السلام عليكم
انا كنت قريت موضوع في القسم هنا اسمه " خلى بالكم بناكل حشرات واحنا مش عارفين"
وشدني طبعا خصوصا لما عرفت ان فيه ضرر وللاسف موجود في منتجات تقريبا 99% من السوق المصري
فحبيت اعمل بحث على النت اوصل بيه عن حقيقة المادة دى واعرف ليه الناس بتقول حرام
وتوصلت للنتيجة دى
اولا : لمعرفة اصل المادة E120 هي صبغة حمراء تعرف باسم الكارمينيك اسيد او حمض الكارمينيك ويرمز لها كيميائيا بــ (C22H20O13)
ليه مصدرين :
1-تبين أنه يتم الحصول على الصبغة طبيعيّاً عن طريق استخلاصها بعد عمل معالجة معينة على أنثى حشرة مجففة تسمى (Coccus Cacti L. أو Dactilopius Coccus)
2- يتم الحصول عليها بشكل كيميائي صناعي
طيب بنستخدمها في ايه بقي الماده دى….
طلعت انها بتستخدم في صناعة الملونات الغذائية والأدوية ومستحضرات التجميل. كما يستخدم في صناعة الزهور الصنعية، والطلاء، وأحمر الشفاه، والحبر القرمزي، والمواد الغذائية مثل اللبن وبعض أنواع العصائر وخصوصا تلك التي تتمتع بلون أحمر قرمزي.
من هنا لقينا الكارثة ان مصدرها حشرة ودخلنا في الحرام والحلال .. ومعنى انها بتدخل في ادوية ومستحضرات تجميل وملونات غذائية يعني الموضوع كدا كبيييير مش فكرة لحوم مصنعة ولانشون وسجق وخلاص
عملت بحث برضو علشان اوصل للنقطة دى بالتحديد في الحلال والحرام وتوصلت للفتوى دى من دار الإفتاء ورد الفتوى يجوز وضع الماده ما لم يثبت وجود ضرر على الانسان
https://www.dar-alifta.org/ViewFatwa.aspx?ID=4338
يعني مشكلة المادة مش انها مستخرجة من حشرة يا بنات لان احنا مش بناكل الثعابين لكن بناخد سمها اللي ممكن يموت انسان في صناعة ادوية تعالج امراض خطيرة ومش بتكون حرام
وفي الفتوى مكتوب ان المادة المستخرجة بيتم عليها تفاعلات كيميائية وفيزيائية بتغير من بنيتها الكيميائية تغير كامل
المشكلة في المادة دى هي امكانية حدوث تفاعلات الحساسية نتيجه لتناولها .. وللاسف الموضوع دا موجود في اى ماده بتضيف طعم او ريحه للأكل واللي درسو كيمياء في ثانوى او في الكليات هيفهمو النقطة دى
انا حبيت بس اوضح معلومة لان اللي قريته في ردود الموضوع اللي كتبت اسمه في الاول يوضح ان الناس قرفانه علشان دى حشرة وحرام اكل الحشرات….
والموضوع طلع مش حرمانية اد ما هو ضرر بالانسان ودى موجوده تقريبا في معظم منتجات السوق بس علشان احنا منعرفش عنها فبناكل واحنا مش واخدين بالنا واهو طلع كمان ادوية ومستحضرات تجميل
ان شاء الله تكونوا استفادتوا من الموضوع
So-Lo So-Lo 482117_1.gif سوبر فتكات Fatakat 482117 assuit – Egypt