ازيوك يا فتوكات عاملاكم انهارده كام وصفه سهله جدا لحاجات مانقدرش نستغني عنها خصوصا في رمضان
اكيد كلكم عارفين ان اليومين الجايين دول هما موسم المشمش وبيبقي رخيص جدا ومتوفر في كل حته وبيعملوا منه المشمشية والقمر الدين بس طبعا الاسعار بتبقي غاليه جدا واكيد انتو عارفين
هاقولكم بقي علي سر من اسراري لطريقة عمل الحاجات دي في البيت وباقل من نص التمن
وممكن كمان تشتروا الفواكه دي من وكالة الجمله بالقفص وبكده توفري اكتر
ويلا علي الطريقه :
قمر الدين
شوفي يا ستي :
تجيبي المشمش وتراعي انه يكون سليم ومظهره كويس ومستوي (لامهري ولا اخضر )
اغسليه كويس اوي وبعدين ابدأي في شيل النواة
في حله صاج حطي طبقات مشمش وطبقات سكر لكل خمسة كيلو مشمش كيلو سكر
غطيه وسيبيه لتاني يوم او من الصبح لبليل هاتلاقيه نزل ميه كتير جدا
بعد كده ارفعيه علي النار في الاول عاليه لحد ما يغلي وبعدين خففي النار جدا وابداي تقلبه كل ربع ساعه لحد ماتلاقيه استوي وبدأ يتهري تقريبا
هنا بقي :
لو عاوزاه يبقي لفات زي الجاهز بتسبيه ينهري جدا وتديله ضربه في الخلاط وبعدين تجيبي ورق زبده تفرديه في صواني حافيتها مش عاليه( بتاع البيتزا ) وممكن صينية الفرن وتدهنيه زيت زيتون بكر وتفردي عليه الخليط بسمك نص سم ( الخليط بيبقي غليظ جدا ) وتسيبيه في مكان متجدد الهوا يوم او اتنين لحد ما يجف تماما وبعد كده تدهني الوش بزيت زيتون وتلفيه وتشليه
بس انا مش باعمل الخطوه دي انا باعمل الآتي :
بعد ما بيستوي علي النار باسيبه يبرد واعبيه في اكياس وعلي الديب فريزر علي طول بيبقي مش متجمد بيبقي عامل زي الجيلاتي كده عند الاستخدام باكسر منه حته علي اد ما انا عاوزه وازود ميه وسكر واضربهم في الخلاط واشربي احلي قمر الدين واعملي مهلبيه براحته ياستي
عمل المشمشية
تجيبي حبات المشمش المستويه السليمه اللي مافيهاش اي عيوب
تغسليها بمية جاريه كويس اوي
تغلي كميه من الميه علي النار وتحطي فيها بنزوات الصوديوم ودي بتيجي من عند العطار ( اجم بنزوات لكل كيلو من المشمش )
تحطي المشمش في الميه اللي بتغلي وتسبيه كده حوالي خمس دقايق
بعد الخمس دقايق تصفيه من الميه كويس اوي وتفرديه علي صينيه وتغطيه بشاشه نضيفه
تحطيه في حته فيها هواء متجدد وشمس ( مثلا البلكونه ) لمدة يوم واحد
تاني يوم تبدأي تشيلي النوايه بحرص من غير ماتبوظي شكل المشمشايه
وتحاولي انك تضغطي النصين كويس عشان يلزقوا ببعض
ترجعي تفرديهم تاني علي الصينيه وتغطيهم بالشاشه وتسبيهم في الشمس والهوا حوالي 4 ايام او لحد ما ينشفوا وطبعا ماتنسيش تقلبيهم كل يوم
بعد كده يتحفظوا في اكياس او برطمانات معقمه وعلي التلاجه
وبما انه اذا ذكرت المشمشية وقمر الدين لازم يذكر التين والزبيب فانقول طريقتهم بالمره ان شالله ماحد حوش هههههههههههههه
طريقة عمل التين المجفف
هي شبه المشمشية بالظبط
تختاري التين المستوي اللي مش طري اوي ولا اخضر اوي
تغلي الميه ومعاها البنزوات ( واحد جرام لكل كيلو تين )
تحطي التين في الميه لمدة خمس دقايق
بعد كده تصفيه وتفرديه علي صينيه وتغطيه بشاشه عشان الحشرات والتراب
تسيبيه في البلكونه عشان الهوا والشمس
يتقلب يوميا لحد ما ينشف ،تقريبا اسبوع
تحضري خلطه من نصف كوب من النشا ونصف كوب من الدقيق ونصف كوب من السكر البودرة
تنزلي التين فيهم لحد مايتغطي كويس اوي
وبعد كده يترص في طبقات بينهم رشه من الخليط السابق مع الضغط عليه باليد عشان يتلصق فبعضه
طريقة عمل الزبيب
تغسلي العنب كويس وتفرطيه حبايه حبايه وطبعا تستبعدي اي حبايه مش سليمه
تغلي مية وعليها بنزوات الصوديم جرام لكل كيلو عنب ومعاهم شوية زيت صغيرين عشان تدي لمعه للحبات
تنزلي العنب في الميه المغليه وتسبيه حوالي 3 دقايق وبعد كده تصفيه وتسيبيه لحد ما يبرد
يتفرد علي صينيه ويتغطي بشاشه عشان الحشرات والتراب
يتحط في الشمس والهوا اللي هي البلكونه يعني لحد ما ينشف بياخد حوالي 3 او 4 ايام
بس كده بعدها عبيه في برطمان او كيس وشيليه في التلاجه
اه خدوا بالكم العنب يكون البناتي الاخضر المصفر ده مش اللي ببذره هههههههههههههه
ماتنسوش في المشمشيه والتين والزبيب تبقوا تدخلوه بليل من البلكونه عشان الندي
مواضيع هذا القسم برعاية
فضفضة فضفضة images/avatars/peppers.jpg فتكات متميزة Fatakat 20992 محافظة الغربية – مصر