السلام عليكم ورحمة الله وبركاته
انا جايه النهارده احكيلكو حكاية اختى وتجربتها مع دكتور طارق قرقور حسبنا الله ونعم الوكيل فيه
اولا اختى كانت اتأخرت فى الحمل التانى وعلشان دكتور طارق قرقور تبع الشركه بتاعتهم راحت تابعة معاه لحد ما حصل حمل بس هو اصلا ما فدهاش فى موضوع الحمل وكانت كل مره تروحلو يقولها احنا فى الشهر الكام تقولو يادكتور انا بتابع تبويض علشان احمل وكان بيكشف باهمال جدا بس هى كانت مضطره تروحله علشان تكاليف الدكاتره لحد ماحصل حمل وتابعت معاه الحمل اولا بيدخل كذا واحده مع بعض غير انه قليل الادب جدا وبيقول كلام خارج وده عرفناه من ناس راحتله بعد كده نيجى بقى ليوم الولاده قال لاختى تروح المستشفى اللى هتولد فيها تستناه على الساعه 5 وجه الساعه 11 وانتو عارفين الوقت ده اد ايه بيبقى الواحد متكهرب وخايف وهى هتولد قيصرى ومابدأش العمليه الا لما جمع اربع حالات مع بعض اختى كانت الحاله التالته وبعد ما طلعو البيبي من غرفة العمليات هى قعدت فتره طويله جوا اكتر من اللى كانو قبلها وغير كده مش بيطلع الحاله غير لما جوزها يدخل غرفة العمليات ويقولو راضى الممرضات وياخد منه 200 جنيه وبعدين خلص حالاته ومشى وكتب لها روشته قبلمايمشى اللى فيها الادويه بتاعة العمليه ومجاش شفها لحد ما خرجت نيجى بقى للجرح كانت تعبانه جدا فوق الوصف ويوم ما راحت فكت السلك راحت العياده واخدت دور زيها زي اللى قاعدين مع ان اللى عامله عمليه دى المفروض علطول تدخل علشان مش بتقدر تقعد فكلها السلك وقالها الجرح ملوث وعطاها مرهم بعد يومين تقريبا الغرز فكت والجرح اتفتح راحت لعمى دكتور جراح قالها الجرح ملوث جدا والفتحه كبيره ولسه فيه بواقى سلك متفكش فى الجرح وقالها السلك اللى متخيطه بيه فاااااااااسد وعطاها مضاد حيوى مراهم برضه نيدجى بقى للمصيبه الكبيره بعد السبوع كانت لسه عند امى مروحتش امي داخله تصحيها من النوم الصبح لقيتها مش عارفه تقف على رجليها وبتعيط رفعت لها الفستان اللى كانت لابساها اقسم بالله من صوبع رجلها من تحت لغاية بطنها فى رجل واحده اختى لون رجلها ازررررق على وصف امي لون الطين اتفزعت جدا واتصلت بيا انا كنت فى بيتى قولتلها لازم تاخدوها على المستشفى حالا حطوها على كرسى وشالوها نزلوها وهي بتصرخ من الالم راحت المستشفى كل اللى يشوفها يتخض جدا لحد ما دخلت لدكتور الاوعيه الدمويه الدكتور قال لازم تدخل عنايه مركزه حالا امى قالتله اديها طيب مسكن دى بتتألم قالها مسكن ايه بنتك هيبترو رجلها اختى وامي طبعا سامعو كده كانوا بيموتو ربنا ما يكتبها على حد وفعلا دخلت عنايه مركز وعملولها تحاليل واشاعات لقو عندها جلطات مش جلطه واحده فى رجلها وفى بطنها والسبب الجرح ومنهم جلطه كانت تحت الرئتين ودى كانو خايفين منها جدا لانها لو اتحركت وطلعت على القلب كانت هتموتها قعدت 5 ايام فى العنايه وبعدين نزلوها على غرفه نايمه على السرير من غير ولا حركه ولابسه بامبرز اعزكم الله لانها لو نزلت رجلها الارض الدكتور قالها الجلطه اللى تحت القلب متحركه وممكن تموتى فضلت على الوضع ده 25 يوم طريحة الفراش مش بتتحرك وطبعا بيعطوها ادويه للجلطات اللى عندها بس كانت بتتحسن ببطء شديد بعد 25 يوم الدكتور حدد لها عمليه فلتر على القلب علشان تقدر بس تقوم تدخل الحمام علشان لما تتحرك منخافش على القلب والرئتين من الجلطه القريبه منهم ودخلت يا حبيبتى العمليات تانى والمصيبه انها عملت العمليه من غير بنج تخيلوووو دخلو الفلتر من رقبتها لغاية القلب والممرضات طلعو يحكولنا انهم كانو بيبكو عليها وهى بتصرخ من شدة الالم وخرجت من العمليات على عنايه مركزه تانى قعدت يومين بعد كده طلعت على الغرفه فضلت اسبوع وخرجت من المستشفى كانت اول مره تقف على رجلها من اكتر من شهر وكانها كانت بتتعلم المشى من جديد طبعا طلعت على بيت امى وبتها المولوده كانت طول الفتره دى عندى طبعا مع انى طولت عليكو بس محكتش اد ايه كانت تعبانه ونفسيتها زى الزفت لما تبقى شابه فى التلاتين ومستنيه الموت كل يوم وصعبان عليها ابنها 5 سنين وبنتها الللى لسه مولوده واحنا كنا بنموت كل يوم جنبها وكانت بتقعد تقولى ولادى امانه عندك وهى اختى الوحيده الحمد لله هى دلوقتى بتمشى وروحت بيتها ومعاها ولادها ربنا مايحرمناش منها ولا يحرم ولادها منها طولت عليكم معلش لانى والله نفسى محدش يشوف اللى احنا شوفناه ده تانى ابدااااا
وحسبنا الله ونعم الوكيل فى دكتور طارق قرقور رنا ينتقم منه حسبنا الله ونعم الوكيل
فتوكه نسوئه فتوكه نسوئه 207328_1.gif فتكات هايلة Fatakat 207328 الاسكندريه – مصر