مساء الفل عليكو يا بنات
أنا عملت سلطة بسباس وطلعت الحمد لله جميله جداً ، أنا عايشة بره مصر وكنت أول مرة أشوفه فى السوبر ماركت جبت واحده وخليتها عندى ، جوزى قال لى هتعملى بيها إيه ده طعمه زى الربسوس بالظبط الحقيقه إن طعمه كده فعلاً بس قيمته الغذائيه عاليه ، الحمد لله عملتله دريسنج طلع حلو قوى هاقولكم الأول على مكونات السلطه وبعدين الدريسنج ، بجد جربوها طعمها طلع حلو قوى ممكن يمشى مع البيتزا او المشويات (هو ساور آند سويت) وكمان مغذيه قوى
المكونات :
بسباس مسلوق لمدة 5 دقايق فقط على النار (حوالى نص واحده)
خس + بصل متقطع شرايح رفيعه (على فكره البصل مهم جداً وإداها طعم حلو قوى برضه حوالى نص بصله
+ مشروم برضه مسلوق فى الميه حوالى دقيقتين فقط + كاجو للتزيين (ممكن تحمصى عيش وتحطيه)
الدريسنج :
– 2 ملعقة كبيره مايونيز
– 1 ملعقه كبيره خل تفاح (حطى نص ملعقة خل عادى لو مش عندك خل نفاح)
– نص ملعقه كبيرة عسل أبيض
– نص ملعقه كبيره كاتشب
– 2-3 ملعقه كبيره من مية السلق بتاعة البسباس (فيها كل الفيتامينات وهتخفف الصوص شويه)
– شوية زيت زيتون
ياللا جربوها ، أكله صحيه ومفيده وسهله وبألف هنا – مستنيه ردودكم مواضيع هذا القسم برعاية
Trendy Trendy فتكات متميزة Fatakat 799321 تونس – تونس