السلام عليكم ورحمة الله وبركاته
كل سنة وانتو طيبين وربنا يعود علينا الايام المفترجة دى بالخير دايما يارب
اولاً قبل اما اقول اى حاجة
ربنا اللى عالم ان نيتى افيد كل البنات بتجربتى وكفاية عليا دعوة حلوة من واحدة قدرت اساعدها او احللها مشكلتها
ثانيــاً انا هحكى تحربتى مع النحافة
بس زى ماقولت فى العنوان ان الموضوع مش للنحيفات فقط
وعلشان كده ياريت تقروا الموضوع للاخر وهتعرفوا انا قولت كده ليه
بصو بقى صلو بينا على النبى
( عليه الصلاة وافضل السلام)
كان يا ماكان فى قديم الزمان كان فى بنت رفيعة وطويييييييييلة وحالتها حالة اسمها اسراء
فعلا يا بنات انا كنت رفيعة اوى بالنسبة لطولى
لانى طويلة اوى 176 سم
ياريت القصيرين يقروا عليا علشان اقصر شوية
ووزنى فى احسن حالة وصلت ليها كان 65
هقولكم بقى حياتى مع النحافة من الاول خالص علشان تعرفوا الانجاز اللى حصلى
بدايتى من وانا فى الثانوى وزنى كان فى الخمسينات حوالى 58 وطبعا مع الطول اللى معدى ال170 مقولكوش بقى
عود قصب ماشى
عصاية ومعكوكة لحم ماشى
وكل الكلام اللى كنت بسمعه ده
عملت تحاليل وكان عندى انيميا
حاولت اهتم بالاكل شوية اللى فيه حديد
وجربت بقى كل انواع فواتح الشهية
لدرجة ان جسمى اخد عليها ومابقاش يأثر فيا
يعنى لو شربت ازازة بحالها بقى ولا كأنى خدت حاجة
وجربت الادوية اللى تساعد على زيادة الوزن لدرجة انى مرة اخدت دوا فيه كورتيزون وماكنتش اعرف انه فيه المادة دى
وكنت زدت شوية عليه
وفى مرة وانا رايحة الصيدلية اشتريه تانى علشان كان خلص الصيدلى بيقولى عايزة ليه
فقولتله علشان زيادة الوزن
وقالى مين اللى وصفهولك حرام عليه ده دوا للحساسية وفيه نسبة كورتيزون وشرحلى اضراراها وكده
وبطلته طبعا من ساعتها
المهم دخلت الكلية وبقيت باكل فى المطاعم وساندوتشات بقى ووجبات سريعة
وكل ده طبعا بيبقى فيه دهون عالية
وفى مرة اتوزنت وانا فى سنة اولى كلية لقيتنى 60 كيلو
مش هقولكم على الفرحة اللى كنت فيها
قولت البحر يحب الزيادة واتشجعت على الاكل شوية
واى اكل او اى حاجة اسمع انه بيتخن اجرى واجربه
ولقيت ايامها بنت هنا على فتكات بتحكى على تجربتها وبتقول انها جربت مشروب كده من الاعشاب من دكتورة
وزادت عليه كتير ماكدبتش خبر
وبعتلها انى عايزة رقم الدكتورة دى وقابلتها واخدت منها بحوالى 280ج تقريبا او اكتر
الحق يقال انه كان بيخلينى مفجوعة وكنت باكل كتير
والحق يقال بردو ان بنات جربوه وجسمهم زاد كتير عليه
بس للأسف انا زدت حوالى 3 كيلو بس
وطبعا مايعملوش معايا حاجة ال 3 كيلو دوا مع طولى ولا يبان عليا
ويقت بخس ال 3 كيلو دول بالتدريج تانى
قولت الحق نفسى واعمل اي حاجة
لقيت اللى بينصحونى اروح جيم والعب رياضة وان الاكل بعد الرياضة بيتخن
ماكدبتش خبر بردو وروحت اشتركت شهر فى جيم
وزدت بتاع كيلو كده او كيلو ونص
يادى النيلة بقى التعب ده كله وفى الاخر كيلو ونص
قولت مابدهاش بقى انا همشى مع نفسى كده واهتم بالاكل
ولقيت بنات هنا عاملين جروب مشيت معاهم على النظام اللى عاملينه
وبقت باكل مفتقة وعسل اسود على حلبة
ومغات وكل الاكل اللى ماتقدروش تسمعوا مجرد اسمه بس مش تاكلوه حتى
وزدت حوالى 2 كيلو بعد عذاب شهر
وكنت بغصب على نفسى فى الاكل واقول يلا يابت استحملى بكرة تزيدى وتربربى وتبقى مزة
لكن ولا حياة لمن تنادى
زى مانتو شايفين كده يطلع عينى وفى الاخر ازيد حاجة بسيطة
وارجع اخس تانى وازيد حاجة بسيطة وهكذا
يعنى على مدار ال 6 سنين اللى فاتو دول بعد مصاريف ومشاوير وخلافه
وصلت من 58 ل64 تقريبا
يعنى حوالى 6 كيلو
6 كيلو فى 6 سنين ههههههههههه
يعنى كل سنة كيلو
طب ايه رأيكم انى من شهرين كده
زدت 8 كيلو فى اسبوعين؟
اه والله زى مابقولكم كده
وزيادة طبيعية وبصحة ومافيهاش اى اضرار
ربنا هدانى لدكتورة عرفتها بالصدفة
ومع انى كنت يأست خلاص انى اتخن اكتر من كده
بس قولت يعنى انا جربت كل حاجة اما اجرب دى لعل وعسى يكون فى ايدها البركة
وروحتلها قعدت تتكلم معايا كتير فى الاول وحكيتلها رحتلى مع النحافة
وهيا بقى بمجرد ماشافت ضوافرى عرفت ان عندى انيميا عرفت ان عندى قشر فى شعرى
وعرفت كام حاجة كده بشتكى منهم فعلا من غير ماقول عليهم
وقاست طولى ووزنى
دوا للانيميا لانها عامل كبير فى النحافة
مكمل غذائى
فاتح شهية
دوا للهضم
فيتامين ب12
وندخل على المفيد بقى
خلطة اعشاب
انا مش عارفة هيا مكونة من ايه
بس بعد مادوقتها من خلال التذوق كده فيها فول سودانى وسمسم
ومش عارفة فيها ايه تانى بس هما حاجات مطحونين مع بعض
وكنت باخد منها معلقتين على نص كباية مية 3 مرات فى اليوم
وقالتلى ان الهدف ان معدتك توسع علشان تتعود بعد كده على كمية كبيرة من الاكل
وعملتلى شكل توضيحى كده للمعدة
المهم انا ارتحت للدكتورة دى جدا كلامها مطمئن بالاضافة للشهادات بتاعتها اللى ورتهالى
معاها دبلومة فى العلاج بالنباتات الطبية والطب البديل
واستشارى فى التغذية العلاجية
وهيا اصلا خريجة صيدلة
المهم اول ماقالتلى انك لو مشيتى على الدوا والكلام اللى قوتهولك مظبوط
هتزيدى فى اول اسبوع من 5 لـ7 كيلو
وبعد كده كل اسبوع من 2 لـ 3 كيلو
ياما الدوا بتاعها فيه حاجة غلط
بس قولت يلا انا وحظى بقى
ومشيت على التعليمات بتاعتها مظبوط
و الدوا لما روحت البيت قريت النشرة بتاعت كل واحد فيهم مالقيتش فيهم حاجة مضرة ولا حاجة
زى ماقولتلكم كده فاتح شهية ومهضم ومكمل غذائى وفيتامين
طيب الاعشاب
دوقتها لقيت فيها سمسم وسودانى وعلى ما اظن خميرة يعنى حاجات طبيعية كلها اهيه
ودى صورتها
استعنت بالله ومشيت على كلامها بالحرف
ولقيتنى بعد يومين بقيت باكل كتير وفى فرق كبير بين اكلتى الاول ودلوقتى
هوباااا بعد اول اسبوع لقيت وشى ملى كده واتدور
وبدأت ماما تلاحظ زيادة ف جسمى
واللى كان مطمنى انى باكل كتير
يعنى لو بتخن من غير ماكل يبقى حاجة غلط
روحتلها بقى بعد اسبوعين بالظبط زى قالتلى وكانت المفجأة
ان ان
ااااااااه
تشششششش
بقيت 73 كيلو
من 65 لـ 73
صوعقت بصراحة وماكنتش مصدقة لدرجة انى بعد ما مشيت من عندها روحت اتوزنت على ميزان تانى
انا كان باين عليا انى زدت
بس ماتوقعتش انى فى اسبوعين ازيد 8 كيلو
بعد مازدت فى ال6 سنين 6 كيلو هههههههههههه
المهم كان لسه باقى على وزنى المثالى كمان كام كيلو كده
اخدت من الاعشاب تانى والدكتورة كررتلى كل الدوا ماعدا المكمل الغذائى ادتنى واحد تانى
ومشيت على نفس النظام
على فكرة يابنات
ماكنش فيه نظام غذائى معين امشى عليه ولا حاجة
الاكل عادى اى اكل فى البيت واى كمية براحتى عادى زى ماحب
بس التركيز على النشويات والدهون والسكريات والحاجات اللى بتخن دى
النظام بس انى كان لازم اصحى الساعة 6 الصبح افطر والاكل كل 3 ساعات
وفعلا كنت قبل ما انام بجهز كام ساندوتش جمبى واظبط الموبايل على الساعة 6 واقوم اكل
المهم بعد الاسبوعين التانين روحتلها تانى
بس فى الاسبوعين دول كان عندى امتحانات وماكنتش باكل كويس
لان بردو النفسية بتأثر ومهما عملتى ونفسيتك مش متظبطة مش هتاكلى كويس
(مع انى بسمع ان فى بنات بتاكل كتير جدا لما بتكون زعلانة وبتطلع اللى فيها فى الاكل)
بس انا مش كده
وزدت بقى فى الاسبوعين دول 3 كيلو
بقى وزنى 76 كيلو
( قولو ماشاء الله)
يعنى وزنى مع طولى كده تمام التمام
كنت عايزة اكملهم 80 كيلو
معلش كان عندى نقص بقى ههههههههه
بس كل اللى يشوفنى يقولى انتى كده جسمك جميل
وماتتخنيش اكتر من كده علشان لما تتجوزى هتزيدى بقى والكلام ده
والحمدلله بقيت واثقة فى نفسى اخيرا
واللبس بقى جميل عليا وكل اللى كانو بيتريقوا على رفعى
بقو يحسدونى دلوقتى على جسمى
واللى ماكانوش شافونى من فترة كبيرة مابقوش يعرفونى دلوقتى وبيقعدوا يقولو مين دى
دى مش اسراء
اه نسيت اقولكم على حاجة بعد ماقولت للدكتورة انى عايزة اثبت على كده بقى
بدأت تخففلى جرعة فاتح الشهية بالتدريج علشان معدتى ماتقفلش تانى من الاكل
يعنى الاول كنت باخد 3 اقراص فى اليوم
قالتلى خدى علبة قرصين فى اليوم
والعلبة التانية قرص واحد
ولما بطلت الدوا خالص
بقيت اكلتى معقولة
يعنى مش مفجوعة اوى زى ماكنت باخد الدوا ولا قليلة اوى زى الاول
معلش رغيت كتير
بس انا رغيت كل الرغى ده ليه
علشان تعرفوا ان اللى يجيب معاكم من الاخر هو دكتور تغذية شاطر
بحيث انك تتخنى وبصحة كمان
مش تزيدى وتبقى منفوخة على الفاضى
او تزيدى وترجعى تخسى تانى كل اللى زدتيه
انا دلوقتى مخلصة الدوا وكل حاجة بقالى شهر وشوية ووزنى ثابت الحمدلله
وكمان زيادة بصحة بقى
يعنى الاول كان ضغطى دايما واطى وبهبط من اى حاجة
وكسلانة على طول
دلوقتى بقيت نشيطة وصحتى اتحسنت كتير
بالنسبة بقى لبنات التختوخات
معلش طولت عليكم
بس اللى حابة اقولهولكم
انك لما تكونى عايزة تخسى اسهل من انك تتخنى
لان لما تكونى هتخسى اكنك بتهدمى حاجة اما لما تكونى عايزة تتخنى يبقى اكنك بتبنى حاجة
والهدم اسهل من البناء
يبقى الخسسان اسهل من التخن
تابعى بردو مع دكتور تغذية شاطر
وعموما الدكتورة اللى روحتلها بتعالج السمنة كمان
وبحاجات طبيعية جدا
كريم تدهنى منه المناطق اللى تحبى انها تخس
واعشاب بتتشرب
وهيا اللى عملالهم تركبية خاصة بيها يعنى
ونظام غذائى بتمشى عليه
(لو حبيتوا تقولولى على حاجة اسأل الدكتورة عليها
انا بكلم الدكتورة دايما وبروحلها لما بودى حد من صحباتى ليها
وهقولها على اسئلتكم وهرد عليكم ان شاء الله)
والكريم ده انا خدت منه لان بقى ليا بطن صغنونة كده ومضايقانى شوية فى اللبس
وخدته دهنت منه
بس انا لسه بادئة فيه بقالى 3 ايام فمفيش نتيجة ظهرت لسه
ودى صورته
وانا كنت هأجل كتابة الموضوع ده لحد اما اشوف نتيجة الكريم
بس قولت اكتبه دلوقتى افضل علشان لو فى بنات هيتجوزوا فى العيد
يلحقوا يعملو حاجة دلوقتى
وكمان كنت رديت فى كام موضوع كده لبنات عايزين يتخنوا
وبلاقى رسايل بتتبعتلى من بنات بيسالونى عملتى ايه او عايزين يروحوا للدكتورة وكده
فقولت اقول تجربتى فى موضوع افضل علشان الكل يشوفها
انا فى واحدة صاحبتى راحتلها وقالتلى انها فعلا بدأت تحس ان وزنها بينزل وهيا لسه فى اول اسبوع
انا قولت لكل اصحابى عليها ومحدش راحلها الا اما شكر فيها
سواء اللى علشان يتخنوا او يخسوا
بجد الدكتورة دى ماشاء الله عليها يا بنات
بتعالج حاجات كتير بالاعشاب الطبيعية ومشاكل الشعر والبشرة وكمان فيرس سى
فى واحدة من اصحابى اللى راحولها علشان يتخنوا
هيا فرحها فى العيد
ووشها فيه حبوب واثار حبوب ومبتهدل على الاخر
ادتلها ماسك الدكتورة اللى عاملاه
وبتقولى ان من اول مرة والله وحست بالفرق فى وشها
وبقت مش محتاجة تحط مكياج ولا اى حاجة
انا حبيت افيدكم بتجربتى واللى تحب تسألنى عن اى حاجة مش هبخل عليها والله بأى معلومة اعرفها
وزى ماقولتلكم ان نيتى خالصة لوجه الله انى اقدر افيدكم بمساعدة او معلومة او احل مشكلة
ويكفينى دعوة حلوة منكم
وماتنسوش التقييم بقى علشان انا تعبت فى الموضوع بجد
ومن بعد صلاة التراويح وانا بكتب فيه
وكل شوية النت يفصل لما جابلى شلل خماسى هههههههه
ويارب اللى عايزة تتخن او تخس ربنا يحققلها امنيتها وتوصل للوزن اللى نفسها فيه
بنوتة حكاية بنوتة حكاية 199092_2.gif فتكات غالية قوي Fatakat 199092 المنصــــورة – مصر