السلام عليكم ورحمه الله وبركاته
بقالى كتير عامله الاكله ومش عارفه انزلها خالص
النت مش مساعدنى
بس يارب تعجبكم
ندخل فى الموضوع على طول مطولش عليكم
اولا الصوص هو موجود بالتفصيل فى الموضوع ده
موضوع دسم وخطير وافكار من العيار التقيل ادخلى يالله من غير اى تفكير
بس باختصار هو نص برطمان صلصله عليه ربع كوبايه خل وربع كوبايه سكر ومعلقتين هريسه ومعلقه كبيره توم بودر
ورشه ملح ورشه فلفل
وده لوحده صوص حار ممكن تستعمليه مع اى ساندوتشات او جمب الاكل
هناخد كميه من الصوص ده حسب حجم الفراخ الى هتعمليها
ونزود عليهم زيت وزعتر وروز ميرى وفلفل اسود وبهارات فراخ وبودره بصل وملح
وبعد كده ندهن بيهم الفرخه كويس جدا ومن تحت الجلد كمان
ونحضر بقى الحشو بتاع الفرخه
انا حشتها بالفريك والكبد والقوانص بتاعت تلات فراخ
الاول بنحط البصل المبشور يتشوح وبعد كده بنضيف الكبد والقوانص مقطعه صغير
وبعد كده نحط الفريك ونقلب وملح وفلفل اسود
ونضيف شويه مايه ونغطى لحد مايستوى نص سواء
ملحوظه
لو الفريك منقوع زياده مش بيحتاج مايه بيستوى على طول لوحده
بس بلاش يتنقع كتير عشان مش بيبقى حلو
وهنا اخد جزء من الفريك وحشيت بيه الفرخه
وبعد كده قطعت بصل وبطاطس وجزر وطماطم وضفت عليهم باقى الصوص
الى اتبقى من الفراخ وقلبتهم كويس وضفت بعد كده الفرخه وقفلت الكيس
واوعى تنسى بدبوس تعملى كام شاكه كده فى الكيس
وهى بالظبط خدت ساعه فى الفرن على نار عاليه على الشبكه
والفرخه دى بلدى كيلو واحد بس
طبعا لو الفرخه اكبر بتاخد وقت اكبر
وده الشكل النهائى ليه
ومش هقولكم حلوه اد ايه
وعلى فكره عملت نفس الفكره مع بطه
وطلعت رووووووعه برضه
بس خدت ساعتين فى الفرن
وده بقى طاجن الفريك بجد روووووووعه
واكله فى حد ذاته
بس انا اتفضل عندى فريك بالكبد والقوانص
ضفت عليه بقى فلفل الوان ومعلقه من الصوص الحار الى عملته فى الاول
وغطيت لحد مااستوى الفريك خالص
وتحطيه فى صنيه او طاجن
وعليه البشامل
وللاسف مش عرفت اصور طريقه البشمل
بس انا بعمله بطريقه حلوه وسهله جدا
يعنى كل كوبايه لبن عليها معلقه دقيق ومرقه دجاج وواحده جبنه نستون وكله فى الخلاط
وعلى النار زبده ونضيف عليها كل الى فى الخلاط
ونقلب لحد ما يتقل وخلاص كده
بجد طعمه حلو قووى وسهل ومش بنحط سمنه كتير ودى احسن حاجه بيطلع خفيف
وفى الاكله دى الصنيه اصلا صغيره قووووووى فهى خدت معلقه دقيق واحده وكوبايه لبن ونص مكعب مرقه دجاج وواحده جبنه نستون ونص مكعب زبده
وعلى وش البشامل ضفت جبنه موتزرلا وجبنه رومى
وبجد الطاجن ده بيبقى حلو قووووووووووى
وممكن يتعمل كمان كاكله لوحده بفليه الفراخ بدل الكبد والقوانص بيبقى حلو قوووووووى
ومش بياخد وقت خالص فى الفرن يادوب 10دقايق لحد بس ما ياخد وش والجبنه تسيح
يارب تجربوا الاكل ويعجبكم
واتمنى لو عجبكم الموضوع تدعولى دعوه حلوه
ومتنسوش التقييييم والرد يابنات لو عجبكم الموضوع
مواضيع هذا القسم برعاية
ام رودى العسل ام رودى العسل 258244_26.gif ملكة فتكات Fatakat 258244 مدينه الحب – مصر ام الدنيا