اولا ده اول حمل ليا ( الحمد لله )
ومع بداية الحمل اكتشفت وجود ورم ليفي على الجدار الخارجي للرحم ( الحمد لله )
انا بتابع من اول الحمل مع دكتور وكانت كل حاجة مظبوطة الحمد لله بالرغم من ان الدكتور كان قلقني جدا من موضوع الورم والمخاطر والالم اللي ممكن تحصلي بس الحمد لله كله عدا على خير عكس ما كان الدكتور بيقول تماما … لدرجة انه كان رعبني جدااا من الشهر السابع واني ممكن الورم يكبر ويعمل مشاكل ويضغط على الرحم ويزنق البيبي واضطر اولد بدري علشان البيبي مش يتخنق والحمد لله ولا حاجة من اللي قالها حصلت … والحمد لله عدت شهور الحمل عادي زي اي واحدة عادية
المهم انا من النوع اللي بمشي بالنص على كل حاجة بيقول عليها الدكتور بسبب
1- هو الدكتور بتاعي واكيد يعرف اكتر مني
2- زي ما قولتلكوا ده اول حمل ليا يعني معنديش خبرة بالكلام ده
3- وجود الورم الليفي مع كلام الدكتور اللي كان رعبني جدااا
نيجي بقى لاهم الحاجات اللي حصلت معايا اولا في اخر السابع او اول الثامن طلبت منه يكتبلي عن حاجة لترطيب الثدي قبل الولادة قاللي لا وغلط والحاجات دي بتسبب ولادة مبكرة … طبعا انا كالعادة سمعت الكلام ونفذته مع ان كل اللي حواليا وهنا في المدونة نصحوني بالعكس
ده مش مهم اوي وممكن نعديه بس المهم واللي حاسه انه فرق معايا طبعا بعد ارداة ربنا موضوع المشي
دخلت الشهر التاسع ومامتي وكل اللي حواليا نصحوني بالمشي سألته قاللي لااا مشي ايه دي عادات قديمة وبتضر الحامل مش بتفيدها … وطبعا انا كالعادة علم وسينفذ
عدى اسبوع اسبوعين في الشهر التاسع ولا فكر يقول على كشف النسا مع اني عرفت ان كشف النسا المفروض بيكون من اول الشهر التاسع
نيجي بقى للاسبوع الثالث في الشهر التاسع كشف عليا نسا وقاللي ان الحوض عندي كويس ويعدي البيبي والرأس تحت بس للأسف مش نزلت الحوض طبعا انا سألته امشي او اعمل اي حاجة تساعد على نزول الرأس في الحوض قاللي لا هي لو هتنزل هتنزل لوحدها وعلى فكرة انا رأس البيبي نزلت عندي تحت مع اخر الشهر السابع
عدي الاسبوع الثالث والرابع في الشهر التاسع وامبارح كنت عنده وقاللي كده خلاااص انتي اخدتي فرصتك كاملة والرأس لسه فوق واحتمال بسيط انها تنزل … قولتله طيب انا لسه على حسابات الحمل والولادة معايا لغاية يوم 26 في الشهر … وكمان انا الحمد لله كل حاجة عندي وعند البنوتة بخير يعني استنى الاسبوع ده قاللي الاسبوع ده اللي هو الاسبوع الـ 40 بنسميه اسبوع الخطر وانا مش بفضله … وانا لو استنيت هستنى على مسئوليتك وقعد يخوفني لدرجة اني والله كنت قاعدة قصاده مش شايفه ويادوب خرجت من عنده وانهرت من العياط لاني كنت اخدت القرار وقولتله اني هستنى الاسبوع ده كمان يمكن ربنا يسهلها بس بصراحة من جوايا كنت مرعوووبة من كلامه
للمعلومة انا من اخر الاسبوع الثاني في الشهر التاسع رحت لدكتور تاني وبتابع معاه كل اسبوع وهو بصراحة مطمني هو قاللي نفس الكلام اللي الدكتور الاساسي بتاعي قاله بس الفرق انه مش قلقني خالص من موضوع الورم وكمان قاللي انتي معاكي لغاية يوم 26 في الشهر لان دي البكرية وكمان انا حامل في بنت في ساعات كتير الولادة بتتأخر
دلوقت بقى انا مرعوووبة وقلقانة اكون بضر اللي في بطني ومحتاجة رأيكم
تنصحوني استنى ولا لا … مع العلم ان ميعادي مع دكتوري الجديد يوم السبت
وهل الاسبوع الـ 40 ده فعلا بيكون اسبوع خطر
وهل في امل ان رأس البيبي على الاسبوع ده ممكن تتعدل واولد طبيعي
انا اسفة جدااا لو طولت عليكم وياريت بجد تفيدوني لاني بجد ربنا وحده اللي عالم بيا انا عامله ازاي
انا مستنيا ردودكم … وطبعا شكرا مقدما … وجزاكم الله كل خير
وياريت تدعولي بتيسير الاحوال … وان ربنا يتمم حملي على خير … وانه يرزقني ساعة ولادة سهلة
قطقوطة مقطقطة قطقوطة مقطقطة 347201_4.gif سوبر فتكات Fatakat 347201 Cairo – Egypt