ازيكم يا فتوكات
النهاردة معايا طريقة ولا اسهل للريش بتتبيلة ولا اسهل والطعم روووعة
وكمان طريقة للمكرونة البنيي باعملها من زمان ولذيذة جدا
وحبيت اعرفكم على طريقتهم
يلا نبدا
التتبيلة
ملح فلفل بصل بودر زيت زيتون
بس خلاص شفتوا بقة سهلة ازاى بس كمان الطعم خطييير
ساعات كتر المنكهات بيخليكى مش حسة بطعم حاجة خالص والبساطة مافيش
احسن منها
نسيب التتبيلة دى ع الاقل ساعتين وبعدين نشوى الريش فى جريل او مقلاة تفلون
فى اثناء الشوى بندهن الريش بالكاتشاب بيدى لون وطعم حلو
ايه رايكم
وبالهنا
اما مكرونتى بقة
طعمها حكاية
يلا شوفوا
ابشرى 2 او3 طماطم بالمبشرة(بحبها كدة) مع معلقتين صلصة ومعلقة صغيرة سكر
سبيهم يتسبكوا مع ملح وفلفل وزيت بس مش زيت زيتون
اسلقى المكرونة لكن ماتهريهاش فلى السوا
اوعى تغسليها بعد ماتصفيها قلبيها بشوية زيت
هاتى مقلاه او صينية تيفال وحطى فيها شوية زيت عادي مش زيتون
ضيفى 2 او 3 فص ثوم مدقوق
اول ريحتهم ماتطلع ضيفى المكرونة وقلبى وحطى ملح فلفل زعتر
وسيبيها كدة لحد معاد التقديم ابقى ضيفى عليها الصوص اللى عملناه
كدة
طعم الثوم بقة وريحته مع الزعتر والطماطم ….حكاية
وقدميها
وبس كدة ايه رايكم
على فكرة انا عندى بونص ليكوا لو قيمتوا كويس هقولكوا
المشاركة الجاية هتكون ازاى الشيبسى بتاعك يطلع كدة
*
*
*
*
*
*
*
*
*
*
*
سلام بقة يا فتوكات
مواضيع هذا القسم برعاية
ام هاجر و عبد الرحمن ام هاجر و عبد الرحمن images/avatars/peppers.jpg سوبر فتكات Fatakat 423655 دمنهور – مصر