السلام عليكم ورحمة الله وبركاته
ازيك ياقمرات وحشتووووني
انا جاية افرحكم باجمل حاجة عرفتها فحياتي
وعايزة احكيلكم حكايتي الصغننه يمكن تكون سبب في انها تدي امل للمشتاقات ومييأسوش من رحمة ربنا
انا يابنات متجوزه بقالي سنه ونص…اتجوزت وانا في بكالريوس وكليتي صعبة اوي وعمليه
وخفت لو حملت اول الجواز اني اولد في امتحانات اخر السنه…او كده الشيطان كان مصورلي
غلطت غلطة عمري والله ندمانة عليها جدا
اخدت حبوب منع الحمل اول 6 شهور جواز
ههههههههههههههههه كنت فاكره اني سوبر وومان هبطل الحباية من هنا والاقي الحمل تاني شهر على طول
الحمد لله ربنا له حكمة في كل شيء ربنا اراد انه يوريني ان مينفعش نقول للنعمة لا ولا للرزق
مش الانسان اللي هيتحكم في رزقه
انا كده بقالي بالظبط سنه من ساعة اخر شريط جينيرا
مانكرش اول 3 شهور من بعد الحبوب ماكانش فارق معايا اوي بس بعد كده ابتديت اتضايق لما البريود تيجي
لحد ماقررت من شهرين اني اروح لدكتور
عملت تحاليل هرمونات طلعت كويسة الحمد لله…عملت سونار
التبويض كويس وحجم البويضة حلو بس المفاجأة
انا طلع عندي كيس على المبيض الشمال تقريبا كيس دم متجلط او ميه حاجه اسمها
Ovarian chocolate cyst هيه حاجه حميده
وده اللي الدكتور أكده وقالي انها مش بتأثر على الحمل وممكن تصغر من نفسها وعادي بتحصل كتير
طبعا اتصدمت بس اللي طمني ان الدكتور كتبلي على حقنتين كروميرون قلت يبقى فعلا مش بتأثر
وخصوصا ان الكيس صغير مش كبير
و محصلش حمل وطبعا زعلت جدا تعبت وقلت يبقى اكيد الكيس هوه السبب
رحتله الشهر ده ده على اليوم ال12…والتبويض كويس برضو بس الصدمة ان
الكيس مصغرش
وكتبلي برضو نفس الحقنه وقالي لو محصلش حمل هندخل نشيلها بالمنظار!!!!
انا سمعت الكلميه دي وعملت كده
طبعا لا تتخيلو نفسيتي لما طلعت…وجوزي طبيب اصلا وقعد يهدي فيا ويابنتي ماتقلقيش
ده المنظار بسيط جدا…ده مفهوش فتح بطن…وانا قعدت اعيط عياط هيستيري
كان يوم مايعلم بيه الا ربنا حسيت ان كل حاجه اسودت في وشي وفعلا اقتنعت اني عمري ماهحمل
وقلت لجوزي انا مش واخده الحقنه مش فارقه..قالي لا بصي خديها احنا مش خسرانين حاجه
وبراحتنا بقى وقت مانعوز قلتله ماشي واخدتها
وفعلا من كتر منا كنت فاقده الامل مفكرتش وماشغلتش بالي وقلت كده كده البريود جايه وهعمل العميلة
فاكس بقى من الحمل الشهر ده وعشت حياتي عادي
المهم البريود اتاخرت يوم…وكان بقالها 4 ايام بطني توجعني اوييي ومينزلش حاجه
دماغي وزتني وانا في الصيدلية اجيب تحليل الحمل قلت يلا اهو اسلي نفسي شويه
التحليل بتاع البول ده بيفكرني اوي بمعمل البيولوجي ايام الكلية
والله يابنات من غير مبالغة كنت بعمله وانا بضحك واول مره اكون مش متوتره
لاني كنت متاكده انه هيطلع سالب…اعراض البريود كلها موجوده ومغص
شديييد زي بتاع البريرود بالظبط
والمفااااااجأه
أن أن أن آآآآآآآآآآآآآآآ
الاقي خطين طلعو بسرعه في ثواني
اده مين فييييين….انا شكلي حوله ولا ايه
احطه تحت اللمبه الاقيهم خطين
رحت الاوضه برضو خطين..افتح عيني واقفلهم
المهم رسيت على ان التيست ده بيخرف وخساره فيه ال8 جنيه
من هنا لهنا على مافقت من الصدمه يابنات واقتنعت ان همه خطين الحمد لله ربي لك الحمد والشكر
كنت بترعش من الفرحه وقعدت اعيط وكلمت جوزي فرحته وكان طااااير
ومش مصدق نفسه (كنا متخانقين خناقة كبيره والحمد لله
طبعا نسينا كل الزعل بالخبر ده) وصليت ركعتين شكر لله ونزلت عملت تحليل دم واتاكدت الحمد لله
وفرحت اهلي واهل جوزي…احساس جميل اوي ربنا مايحرم اي واحده منه ياااارب
متيأسوش يابنات من رحمة ربنا اعرفي ان بعد العسر يسر
امبارح كان اجمل يوم فحياتي بعد ماحسيت ان الدنياا سوده فوشي
ويابنات الصدقة يابنات سحرررر…واعملي خير..كل انواع الخير ساعدي اليتامى
اشتري ادوية للمرضى
والدعاء طبعا اوعي تيأسي من رحمة الله
والله يابنات اي واحده كنت بلاقيها في المدونة بتطلب الدعاء بالذرية كنت بدعيلها
مش شرط اكتبلها رد..ادعو لبعضكم يابنات الدعاء بظهر العيب سحححر
ادوعلي ربنا يتمم حملي على خير ويثبته ويرقني طفل سليم معافى من كل شر
ربنا يرزق كل مشتاقه الذرية الصالحه يارب العالمين ويفرح قلوبكم كلكم يارب
وكل واحده تيجي تفرحنا ونباركلها
يلا عايزة زغروطتين حلويييييين
Zooba Zooba 268420_3.gif سوبر فتكات Fatakat 268420 القاهرة – مصر