بسم الله الرحمن الرحيم
زي كتير من البنات اليومين دول انا كنت مليانه اوي بعد الثانوية العامة كنت حوالي 90 كيلو
وطبعا بسبب وزني ده ماما كانت عماله تزن عليا وتقولي لازم تخسي وده طبعا لانها خايفه عليا وعاوزاني ابقي كيوت
بس الحقيقة ان الموضوع دة كان بيجيبلي اكتئاب اكتر وطبعا اكل اكتر
لحد ما في شهر من الشهور البريود مجتش الشهر ده خالص رغم انها كانت بتجيلي كل شهر بانتظام
الموضوع ده بصراحة خضيني جامد اوي ومرضيتش اقول لماما ساعتها علشان انا عارفه انها بتتخض وهاتقولي يلا نروح للدكتورة . بس طبعا قولتلها بعد كدة
المهم قررت اني لازم اخد موقف وقرار واخس
كنت بكلم واحدة صحبتي وقالتلي بالصدفه انها بتروح لدكتور دايت كويس ( سبحان الله ) وان مامتها خست معاه كتير
المهم قولتيلها خديني معاكي , وفعلا روحت للدكتور وزي ما كتير منكم عارف في اول مرة سألني الدكتور اذا كانت البريود منتظمه ولا لا فانا جاوبته بصراحه وقولتله انها كانت منتظمه علي طول بس في الفترة اللي فاتت لخبطت وده اللي خلاني اجي لحضرتك وكان جوابه مهم جدا بصراحه وانا شايفه ان لازم كل البنات تعرفه قالي : (بصي احنا هنبتدب نعمل دايت لو لقينا انك بتخسي والبريود انتظمت يبقي مفيش مشكلة , ولو لقينا انك بتخسي والبريود مانتظمتش يبقي ممكن تروحي لدكتورة نسا , ولو لقينا انك ولا بتخسي ولا البريود بتنتظم يبقي لازم تروحي لدكتورة نسا )
و توكلت علي ربنا وبدأت الدايت وكان عندي عزيمه جامده جدا نابعه من خوفي علي نفسي طبعا
والحمد لله وزني كان بينزل والبريود انتظمت تاني
بس كان عندي اصرار اني اخس ويبقي جسمي كويس زي باقي البنات وخصوصا اني صغيره في السن وعاوزه لما اروح اشتري لبس ماقعدش ادور علي مقاسي
وقعدت اعمل دايت لمدة 8 شهور
خلال ال 8 شهور دول كان في رمضان و العيدين وكنت عملت حادثة ومع ذلك موقفتش لاني كان عندي هدف وبصراحه الدكتور كان كويس
المهم بعد 7 شهور الدكتور قالي احنا هنوقف خلاص كان وزني بالظبط 67 يعني نزلت تقريبا 21.5 كيلو وبدأت نظام التثبيت لمدة شهر
الكلام ده كان من سنتين ومن ساعتها وانا بحاول احافظ علي وزني علي اد ما اقدر انا دلوقتي وزني بين 65 و 61 كيلو
والحمد لله نفسيتي بقت احسن واتخطبت بفضل الله وباكل كل اللي نفسي فيه
وكنت مثال لناس كتير بعدي عملو دايت منهم ابن عمتي اللي خس 26 كيلو
بجد التخن ده حاجه وحشه اوي ربنا ما يعودها
بس اهم حاجه يكون عندنا عزيمه واصرار ومالكيش دعوه بالناس اللي حواليكي اللي هيعدو يدوكي في طاقه سلبيه لان ناس بعدي وديتهم لنفس الدكتور بس لانهم مكنش عندهم دافع قوي مكملوش , انا كان الدافع صحتي وجمالي انتي كمان دوري علي دافع قوي يحمسك
وبجد انا بعتبر ده اكبر انجاز عملتو في حياتي وفخورة بكدة جدا الحمد لله
بتمني منكم بقي انكم تدعولي ان ربنا يصلحلي حالي ويبعد عني اي حاجه وحشه ويقدملي اللي فيه الخير
وفي النهايه احب اقولكم ان انا فتوكه جديده بقالي يومين بس علشان كده اتمني انكم تقيموا الموضوع
A.A.S A.A.S فتكات جديدة Fatakat 1230602 الجيزة – مصر