط
وحمرتها في الزيت
وقالت لي طعمها فظييييع
جربوها وان شاء الله تعجبكم
***********
والبنات اللي عايزين يعرفوا انا جبت الفورمة منين
جبتها من محل اسمه التوحيد في اول شارع الجيش في العتبة
تخلي ظهرك لمدخل الموسكي وهتلاقيه قدامك ع الصف التاني
هو محل ادوات منزلية وفندقية
***********
&&&&
تقبلوا كل الود
( بنت بطوطة)
مواضيع هذا القسم برعاية
بنت بطوطة بنت بطوطة 114954_8.gif يـــارب صــبرنا Fatakat 114954 جدة – السعودية