حبايب قلبى
من غير رغى كتير
الطريقة بتاعتى مش منقوله
نقول بسم الله
طريقة عمل الممبار :_
_______________
اولاً : انا هقولكم على الكميات عشان تعرفوا تظبطوا المقدار وماتعملوش خلطة كتيرة على الفاضى
ا كيلو ممبار
5 حبات طماطم
صلصه طماطم جاهزة
3 حبات بصل
فلفل اخضر (حسب الرغبه)
بقدونس وكزبرة وشبت بحوالى 3 جنيه
3 كوبيات رز كبيرة
التوابل
نعناع ناشف
ثانياً : انتى هتجيبى الممبار وياريت تشتريه متنظف وبعدين تنقعيه فى ليمون وملح وتغسليه كويس اوى والافضل تقلبيه تحت الحنفيه عشان يتقلب معاكى بسهوله .
ثالثاً : احلى خلطة تعمليها للممبار انه يكون كله نى فى نى يعنى هتقطعى الخضرة وتقطعى البصل وتقطعى الطماطم مكعبات صغيرة
وتقطعى الفلفل وتقلبى كله فى بعضه وتحطى معاهم الصلصه وملح وفلفل وكمون وكزبرة وشطه وبهارات وزنجبيل والنعناع وتقلبى كله حلو اوى وبعدين تحطى عليهم الرز .
رابعاً : هتحشى الممبار وتراعى انه يكون حشو خفيف خااااااااااالص يعنى الممبار يبئى متبطط فيه الرز مش منفوخ والا هيفرقع فى السلق وتجيبى حله كبيرة وواسعه وتغلى الميه الاول وبعدين تنزلى الممبار فى الميه المغليه وهياخد سوا بالظبط ساعه كامله على نار عاليه وفى اخر خمس دقايق حطيله شوية ملح وبعد كده طلعى الممبار فى مصفى عشان يتهوى ورشى عليه رشة ملح وسيبيه لما يبرد تماماً وبعد كده تسخنى الزيت وتحمريه .
وبالهنا والشفا
مواضيع هذا القسم برعاية
مسلمة غيورة مسلمة غيورة 548636_10.gif برنسيسة فتكات Fatakat 548636 الدمام – السعودية