السلام عليكم يا قمرات يارب تكونو بخيييييير
الوصفات النهارده ما شاء الله يارب تعجبكم وهي من اعز الوصفات علي قلبي زيكم كده بالظبط
كمان قررت انزلها ل الفتوكات اللي بيحتارو ل الغدا او العشا
واسئله الفتوكات خطيبي جاي اعمل ايه زهقانه من الاكل اعمل ايه زوجي جاي اعمل ايه
ال يعني انا هاقولكم تعملو ايه هههههههههه
دي بعض وصفات الدجاج وكلها بالصدور وان شاء الرحمن يكون فيه موضوع تاني تكمله ده المتاح حاليا
نقول بسم الله
الوصفه الاولي
فيليه الدجاج بالتوم والميراميه
الوصفه التانيه من المطعم الصيني رويال ماندرين اخدت الوصفه وانا بتعشي بره وطبقتها قي البيت
الوصفه التالته باستا بكرات اللحم او الدجاج الاتنين حلوين
الوصفه الرابعه والاخيره باستا روماواي بالدجاج وممكن تستبدلي الصدور بالجمبري برده اخدتها وانا بتعشي بره ونفذتها في البيت
انا مصورتش خطوات بس الصور النهائيه الموضوع سهل يعني ان شاء الله
الاول فيليه الدجاج بالميراميه والتوم
هانجيب الفيليه نتبله بتوم مهروس ميراميه زعتر جاف ليمون ملح فلفل صويا صوص وزيت زيتون وسيبهم شويه بالتلاجه
نجيب طاسه سخنه اوي ونسفع الفيليه من كل الجوانب وتكون طاسه مانعه ل الالتصاق
ونقلب علي الجهتين هيه من نفسها هاتنزل الصوص بتاعها غطيها شويه ومش بنزودها ميه وده شكلها النهائي
وممكن تقديمها مع الخبز وطبعا تضيفي اي اضافات تحبيها من الخس والطماطم وو البصل
الوصفه التانيه دجاج مع خضار ودي وصفه صيني تشاينيز
اولا الرز علشان اتسالت فيه كتير
ساعات اغسله وساعات لاء
اهمىشئ الرز يكون معروف ميكونش اي نوع علشان تعرفي معياره كويس
الرز الامريكي حبته مبتطولش اوي زي المزه او الكلاسيك الامريكي تلاقي حبته قصيره وتخينه بعكس البسمتي المزه او العنبر او اي نوع حبته رفيعه وطويله
المره دي غسلت الرز ونقعته فقط تلت ساعه وضيفتله ملح خشن في النقع
صفيته وحطيت لكل كوبايه رز كوبايتن ميه وقطعه زبده ومعلقه خل الخل علشان الحبايه تتمدد
ولما ابتدي يغلي خليت الحراره منخفضه بس مش اوي لغايه ما اتشرب اول ما يتشرب اطفي بقا ومتفتحيش غير بعد عشر دقايق
وكنت مقطعه كرنب ومشوحاه بره وضيفه ع الرز بعد ما استوي وممكن تضيفي خضار براحتك
الخضار فلفل الوان كوسا جزر وممكن اي خضار تاني بس انا بشتريه كده
وصدور دجاج مقطعه برده طوليا ومتبله بكاتشاب وزيت زيتون وتوم وطماطم مبشوره بصل صغيره مبشوره جوزه الطيب
هتاخدي الفراخ الاول تسويها لوحدها لغايه ما تنشف تماما وياريت حاجه تقدري تقلبي فيها الخضار علي بعضه
بعد ما تستوي تشوحي الفلفل لحاله وتضيفيه عليها لو شوحتي الفلفل مع باقي الخضار هايجيب ميهى
وبعد الفلفل تشوحي الخضار وتنزلي برده ع الفراخ كل ده وانتي قافله النار
قلبي مع بعضه
لعمل الصوص سويت اند ساور صوص تدوبيه في كوبايه ميه
لو مفيش
هاتي كاتشب ممكن ربع كوبايه ومعلقه نشا وكملي الكوبايه ميه وتضيفي السائل علي جمب الخضار مش فوقه وتحركي بالراحه تاخد بس غلوه واطفي
الرز كمان بيقلو فيه بيض بس انا مبحبوش كده وانتي واختيارك
الوصفه التالته باستا بكرات لحم او دجاج
دجاج مفروم معاه بصل وتوابل وبيضه وشويه بقسماط لغايه ما تلم في ايدك
كوريها كور صغيره وحطي زبده مع زيت ودخليها الفرن او علي البوتجاز من فوق تحمريها شويه
لعمل الصلصه بصله زبده وزيت وننزل بعصير الطماطم ولما تتسبك نضيفلها كور الفراخ واهم شئ الزعتر وجوزه الطيب اساسي في الصلصه
المكرونه بعد السلق ناخدها مع زبده وفص توم ونشوحها انا استعملت شرايط وممكن اسباجتي
ونضيفلها جبنه ىبرميزان علي الوش او اي نوع تفضليه
اخر وصفه باستا الدجاج والخضار واي نوع لحوم تحبيه بس احنا بنشتريها كده
المكونات صدور متبله بصوص بستو وتوم وزعتر وصوص البستو اساسي لو مفيش هاتي ريحان او حبق وافرميه مع توم وزيت زيتون لغايه ما ينعم وتتبلي بيه
بعد ما تتبليها شوحيها بزبده ولما تبرد قطعيها بالطول
كوسا وجزر زيتون تركي مدخن حسب الرغبه مشروم فلفل الوان
كل ده يتقطع رفيع جدا
الصوص الاحمر اعملي صلصه طماطم عاديه مع اضافه الزعتر
الصوص الابيض 4 معالق دقيق وزيهم زبده لما الدقيق يصفر انزلي باللبن وكوبايه كريمه
ولو تقلت منك زوديها من ميه سلق المكرونه
المكرونه استعملت فراشات وشرايط وساعات بحط مكرونه قلم معاهم
مينفعش نقلب كل حاجه مع بعضها ههههههههه
في طاسه هاتجيب توم مع صوص البستو وتشوحي في الخضار والفراخ وتنزلي معاهم بالمكرونه وبعد كده كبشه من الصوص الابيض وكيشه من الاحمر وتلف بس وقدميها
انا بقا عندي حد بيحب خضار وحد لاء علشان كده بعمل لكل مواطن طاسه هههههههههه
بجد بجد جربوها هاتعجبكم ان شاء الله
طيب ينفع كده انا جوعت هههههههههه
ارجو تكون الوصفات عجبتكم وبجد انا بنزل الموضوع من بدري تقييمي بصوباعك الصغنون وكومنت بنفس الصوباع احفظو بقا
وصفات سهله وسريعه وتحل ازمات
،، رب اني لما انزلت الي من خير فقير ،،
في امان الله مواضيع هذا القسم برعاية
haneen_75 haneen_75 90893_1.gif فتكات ست الكل Fatakat 90893 جده – المملكه العربيه السعوديه