السلام عليكم
ازيكم يا فتوكات انا الحمد لله بجهز دلوقتي وقلت افيد حبايبي الفتوكات اللي بيجهزوا وهنتكلم عن كل حاجة في الجهاز وعن اماكن الشراء ومتوسط الاسعار
اولا هنبدأ بالمفروشات :1-المفروشات
اولا :حجرة النوم الرئيسية12 طقم ملايات (6 مطرزين و 6 مشجر ومنقوش)
متوسط سعرها بيكون من 80 لحد 160 في انواع كويسة زي القطان وواحة وابو قمر (انا جايبة من الانواع دي)
24 فوطة منهم 2 بشكير عليهم رسومات ميكي وتويتي وكده
بتكون العلبة فيها 3 في خامات طبعا الاهرام حلوة والمحلة
متوسط الاسعار من 70 لحد 150
وطبعا 6 فوط للمطبخ
3 بطانية (ممكن تجيبي واحدة مفرد و2 دابل فيس)
المجد طبعا وسانتا مورا والكوري وفيه ماركات اسباني متوسط الاسعار من 250 لحد 650 انا جايبة في التخفيضات
1 مفرش العروسة بتاع الفرح (واحد كفاية لانه للزينة )
المجد منزل موديلات تركي حلوة اوي وفي انواع تانية واشيك الوان الابيض والبين والدهبي والاوف وايت وفي طبعا السوري المشغول بس ده مينفعش مع المودرن متوسط الاسعار من 250 لحد 1000
https://t3.gstatic.com/images?q=tbn:A…4xvnUWdxKnSqfA
2 لحاف فايبر (التركي طبعا منه رسومات كتير ووممكن سوري )
https://t3.gstatic.com/images?q=tbn:A…9XKdds_cW5Q2dM
المجد برضه منزل الحفة فايبر حلوة والسوري حلو برضه وفي طبعا الصيني متوسط الاسعار من 250 لحد 1000
1 مفرش شتوي (بيتفرش فوق الملاية للتدفئة وبيكون حوالي 6 قطع)
سانتا مورا حلو بتاعة رمسيس عطية في منه رسمة التايجر وفي المخطط وفي اللي زي البطانية العادي متوسط الاسعار من 300 لحد 600
1علبة برنس (فيها واحد حريمي وواحد رجالي ليكي ولجوزك)
https://t2.gstatic.com/images?q=tbn:A…XnbB4m33qa8KjI
في سهر الليالي وفي شيرين وفي مني عيني ومتوسط الاسعار من150 لحد 350 و400
2 كوفرتة (ممكن واحدة سادة وواحدة منقوشة اللي هي الفايبر الخفيف)
https://t1.gstatic.com/images?q=tbn:A…i1f_vgUEh2uEIr
https://t1.gstatic.com/images?q=tbn:A…VHvIggK9pYSVoY
في منها السادة ومنها المنقوش ومنها الفايبر ومتوسط الاسعار من 150 لحد 500
لو افتكرت حاجة تانية هاكتبها
2- حجرة الاطفال6 طقم ملاية (مطرز او عليه رسومات )
وده بيبقي فيه طقمين مع بعض لو سريرين او طقم مفرد وفي هابي هوم نوعه حلو ومتوسط الاسعار من80 لحد150
1 طقم كوفرتة (بيكون فيه 2 كوفرتة )وبرضه هابي هوم حلو ومتوسط الاسعار 200 لحد 300
1طقم بطانية (بيكون فيها 2 بطانية عليها رسومات )
المجد وجلوريا منزين حاجات حلوة وفيه صيني ومتوسط الاسعار 250 لحد 450
1 طقم لحاف فايبر ( بيكون فيه 2 لحاف فايبر اطفالي )
وممكن تجيبي من الحاجات دي مفرد لو سرير واحد وفي ناس بتجيب المفارش السوري للاطفال بس بحسها مش عملية
وفيه طقم مفارش شتوي برضه
كده انا خلصت المفروشات بس فيه بقي شوية ملاحظات
1- احسن اماكن تجيبي منها مفروشات عروسة درب سعادة والغورية وشارع الازهر
2- لاااااااااازم تفاصلي مع البياعين جامد علشان هما بيرفعوا السعر جامد
3- متنزليش لوحدك وخدي حد معاكي بيعرف يفاصل وبيعرف في الخامات
4- حاولي تنزلي بدري علشان تعرفي تلفي براحتك
5- اسألي عن الاسعار الاول وخدي متوسط اسعار وبعدين اشتري
6- لو مش معاكي عربية فاصلي مع السواق اللي هيوصلك الاول واتفقي معاه
7- لازم تفرزي الحاجة اللي هتشتريها الاول عشان ميطلعش فيها قطع او حاجة ومش هتعرفي ترجعيها تاني
8- في الزحمة ايدك علي شنطتك وفلوسك عشان السرقة والمعاكسات
9- لو هتفرشي مودرن هاتي الوان واشكال تليق مع المودرن
10- اختاري الوان محايدة ونسقي بين لون الاثاث ولون المفروشات
عايزة منكم بقي دعوة ان ربنا يجمعني انا وخطيبي علي خير ويتمم جوازنا علي خير
وكمان يا بنوتاتي مش تنسوا التقييم علشان الموضوع يثبت
وتابعوني علشان نكمل باقي الجهاااااااااااااااااااز
رودينا الهواري رودينا الهواري 410656_6.gif سوبر فتكات Fatakat 410656 cairo – في قلب من اختاره ربي لي