السلام عليكم ورحمة الله وبركاته
ردو السلام طبعا
ازيكم يا احلى فتوكات
هخش في الموضوع علطول
اولا انا كنت في دورة في مستشفى الدمرداش عن الرضاعة الطبيعية
وقررت زي ما انا استفدت على الصعيد الشخصي اني افيدكم معايا
بصو يا فتوكة انتي وهي بقى
دلوقتي الهالة اللي حوالين الحلمة دي بيبقى حواليها مادة دهنية ولون الهالة بيغمق
الموضوع دة ليه اكتر من فايدة
اولا المولود اول ما بيتولد مش بيميز بالالوان خالص غير الابيض والاسود
فالحلمة بتغمق عشان يعرف يميزها و يوصلها
والمادة الدهنية دي عشان يميزك بيها لانها نفس ريحة السائل المحاط بيه طول اشهر الحمل فيطمن
تاني اهمية للمادة الدهنية دي انها بتحفظ الحلمة من التشققات
فحاولو ما تغسلوش منطقة الحلمة والهالة بالصابون لانك كدة بتشيلي المادة دي اللي ابنك بيطمن بيها واللي بتحميكي من التشققات
تاني حاجة برضو عشان تحمي نفسك من التشققات لما تيجي ترضعي لازم يبقى فم البيبي مفتوح خالص بحيث ياخد منطقة الهالة بقدر الامكان لان لو اخد الحلمة بس مش هينزله لبن ويقل لبنك وهيعملك تشققات
طيب رغم كل دة وحصلك تشققات الأفضل من الكريمات والمراهم والاضمن والاحسن تاخدي شوية من لبنك وتدهني بيه منطقة التشققات دة احسن واضمن علاج ليكي ولابنك
واللي برضو استفدته ان احنا ما عندناش ثقافة زيارة عيادات للرضاعة الطبيعية خالص
لازم على كل واحدة حامل تزور دكتورة استشاري رضاعة طبيعية
تفهمها وتوعيها اهمية الرضاعة الطبيعية وتتجنب الاخطاء من اول ساعة الولادة
مهم جدا والله يا بنات وهتفرق معاكي جدا جدا والله
لو اتبسطو قولولي انزلكم بقية المعلومات
فيروزة 22 فيروزة 22 images/flowersavatars/avatar0025.jpg سوبر فتكات Fatakat 144663 القاهرة – مصر