سلااااام عليكم
ازيكم يا أحلى عراايس
انا أخيراااااا هعمل فستان فرحي عند المصنع بتاعة الوكالة اللي قولتلكوا عليييه
اكيد في بنات كتير مشافوش ردي في موضوع مصانع الفساتين فهحكيلكوا الموضوع من الأول
كان في موضوع بنتكلم فيه عن مصانع فساتين الافراح فانا حكيت للبنات اني مرة كنت في الوكالة بشوف قماش وكده لقيت محل فساتين فسألتهم بتفصلوا ولالا لأني طبعا مش لاقية الاستايل اللي انا عايزه خالص اغلب الموجود دلوقتي سوري وانا مبحبش التطريز الاوفر ده وكمان على كده وغالي وانا اخري في الفستان الف ونص ومستحرمة الالف ونص في ايجار كمان والاستايلات اللي انا عايزاها ايجارها وشراها غالي جداااااااا
المهم الراجل قاللي اه بنفصل واداني كارت قاللي خدي ده عنوان المصنع بتاعنا وفعلا روحت كان هناك برضه في الوكالة
مكان قديم جدا ومتتخيلوش انه يطلع منه الفساتين الرووووعة دي المهم قابلت الراجل صاحب المكان قاللي انا بعمل الاستايلات اللي انتي عايزاها دي بس بالطلب وبذات للاتيليهات الكبيرة ولو عايزة احطلك ع الفستان كمان تكت انه مستورد احطلك (شايفين واثق من شغله ازاي) وقاللي محنا بنعمل كده كتير مع محلات كبيرة لأن الاستيراد بيكلف شحن جامد بس بصراحة بنعمله بأقمشة وخامات جامدة وغالية فعلا ومستوردة عشان ميفرقش عن المستورد
ووراني فستانين كانو بيتشطبو عشان رايحين اتيليهات بجد يا بنات وهممممممممم مفيهمش غلطة وكانوا الاستايل الاوروبي السيمبل ده تحفة بجد و وراني التكت كمان عليهم
المهم قاللي انا كده كده باخد تفصيل 600 والأقمشة بقى حسب
الكلام ده كان من شهور وبعدين مروحتش تاني حاولت ادور في كذا مكان قولت يبقوا اقرب شوية او اشوف لو في ايجار كويس طبعا فشلت اني الاقي اللي انا عايزاه ولما قربنا نحدد معاد للفرح روحتله فعلا يوم الاربع اللي فات وبرضه كان عنده فستان رايح اتيليه هوريكو صورته معلش الصور وحشة لأنها من الموبايل وكمان الفستان كان صغير عليا فمسكته بس كده عشان اوريهولكوا لأني بجد عانيت اوي من موضوع الفساتين وزي مربنا كرمني وحللي المشكلة دي كان لازم اقولكوا كلكوا
بس بالله عليكو محدش ياخد الصور دي كوبي عشان انا اللي فيهم
المهم الفستان ده لقيت عليه تكت صنع في الصين وقاللي اصله رايح لاتيليه صاحبته مأجراه على أنه هاي كوبي لبرونوفياس وجاي من الصين
المهم بصو الفستان الأصلي بتاع برونوفياس
طبعا انا كنت عايزة استنى لما يخلص الفستان واعمل موضوع لكن بنات كتير سألوني فقولت اعمل موضوع من دلوقتي عشان تدعوووولي يطلع حلو علياااا وتدعولي ربنا ييسرلي أموري ويوسع رزقنا ويرزقنا بالذرية الصالحة وكل الدعوات اللي تعجبكوا بقى
بصوا ده الفستان اللي انا اخترته
هو زي مقولتلكوا قاللي باخد كده كده 600
فستاني انا قاللي احسن نوع ستان ليه نوع كده كان ب 40 جنيه طبعا بسعر الجملة فقولتله لا ينفع يكون اقل شوية وراني كذا نوع اقل واختارنا النوع المناسب للفستان والنوع المناسب ليا في السعر والمتر كان ب 20 وهاخده من عنده لكن المطرز قاللي انتي هاتيه وقاللي على كذا مكان وقاللي الاسعار اللي من الاخر وقاللي ممكن تجيبي اتنين متر بس بدل 4 ونفرغ الوردات على تل فتدينا 4 متر لأن طبعا الماش المطرز غالي
يعني كده قماش فستاني هيتكلف مابين 500 ل 800 حسب القماش المطرز
بصراحة راجل كويس جدا ربنا يهديه للاسلام وبيشوف معاكي كل الحلول المناسبة لامكانياتك ويقولك افكار كتيير
المهم اوعو تنسوا الدعوات بقى انه يطلع حلو عليا وكلل الدعوات
وعايزة اخد رأيكو في البوليرو انا طبعا مش عايزة البس بادي ولو عملت بوليرو تل هيبقى شفاف حتى لو طبقتين ولو لبست تحتيه بادي هيبقى برضه كأني لابسة بادي في بنات اقترحوا عليا اعمل طبقة ليكرا تحت الطبتين التل وانا بفكر اعمل بوليرو واسع اصلا كمام منفوشة يعني
فياريت تساعدوني بارائكم وربنا يكرمنا جميعا وييسرلنا أمورنا
nanono nanono فتكات رائعة Fatakat 159632 القاهرة – مصر