السلام عليكم ورحمة الله
الطريقة دى انا بعمل بيها البامية
انا مش بحب اتكلم فى المقادير
هقول المكونات بس
المكونات
باميا -طماطم -فلفلة خضرا
كزبرة خضرا -توم -بصلة
توابل
فلفل اسمر -شطة -كمون
الطريقة
اقمع البامياواحط عليها مية واغليها غلوتين بس
واصفيها واغسلها واسيبها فى المصفة تصفى ميتها
لو واحدة سالتنى انتى بتغليها ليه ؟
ما تغسليها وخلاص
اجى انا متفتكة وارد عليها واقول
اصل دى الباميا اللى انا عارفاها
ياعينى هههههه فتاكة بقة
اعمل الصلصة بتاعتها
اقطع البصلة مكعبات صغيرة واتبلها فى الزيت
اضيف التوابل كمون وشطة وفلفل اسمر وانزل عليهم بعصير الطماطم
بس انا عايزة اتكلم شوية عن التوابل
انا بحب اشترى التوابل زى ما هى يعنى مش مطحونة
وانقيها واحمصها على نار هاااادية
واطحنها بتعمل ريحة وطعم محصلوش
وبالنسبة للكمون ما احطش منه كتير علشان طعم الاكل مايبقاش مر يا دوب ربع معلقة صغيرة
نرجع لموضوعنا لو عندنا لحمة نقلبها مع البصلة ونسويها فى الصلصة لو مفيش عادى هنعمل بامية برضه
نقطع الفلفلة الخضرا ونحطها فى الصلصة
نحط الباميا فى الصلصة ونقطع منها قرنين بس ونسويها
نحضر التقلية
اقطع كزبرة خضرا وتوم واحط عليهم زيت
واحطهم على النار لغاية ما يبقو مخرشفين
واسيب التقلية تبرد شوية وادقها
واحطها على البامية تغلى معها غلوتين
بس فى حاجة ما احطش تقلية كتير علشان لون البامية
مايبقاش غامق ويارب تعجبكم
مواضيع هذا القسم برعاية
نوران محمد ابو الفتوح نوران محمد ابو الفتوح images/flowersavatars/avatar0032.jpg فتكات رائعة Fatakat 592020 ارض الله واسعة – مصر
سبحان الله و بحمده