@ ๑ أنا بكبوظة بكبوظة ..بس برجيمى الصحى هخس وأبقى مووزة ๑ @ 2024.

فتوكاتى الحبيبات رشيقات المستقبل وحشتونى قوووووى ازيكم يا موزززز ..
طبعا كلنا بنلطم ونسوط من التخن وسنينه السوده ونفسيتنا بقت فى الارض بسببه
وياما خسينا ورجعنا تخنا تانى اكتررررررررر من الاول وانا على رأس القائمة ديه انا خبررررة فى كل انواع الريجيم و التخسيس ياما عملت ريجيمات مختلفة وكل شويه اخس واتخن واخس واتخن لدرجة انى خسيت قبل كده فى فترة من فترات حياتى اكتر من 30 كيلو ورجعت تخنتهم تانى عااااااااا
واول ما بنقول يا رجيم وناخد قرار نخس بناكل اكترررر من الاول ونتخن اكترررر..
اخويا بيقولى يا اسماء بلاش تقولى تانى كلمة دايت اول مابسمعها بسم الله ماشاء الله بلاقيكى بتفرشى اكتررر كل يووووم (ظالم ظالم )
اول لما بناخد القرار الرهيب اننا نعمل الريجيم بنبقى عاملين زى الولية المسخرررة ديه

فلازم المرة ديه ان شاء الله تبقى اخر رحلة لينا مع التخن بقى عشان نعرف نعيش حياتنا صح ونفرح بجسمنا وجمالنا بقى
وانا اكتشفت خلال رحلتى الطويلة جدااا مع التخسيس والتخن ان التشجيع والمشاركة الجماعية بتفرق قوووى مع الواحد
فكل اللى هيعملوا الريجيم معايا ان شاء الله لازم يدخلوا كل يوم عشان نتابع بعض ..
وانا هكتبلكم دلوقتى اول اسبوع من ريجيماتى الرااائعة المتجربة بتاعتى لما كنت بروح ل د.عبد العزيز حجازى وانا كنت روحتله انا وبنت عمى وحبيبتى روحنا تقريبا شهرين ونص او ثلاث شهور وخسيت 18 كيلو وعايزة اقولكم خسيت بصحة جدااا وبدون حرماااان وحتى لما سبته وسبت الريجيم ولخبطت والله كنت بتخن ببطىء جدااا ..
كفاية رغى بقى يالا الى الفعل يا بناتيت ..

.. ريجيم الاسبوع الاول ..

أولا :وجبة الفطور

ربع رغيف بلدى + طبق فول صغير ( 5 ملاعق ) بدون سمن او زيت
أو ربع رغيف بلدى + بيضة مسلوقة
أو ربع رغيف بلدى + قطعة جبنة قريش متوسطة
أو 2 ثمرة فاكهة
+ كوب شاى (معلقة سكر واحدة ) أو شاى بحليب (بدون سكر)

ثانيا: وجبة الغذاء

النشويات :

نصف رغيف بلدى
او 6 ملاعق أرز
او 6 ملاعق مكرونة

الخضروات:
طبق خضار سوتيه
أو شوربة خضار (بدون بطاطس ) وتعمل بماء او مرقة بدون وش
+ طبق سلطة خضراء ( أى كمية )

اللحوم:
1-2 شريحة لحم ( مسلوق او مشوى )
أو ربع فرخة مسلوقة او مشوية (بدون جلد)
أو 3 سمكات متوسطة الحجم (مشوية او سنجارى فى الفرن )
أو تونة مصفاة ( تشطف بالخل والليمون )
أو 2 بيضة مسلوقة

الفاكهة:
ثمرة واحدة متوسطة الحجم ( اى نوع فاكهة مسموح )

ثالثا: وجبة العشاء

كوب زبادى وسط وممكن اضافة ردة عليه
أو كوب حليب بدون سكر
أو قطعة جبنة قريش متوسطة + خيار + طماطم
+ 2 ثمرة فاكهة متوسطة الحجم

.. الممنوعات ..

غير المكتوب ممنوع
ولكن يجب التركيز فى الممنوعات على الاتى :

جميع الحلويات ( بما فيه اللبان ) ماعدا ترايدنت sugarless
اللب والفول سوادنى واى مكسرات
الشطة والحوادق ( المخللات)
القهوة والمياه الغازية (بجميع انواعها) ماعدا الدايت
بعض الفواكه مثل :البلح – التين – القصب – المانجو – العنب – جوز الهند
اللحوم الدسمة والكبدة والكلاوى والبسطرمة واللانشون
القلقاس والبسلة والبطاطس والفاصوليا الناشفة واللوبيا الناشفة
البقوليات فيماعدا (الفول )
الحمام – البط -الوز – الديك الرومى

..نصائح هامة جدااااا اثناء الريجيم ..

الالتزام التام بشرب 2 كوب ماء قبل كل وجبة (ضرورى شرب 1.5 لتر ماء على الاقل يوميا )
قياس الوزن بيكون مرة واحدة بس اخر الاسبوع (فى نهاية الدايت ) وبيكون بنفس الميزان ونفس الملابس
محاولة الاستغناء عن السكر واستبداله ب ( سكر الفواكه الفركتوز ) وهو بيتباع فى المحلات والصيدليات وبلاش الدايت سويت لانه خطر جداا على المدى الطويل ..
اخذ فيتامين (أ) اقراص وهو ضرورى جدااا اثناء الريجيم لصحة الشعر والجلد ( فى الصيدلية اسمه A -VITON ) وهو سعره ب 2جنيه
اخذ فيتامين ومقوى عام للجسم ومجدد للدم عشان التعب والارهاق والدوخة اللى بتيجى للبعض اثناء الريجيم والملتى فيتامين اسمه اللى جربته( فيتافيرول ) والدكتورة كانت كتبتهولى وهو حلو قوووى مش بيتخن خالص وب 12 جنيه..

.. مكملات غذائية مساعدة فى التخسيس لتسريع معدل حرق الدهون ..

(كروماكس) مكمل غذائى حلو قووى جربته و بيتاخد يوميا ،قرص قبل كل وجبة بنص ساعة او ساعة 3 مرات فى اليوم ولازم نشرب معاه ماء كتييير والعلبة ب 48 جنيه
( هاى كروم ) حلووو زى كروماكس لان اى حاجة فيها كروميوم مفيدة فى التخسيس
(فاتاشى ) انا مجربتوش بس البنات بتشكر فيه جداااا
( اقراص الشاى الاخضر) حلوووة جدااا بتتاخد يوميا قرصين قبل الفطار بنص ساعة او ساعة والعلبة ب 30 جنيه

.. لسد الشهية ..

(جريبكسون )للتخسيس وسد الشهية حلوو جدااا وبيساعد للى بيجوعوا بسرعة بيتاخد كل يوم 2 قرص بعد الافطار او قبل الغذاء والعلبة ب 46 جنيه

( جيرما فروتى ) ممتازززز جدااا علشان تسد شهيتك ومجرب من واحدة صحبتى وهو عبارة عن بودرة طعمها حلووو و طريقته بيتاخد معلقتين كبار مع 2 كوب ماء قبل الاكل بساعة او نص ساعة والعلبة ب 28 جنيه

اقراص الردة ( بران ) مفيدة وبتتاخد قبل الاكل بساعة قرصين وتشربى بعدهم 3 كوب ماء عشان تنفش فى المعدة والعلبة رخيصة ومش فاكرة بكام للاسف

وصفة طبيعية من العطار ( بذور الرجلة ) لونها اسود وبتتاخد معلقة كبيرة تسف ب 2 كوب ماء

.. مشروب التخسيس الحارق للدهون ..

بعد الاكل خليط من ( جنزبيل + قرفة + كمون + شاى اخضر + عصير ليمونة ) بكميات متساوية
لو اكلتى وجبة دسمة ولخبطتى اشربى بعدها علطول المشروب ده ( شمر + حرجل ) بكميات متساوية

..وصفة لعلاج ( الغازات ) انتفاخ القولون والامساك ..

الدكتورة كانت كتبهالى وهو عصير ( كرفس + بقدونس )
الطريقة : حزمة كرفس + حزمة بقدونس يغلى على لتر ماء لمدة 10 دقائق ، ثم يصفى ويحفظ فى الثلاجة ويشرب منه كوب قبل الاكل ب نصف ساعة ( 3 مرات يوميا ) حتى يزول الامساك والغازات التى تحدث احيانا بسبب الريجيم

..ممارسة الرياضة ..

لازم لازم لازم مع اى دايت يبقى فى اى حركة (مشى او رياضة) عشان نحقق نتيجة ممتازة وسريعة فى التخسيس ان شاء الله ..
واقل حاجة مشى نصف ساعة كل يوم حتى لو مشى فى المكان وانتم فى بيتكم..
واللى عندها مشاية او عجلة ثابتة او اوربتراك تعمل كل يوم نص ساعة اقل حاجة ..
وفى رقصة حلوة قوووى بيقولوا بتخسس جدااا اسمها الزومبا وتمارين اسمها ال 5 ميل و ديه لينكة صاحبتى الموضوعين اللى جربوه العضوتين القمرتين emeeey و nannoo88

تجربتــــــي مع أجمل وأكتر رياضة ممتعة في الدنيا $_ Zumba _$

تمارين ال 5 ميل

.. لينكات هاااامة جدااااا ..

بعد اذن صاحبات المواضيع اخواتنا الحبيبات بارك الله فيهن جميعااا

فوائد الماء فى الريجيم

نصائح هامة قبل ممارسة الرياضة

السعرات الحرارية للاطعمة

11 نصيحة للتخلص من الكرش

احسبى سعراتك حسب وزنك (للى عامل رجيم)

نصائح هامه للدكتورة سمر العمريطي للتخسيس

10 نصائح لفقدان وزن سريع و فعال

ملحوظة هامة :

وانا بعمل الريجيمات ده انا كنت بصراحة بزود فى الكميات يعنى لو الدكتور كاتبلى 2 توست ريجيم كنت باكل 4 توستات او كاتبلى ربع فرخة ساعات كنت باكل نص فرخة ( وحش ) كنت احيانا بزود فى كمية الاكل ( اكل الريجيم ) لكن لا يجوز ابداااا الخروج عن اكل الريجيم نفسه واكل اى ممنوعات وكنت بتمشى كل يوم بحد ادنى نص ساعة والله كنت بخس كل اسبوع 3 كيلو ..
ومهم جدااااااااااااا فوق ماتتخيلوا شرب الماء كتييير ( خلوا بطنكم حوض سمك متنقل )

.. الواجب اليومى (التقرير) ..

كل المشتركات معايا لازم تدخلوا كل يوم (بليل) تكتبوا هنا تقريركم اليومى الكامل عن :
الاكل اللى اكلتوه + شرب الماء + مشروب التخسيس + ممارسة الرياضة
وممنوع منعا بااااااااااااااتا اللخبطة والعك يأمن هتتنفخوا (:

هنبدأ الريجيم ان شاء الله من بكرة (اول الشهر) يوم الجمعة 132015

اللى عايزة تشترك معانا تقول اسمها ووزنها ( لو مش عايزة تقول وزنها منعا للاحراج مفيش مشكلة ) بس لازم تقول ناقصلها كام كيلو عايزة تنزلهم عشان توصل للوزن اللى بتتمناه .. والوزن على الميزان هيكون نهاية كل اسبوع يوم الجمعة الصبح ولو كنا ماشيين كويس وخسينا هناخد الفرى وجبة الغذاء فقط ..
ولو عكينا وتوحشنا فى الاكل ومنزلناش فى اى اسبوع مش هناخد فرررى وهندخل على الاسبوع اللى بعده علطووول ..

وكل اسبوع لما نخلصه على خيير ان شاء الله هنزلكم دايت الاسبوع اللى بعده وهكذا ..

انا عن نفسى مش هقول وزنى دلوقتى خااالاص ( انا فوق ال 100 ) معلش اعذرونى الفترة ديه بس انا هقول انا عايزة اخس كام كيلو ..
انا اسمى اسماء و قدامى 40 كيلو عايزة انزلهم ..وربنا معانا كلنا ياااارب نخس بقى
وعندى عجلة ثابتة هلعب عليها ان شاء الله كل يوم مرتين ..مرة الصبح ومرة بليل
وهبقى احاول اعمل الزومبا بأذن الله ..

وان شاء الله نخس كلنا ونبقى موووز زى البت المووزة اللى فى يمين الصورة ديه ونفتخر بجمال جسمنا ورشاقتنا وصحتنا تبقى كويسة بس لازم نستحمل ونجاهد طفاستنا لحد ما نخس ومشوار الالف ميل يبدأ بخطوة وهنبدأها مع بعض من بكرة ان شاء الله ..
وطول مافيك نفس ..لازم يكون عندك امل
واهلا بأى فتوكة تحب تنضم لينا وانا هدخل كل يوم ان شاء الله عشان نتابع بعض دايما لاتقلقوا معاااا حتى نقهر التخن والبقلظة للابد و ياااااااااااااااارب كلنا نخس بصحة وبسرعة ونبقى قمرااات موووز ونستمتع بقى بحياتنا ياااارب

حبيباتى رشيقات المستقبل بالله عليكن لو عجبكم الموضوع لا تنسوا التقيييم والله تعبت جدااا فى الموضوع ده..

جزاااااااااااااااااكم الله خيييرا حبيباتى ..
بحبكم فى الله جداااااااااااااااا حبيباتى



bondo2a bondo2a 15793_2.gif سوبر فتكات Fatakat 15793 القاهرة – مصر

سبحان الله و بحمده