تطورات لصاحبة الموضوع
الله يعافيكي ياااارب،ويخفف عنك
https://fatakat.univanet.com/#4880647
السلام عليكم ورحمة الله
اخواتى حبايب قلبى وحشتونى جدا جدا وبشكركم لدعاءكم العضوة بيتى حياتى كانت عاملة موضوع عشان كلكو تدعولى انا اه خسرت حاجات بس كسبت نفسى لاولادى ولجوزى ربنا يخليهملى
الحمد لله على كل حال
انا هحكلكو حكايتى لانى فعلا اتكتبلى عمر جديد فعلا كنت بودع كل الناس اللى حواليا والحمد لله على كل شئ
انا كنت فالشهر السادس من الحمل من حوالى تلات اسابيع بس دلوقتى مفيش حمل ومفيش رحم كمان وانا عمرى 30 سنه فاول حياتى
انا الحمد لله بفضل الله عندى ولد7سنين وبنت سنتين ونص ربنا يخليهملى من كل شر يارب لانى عمرى مهعوضهم تانى
هحكلكو يابنات
اول يوم فالدراسه قمت الصبح عشان افطر ابنى عشان المدرسه هو فسنه تانيه ابتدائى
المهم يبنات دخلت الحمام كنت مزنوقه جدا حمام مية المهم مفيش حاجة عاوزة تنزل خالص خالص وهموت الميه محبوسة فيا قمت من عالحمام لقيت نقطة دم قلقت اوى واتوضيت وطلعت صليت ومشيت مع ابنى لمدرسته وصلته وانا راجعه لقيت نفسى مش قادرة اتحرك من مكانى اخدت تاكس عالبيت روحت كنت هموت من زنقة الميه فيا دخلت الحمام واتفاجئت انى عملت حمام ميه دم دم ايوة دم
طلعت قولت لجوزى وطلبت الدكتورة قالتلى تعاليلى النهارده رحتلها اتفاجئت بلون البول قالتلى لازم يتعلقلك محاليل فورا وتحللى عينة البول حالا وحولتنى على مستشفى هويدى منهم لله
رحت يابنات المستشفى ودخلونى ركبولى استرة عشان ياخدو عينه يحللوها وفعلا ركبو القسطرة اتملت فثوانى وفرقعت وغرقت انا دم خالص يابنات والله دم دم تقيل جدا
وقمونى وشالو منى القسطرة وطلعونى غرفه عشان يعلقو المحاليل وانا عاوزة اعمل حمام والمية مزنوقه فيا واحاول ادخل الحمام الاقى نقط دم بس اللى بتنزل
كل ده وانا حامل فالشهر السادس وطلبو مننا اننا نروح لدكتور مسالك فعلا مشينا من المستشفى روحنا للدكتور وقال ده التهاب فالمثانه وارجعو الهويدى ركبة قسطرة رجعنا تانى وركبو القسطرة وبعد مركبوها اتسدت ومش بتنزل وانا بصرخ واقول شلوها يقولو احنا ملناش دعوه الدكتور اللى قالكو يجى يسلكها وانا بصرخ المهم جوزى زعق فالمستشفى وقالهم شلوها احنا هنمشى ومشينا وكلمنا الدكتور قال رحو مستشفى المواساة رحنا واحدنا غرفه وجه الدكتور وقال ركبو قسطرة يخرابى يابتات ركبو القسطرة فيا ولا 20 مرة كل ميدخلوها تتسد الدم فالمثانه متجلط اخر متعبو الدكتور قال ركبو قسطرة ثنائى فتحه تدخل محلول وفتحه تخرج الدم والله يابنات شالو من تحت السرير بتاعى ولا 3 جرادل دم نزفت جامد اووى ولا حد عارف من ايه
فضلت يومين كده وبعدين قال اخرجى بقى البول كويس
طلعت بس مش بعرف اقعد عالحمام اعمل ميه نهائى كنت بلبس بامبرز كبير وبرده البول دم وفضلت يومين كده وروحنا للدكتور قال لازم تنقلو لها دم 3 اكياس والفرق بينهم 6 ساعات
والدم نازل برده ولازم اخد مسكن عشان البول الدم ده بيزل بالم فظيع
لحد مناس قالونا على دكتور اسمه محمد ابو فرحه الله يباركله رحوناله قال روحو حالا اعملو اشعه عند دكتور بره واعملو تحاليل وتعالولى
روحنا عملنا الاشعه وبنسال دكتور الاشعه السبب قال المشيمة المشيمة هى السبب
اهم حاجة هى وكررها مرتين
المهم اخدنا الاشعه وروحنا عالدكتور قال لازم تدخلى المستشفى فورا وتعملى منظار بس انا مسافر مؤتمر مش هاجى الا بعد تلات ايام ولو فضلتى كده هاجى مش هلاقيكى لان جوه عندك نزيف فكل حته ورشحلنا دكتور اسمه علاء شعبان رئيس قسم المسالك بجامعة المنيا ربنا يخليه لاولاده فضلت اعيط خفت اووى وفى جنين فبطنى كمان روحنا فعلا واتحجزت فالمستشفى عشان اعمل المنظار تانى يوم بس يابنات بقى الليل بقى اصوت واعيط من الالم والدم نازل خالص اااه اتعذبت شفت عذاب محدش شافهلحد الفجر وماما معايا واصوت وجوزى جه واخوه والمستشفى يدونى فمسكنات مفيش فايده لحد الساعه 9 الصبح جابولى مورفين 2سم وادهولى عشان اهدى شوية وارتاح فعلا نيمونى عالسرير وخدونى للعمليات وعملت المنظار ولقو فالمثانه 3 كيلو دم متجلط وطلعت بقول يارب ارتاح بقى من الالم وكانو مركبلى قسطرة ثنائى بمحلول برده عشان تغسل جوه وتطلع الدم اتبهدلت اوى يابنات فنفس اليوم مكنتش حاسة باى حركة للجنين وبطنى حجرت خالص مكنتش طايقه لبسى على بطنى وبقيت اصرخ نزلز بقى مش عوزاه تعبانه فضلت لتانى يوم عالحال ده والالم ده
جابو السونار فغرفتى عشان خلاص بقى هدخل العمليات وهينزلو الجنين عمل السونار وسمعتهم بيكلمو بعض وبيقولو مفيش نبض للجنين قولتلهم ارحمونى وخلصونى
وفعلا بعد صلاة الجمعه دخلت العمليات وقعدت فيها ساعتين ونص دكتور النسا موجود ودكتور المسالك موجود ودكتور جراحه ودكتور نسا كمان
وطلعت على العناية المركزة قعدت فيها تلات ايام وبعدين نزلونى غرفتى وطبعا الجنين توفى
والمفجأة انهم شالو الرحم كمان لانهم لو كانو سابوه كان هينزف ويحصل تسمم ده غير انهم لقو فبطنى اربعه لتر دم ماسورة مفتوحه محدش كان راضى يقولى انهم شالو الرحم بس انا عرفت واتاكدت
ونقلولى فاليومين دول 13 كيس دم لان الانيميا كانت 5 والان 7 ادعولى
وبعد كل ده تشخيص الحاله ايه
ان السبب المشيمة من النوع النادر جدا اتكونت تحت وانغرست فالمثانه والرحم شبكتهم ببعض وخرمتهم المثانه بتنزف والرحم بينزف
وقالو ان من الممكن الدكتورة تعرف كل ده اول شهور الحمل وتنزل الحمل الله يسامحها الدكتورة اللى كنت بروحلها ولو كان الحمل كمل كان الجنين بس اللى بيعيش والام بتموت لازم
انا والده قبل كده مرتين قيصرى وكانو عاديين جدا
نصيبى وقدرى الحمدلله
انا خرجت من المستشفى من عشر ايام وانا فبيتى الان اللى عوزاه منكو تدعولى ان الالم يقل لانى شبعت الم وعذاب
الم الجرح تعبنى جدا مع ان عدى ايام كتير الدكتور قال اصبرى انتى اللى شوفتيه شوية تلات عمليات فى يومين البنج خدته يومين ورا بعض بنج كلى
ادعولى بالصبر وراحة البال لان نفسيتى زفت زفت زفت
الحمد لله
ارجو من الادارة تثبيت الموضوع لانى احتاج الدعاء من اخواتى
يارب اقبل توبتى يارب اقبل توبتى 566432_3.gif فتكات رائعة Fatakat 566432 طنطا – القاهرة