ارحمى شبابك بقى وجوزك وعيالك وفوقى شوية لنفسك
انت مدمنة ولازم تتعالجى بقى من الإدمان دة كفاية كدة اوى
ايوة انت مدمنة اكل
بتاكلى وانت مش جعانة ممكن تآكلى وانت فرحانة زعلانة طهقانة
بتكافأى نفسك بالأكل بتسلى نفسك بالأكل بتواسى نفسك بالأكل
خلى جوزك يحس بقى أنة متجوز واحدة مايتكسفش يخرج معاها
ممكن يكون عمرة مافكر يجرحك بالكلام دة لكن تكون دى مشاعرة
وبردو ولادك ممكن يكونوا عايزين يقولولك كدة ومش عارفين
ولا عارفين بس فاقدين الأمل منك
اتحكمى فى نفسك شوية
اية مش عارفة ؟ ولا مش عايزة
مش عايزة تعيشى حياتك زى كل اللى بتخرجى معاهم وتتحسرى على نفسك
طب ما انت اللى بتعملى كدة فى نفسك
مش عايزة تخرجى وتتحركى من غير ماتتعبى وتنهجى من اول خطوة
مش عايزة تحافظى على صحتك من أمراض القلب والسكر والضغط والأمراض المترتبة عليهم
كفاية بقى كدة حسرة عالهدوم المتلتلة اللى مالية الدولاب اللى بتشتريها كل عيد وماتلبسيهاش العيد اللى بعدة
بقالك عشر سنين بتقولى بكرة أخس وارجع البسهم
بقالك عشر سنين بتقولى بكرة هابدأ دايت وبكرة عمرة ما جة
انا عايزة ازعق فيكى وأمسكك من دراعاتك كدة وأهزك
أهزك اوى عشان تفوقى
تفوقى لحسن شكلك فى غيبوبة
انت مش دريانة بشكلك !
مش دريانة جوزك وولادك شايفينك ازاى
ولا حماتك واهل جوزك بيقولوا عليكى اية
مفيش ولا مرة حد من قاريبك شافك بعد غيبة طويلة وماعرفكيش من تخنك
مفيش حد منهم قالك اية دة انت نخنتى كدة لية لازم تخسى شوية عشان صحتك حتى وعشان جوزك يعرف كدة يجيب لك أحلى لبس ولا حتى عشان تعرفى تلاعبى عيالك وتشوفى شغل البيت عدل تلاقيكى مش قادرة علية يا حرام
كام مرة خرجتى مع أصحابك أو قرايبك واتكسفتى تآكلى قدامهم لحسن يقولوا عليكى مفجوعة
وعملت نفسك شبعتى بعد نص الطبق وانت هاتموتى من الجوع طبعا ما انت متعودة تآكلى 3 وجبات كومبو بدل واحدة
كام مرة جيتى خارجة مع جوزك وقالك هو انت مانعدكيش غير الطقم دة !
طبعا بقى هو طقم واحد اللى على مقاسك واللى جبتية قبلها بشهر بقى ضيق عليكى ومايتلبسش
انت … انت … انت اية
وحتى لو كنت ابتديتى دايت
تيجى للعشا وييجى الجنان وتلاقى نفسك بتقضى عالاخضر واليابس وتقولى معلش ابدأ من بكرة
وبكرة تلاقى نفسك فى أكلة دسمة تقولى خلاص آكلها النهاردة وأودع بيها العك وابدأ من بكرة
وبعدين يا امى
لغاية امتى الكلام دة
لازم وقفة مع نفسك قبل ما الزمن يوقفك غصب عنك بمشكلة بعد الشر تضطرى بيها تقفى الوقفة دى
اعذروني كل الكلام اللى فات دة كنت باقولة لنفسى
وبعدين لاقيت قدامى كتاب المفاتيح العشر للنجاح للدكتور إبراهيم الفقى
وفتحتة على باب الالتزام وعرفت أن
الالتزام هو الحل
الالتزام هو القوة التى تدفعنا لنستمر حتى بالرغم من الظروف الصعبة
وهو القوة الدافعة التى تقودنا لإنجاز أعمال عظيمة
الالتزام هو الدافع الذى يجعل كل الأمهات يصررن على تعليم أطفالهن المشى
وهو تعهد قوى لتغيير الأشياء العادية لتصبح أشياء ممتازة
وهو الشئ الذى يجعلك تسير مسافات طويلة تحت الأمطار
وهو الذى يخرج من داخلك جميع الطاقات الكامنة ويجعلها تحت تصرفك
وبقوة الالتزام فإنك لن تتراجع
وكلما خضت تجربة ستفتح أمامك الفرص الأكثر والأكبر للنجاح
بنات ماتزعلوش من كلامى انا كنت باقولة لنفسى وعارفة أنة بيوجع بس كان لابد منة
اللى فاقت فيكو تنادى عليا
مرمورة حرة مرمورة حرة 190048_2.gif فتكات هايلة Fatakat 190048 اهلى وحبايبى – مصر ام الدنيا