اهلا بيكم يا بنااات
امبارح طبخت وصفة شفتها على فتافيت
وطبقتها فى مطبخى بطريقتى
ومأخدتش معايا اكتر من ساعتين
بس مبدئيا اللى يعجبها الموضوع تقيم ومتبخلش عليا بدعوة حلوة
نبدأ
باسم الله
أول حاجة مقادير الرز بلسان عصفور
1 – رز متنقى الكمية اللى انتى عايزاها
2 – لسان عصفور بس يكون كميته كبيرة يعنى اد الرز مرة ونص كده
3 – حتتين زبدة صغيرين
4 – شوية زيت نباتى بس مش كتير
تانى حاجة مقادير اللحمة بالخضار والبقول
1 – نص كيلو لحمة اى نوع انتى عايزاه ضانى موزة
اى حاجة
انا عن نفسى عملتها ببتلو رقبة
2 – شوية زنجبيل
3 – شوية كركم " لو معندكيش مش لازم "
4 – شوية فلفل اسود
5 – بصلة متوسطة مقطعة مش مبشورة
6 – معلقتين معجون طماطم او صلصة طماطم
ولو عايزة تكترى براحتك
7 – ربع كيلو كوسة " ممكن اكتر"
8 – ربع كيلو جزر " ممكن اكتر "
9 – ربع كيلو بطاطس " ممكن اكتر "
10 – شوية لوبيا على اد مانتى عايزة
11- ممكن تضيفى اى نوع بقول انتى تحبيه زى الفاصوليا البيضة هتبقى تحححفة
12 – ورقتين تلاتة لورى
13- شوية مستكة " لو مفيش مش مشكلة "
14 – رشتين تلاتة اربعة ملح
الطريييييييييييييقة::
اول حاجة هتقطعى اللحمة مكعبات كبيرة مش صغيرة
بس متقطعيهاش من بدرى يعنى يدوب قبل ماتحطيها عالنار بخمس دقايق
بعدين تجيبى حلة كبيرة وتحطى فيها نقطتين زيت نباتى
وتحطى اللحمة على الزيت قبل ما يحمى
وتقلبيها لغايت لما يتغير لونها شوية
بعدين تجيبى البصلة اللى قطعتيها
وتحطيها على اللحمة
وتقلبى
اول ما البصلة تدبل هاتحطى الفلفل الأسود والكركم واللورى والزنجبيل
واياكى ثم اياكى تحطى الملح دلوقتى
الا هل بلغت اللهم فاشهد
دلوقتى نحط صلصة الطماطم على النار
ونقلب دقيقتين تلاتة
لغايت لما يتجانسوا تماما
دلوقتى هاتى شفشق مليان ماية حنفية عادية يعنى مش سخنة
وحطيها على اللحمة اللى على النار
ولازم الماية تغمر اللحمة تماما
وتقلبى المكونات
وتغطى الحلة
وبصى فى الساعة
واحسبى ساعة من بعد ماغطيتى الحلة
طب الساعة دى هاتفضى قاعدة فاضية كده؟؟
لأ
هانعمل الرز
دلوقتى الرز متنقى ومغسول خلاص
صفيه من ميته او متصفيهوش زى مانتى عايزة
وحطى فى حلة على النار حتتين زبدة وشوية زيت
اكرر حتتين زبدة وشوية زيت
يعنى مينفعش زبدة لوحدها
لكن لو زيت لوحدة ماشى
استنى اما الزبدة تدوب وحطى لسان العصفور على النار
وقلبى لغايت لما يتغير لونها
مش لغايت لما تتحرق ابوس ايديكى
لو اتحرقت الرز كله هيبقى طعمه ميتاكلش
خلاص لسان العصفور اتحمر
نزلى الرز عليه
بميته او من غير ميته انتى وطريقتك
ولو من غير ميته
تضيفيله ماية تغمره ويبقى الماية مغطياه لغايت عقلة الاصبع السبابة
بتهيألى كلنا عارفين الطريقة دى
رشة ملح عليه
وممكن تدوقى ميته علشان تشوفى ملحه مظبوط ولا لأ
وتغطى الحلة وتوطى النار
وتسيبيه تلت ساعة متفتحيش عليه
لو فتحتى عليه مش هيستوى
طيب فى التلت ساعة دى هتقعدى فاضية كده؟؟
لأ برضه
هتجيبى الكوسة تغسليها وتكحتيها
بعد كده تغسليها تانى علشان متقرش وانتى بتاكلى
وتقطعيها مكعبات
نيجى للجزر هانقشره ونقطعة برده مكعبات
ياريت محدش يعلق على الاشكال الهندسية للجزر لأنه كان ناشف جدا فكنت باقطع اى حاجة
لغايت لما ماما لحقتنى بالارمة
المهم
هاتجيبى اللوبيا والفاصوليا البيضة
وهاتكونى نقعاهم من امبارح وسلقاهم ومصفياهم من ميتهم
وتركنيها على جنب
وتقطعى البطاطس
بس انا معملتش ببطاطس فمعلش مفيش صورة
دلوقتى زمان الساعة بتاعت اللحمة اللى على النار عدت
هاتفتحى الغطا وترشى الملح دلوقتى
وتحطى الجزر والبطاطس على النار لأن هما ناشفين
وتقلبى وتغطى الحلة
وتسيبيهم عشر دقايق
نروح للرز زمان التلت ساعة خلصت
هاتفتحى الغطا وتقلبى كويس ولو كان نشف تزودى نص كوباية ماية مش اكتر
وتحطى الصاجة تحت الحلة
وتغطى الحلة
النار لسه واطية متعليش النار
اه بالمناسبة
اللحمة الاول بتبقى النار متوسطة لغايت اما الماية تغلى
واول ما تغلى نوطى النار خالص
وبعد مانحط الجزر هنخلى النار متوسطة
زمان العشر دقايق خلصوا دلوقتى
روحى للحمة ضيفى الكوسة والبقول
وغطى النار وسيبيهم عشر دقايق برضه
بعد العشر دقايق طلعى حتة من كل نوع ودوقى ودوقى حدق الصلصة
لو اى محتاجة شوية سيبيها عالنار
بعد كده طفى
وكده خلصنا اللحمة
نشوف الرز
طلعى حبة رز ودوقيهم
لقيتيهم استووا كان بها
ماستووش سيبيهم شوية بس ماتفتحيش عليهم غير كمان عشر دقايق
وطفى النار
واغرفى
أمانة يا بنااات لو عجبتك قيمى
ومتنسينيش من دعوة حلوة
فى امان الله مواضيع هذا القسم برعاية
القطرات الندية القطرات الندية 974782_7.gif سوبر فتكات Fatakat 974782 القاهرة – مصر