ازيكو يا عرايس يا حلوين
انا جايه اقولكو تجربتى فى شرا الجهاز
انا كنت عامله موضوع عن اسعار حاجات جبتها من التوحيد والنور
وجبتها وكنت فرحانه اوى
الاسبوع ده نزلت عشان اكمل الحاجات
كنت عاوزه اشترى الصينى والبيركس والاركوبال
نزلت امبارح حمام التلات
لقيت اشكال صينى كتير اوى
البياعين قعدو يطلعولى اطقم من الكراتين وقالولى دى انضف حاجه دى فتحى محمود مصرى المانى وبجد كلامنجيه اوى الناس دى
اختى الكبيره ربنا يخليهالى كانت معايا قالتلى يا شوشو ده مش حلو وتقفيله وحش وكمان زوقه منتشر اوى
الراجل قالنا الطقم ب 1850 وعشان خاطركو ب 1450 ولو روحتو المعرض بتاع فتحى محمود هتلاقو الاسعار اغلى من كده
اختى قالتلى لا ده ميستاهلش احنا نروح بكره المعرض ونشوف (المعرض فى وسط البلد)
وكملنا لف فى حمام التلات جبنا البايركس الفرنساوى والاركوبال
تانى يو اللى هو النهارده روحت عند معرض فتحى محمود لقيت نفس الصينى اللى الراجل كان عاوز يبيعهولنا فى حمام التلات ب 1450 لقيته فى المعرض ب 1050 واللى فى المعرض انضف كمان بس بردو الاشكال هى هى المنتشره
نيجى بقى للمهم
اخويا قاللى فى محل اسمه شارع عبد العزيز (المحل اسمه كده)ده فى مدينة نصر خلف سور النادى الاهلى
المحل فيه كل حاجه
روحناه والله يا جماعه انبهرت
المحل نضيف جدا واسعاره ارخص من التوحيد والنور وحمام التلات بكتير
والحاجات نضيفه وعلى مستوى
وكل الازواق موجوده
انا ندمت انى جبت حاجه من حمام التلات والتوحيد والنور لان الحاجه هناك انضف وارخص
والله نصيحه منى لاى عروسه روحيه وهاتى حاجتك من هناك
انا هكمل حاجتى من هناك ان شاء الله
ولو عاوزين تعرفو انا جبت ايه من هناك وبكام عنيا ليكو
اسفه لو طولت عليكو بس حبيت افيدكو عشان محدش يغلط غلطتى
وربنا يتمم لكل العرايس على خير
وعايزه منكو دعوه حلوه ليا بتعجيل زواجى
اى استفسار انا موجوده
الاسعار فى الرابط الجاى
https://forums.fatakat.com/showpost.p…6&postcount=75
loveloveta loveloveta 250170_3.gif فتكات هايلة Fatakat 250170 القاهره – مصر