السلام عليكم
عايزين ايه ياقمرات؟
اكيد 90 فالمية مننا بتحلم انها تخس وتبقى حلوة وامورة
ومنتعبش لما ننزل نشترى هدوم ونلاقى حاجات عجبانا ازاى بس مش مقاسنا او ضيقة شوية علينا
وكمان خطيبك او جوزك اكيد بيحلم تكونى رشيقة لان كل ماتبقى رشيقة حتبانى اصغر فالسن وكمان اجمل
انا عن نفسى بقالى سنين بعمل دايت خسيت 10 كيلو بس بقالى سنة ثابتة على 79 كيلو مش عارفة اخس
عارفين المشكلة فى ايه؟؟
الارادة والعزيمة انا مشكلتى التلقيط ومش بعرف التزم بالرغم من انى بتابع مع دكتورة وكمان عندى مشاية كهرباء بس من غير ارادة ولا ليهم لزمة
لحد امبارح سمعت من الانسان اللى ربنا يجعله من قسمتى ونصيبى ويرزقه بالحلال كلام عن الدايت خلانى كرهت نفسى
تخيلى كده لما خطيبك يقولك انا من ساعة ماعرفتك وانا بحلم انك تبقى رفيعة بس دلوقتى انا اقسم بحياتى انك عمرك ماحتخسى
تخيلى لما تعرفى ان محدش واثق فيكى انك تقدرى تخسى يعنى انا ارادتى ضعيفة وعمرى ماحعرف اعمل حاجة
طب بامانة كام واحدة منا فى نظر جوزها او خطيبهااو اهلها كده؟
طب معقول احنا ضعاف اوى لدرجة انا نفضل شوية اكل على جمالنا واهدافنا وسعادتنا وصحتنا
ايه احنا عبط اوى كده؟
بس انا من انهاردة وبعد الكلام اللى سمعته امبارح قررت انى حيبقى عندى ارادة بجد
وقلت لنفسى انا كلت كتير فى حياتى ايه يعنى لما نخفف الاكل هو مش حيطير ولا احنا مستفيدين منه بحاجة
ويااما انا يااما السمنة
انا مش عايزة ابقى ضعيفة ولا حابة يتقال عليا كده ابدا وحتى لو كان ده السبب اللى يخلينى التزم مش مهم المهم انى التزم
معلش بقى انا طولت عليكم
بس كان لازم تعرفوا اهدافى من الاول
انا عملت دايت كتير بس المرة دى عايزاه بارادة قوية ومش عايزة اعك ولا مرة
طب نيجى بقى للجروب بتاعنا ان شاء الله
انا عايزة بنات اقوياء ميضعفوش ولا تيجى تقولى كان عندى مناسبة او كان عندى ظرف وعكيت عايزة بنات جدعة عارفة كمان ان فى بنات كتير حتشترك معايا وبعدين مش حشوفها تانى بس ان شاء الله الاقى بنات جدعة وعندها ارادة معانا
ولو عجبكم الجروب متنسوش التقييم
المطلوب منك ايه
1/ بياناتك
الاسم
السن
حالتك الاجتماعية
حامل او بترضعى؟
وزنك
طولك
مقاس بطنك واردافك
وايه اكبر مشكلة فى جسمك
هدفك الاول
معلش بيانات كتيرة بس لازم نبقى عارفينها
2/ التوقيع
اتمنى التوقيع ده يعجبكم وتحطوه فى توقيعكم
وكمان لو تقدرى تكتبى فى توقيعك وزنك وهدفك الاول يكون افضل عشان تتحمسى كل ماتشوفيه
3/ حتجيبى صورة لواحدة تخينة بطريقة تتضايقك اوى وتحطيها خلفية جهازك او خلفية موبايلك الفكرة دى خدتها من بنوتة هنا كانت كتباها امبارح فالمدونة بس مش لقيت التوبيك عشان احط رابطه
بس قررت اعملها صور زى دى او صورة حقيقية بس عشان ممنوع هنا محطتش
4/ يوميا حتكتبى يومياتك كلتى ايه وحتى لو عكيتى اكتبى بس وانتى بتكتبى اختارى العقاب اللى حتعمليه بناءا على عكك
ممكن طبعا ماتقوليش انك عكيتى ولا مش التزمتى انتى حرة بس كله بيبان فالميزان وانتى الخسرانة فى الاخر
5/ انا ححطلكم الانظمة اللى خدتها مع الدكتورة وحمشى معاكم عليها وارجو الالتزام بيها بجدية
مع رياضة لا تقل عن نصف ساعة يوميا وانا ححطلكم تمارين باستمرار
وحيبقى فى مسابقات اسبوعية كمان بس بعد الاستقرار فالفريق
6/ ده نظام الاسبوع الاول باذن الله
الافطار
اليوم الاول
كوب زبادى+ثمرة فاكهة+كوب شاى بلبن او نسكافيه
اليوم التانى
جبن قريش او جبن بيضاء دايت+خيار وطماطم وخس+كوب شاى بلبن او نسكافيه
اليوم التالت
ثمرة فاكهة + كوب شاى بلبن او نسكافيه
اليوم الرابع
بيضة مسلوقة+ثمرة فاكهة+كوب شاى بلبن او نسكافيه
اليوم الخامس
ثمرة فاكهة + كوب شاى بلبن او نسكافيه
اليوم السادس
جبن قريش او جبن بيضاء دايت+خيار وطماطم وخس+كوب شاى بلبن او نسكافيه
اليوم السابع
كوب زبادى+ثمرة فاكهة+كوب شاى بلبن او نسكافيه
بعد 3 ساعات
قهوة او شاى او نسكاافيه او ليمون او كركاديه
الغداء بعد 3 ساعات
ربع فرخة مسلوقة او مشوية او 2 سمكة مشوية او 2 شريحة لحم مشوى او علبة تونة بدون زيت او 4 اصابع كفتة مشوية او طبق فول او طبق عدس + سلطة خضراء او خضار + ربع رغيف بلدى او 4 ملاعق ارز او مكرونة (من اليوم الخامس للسابع بس يعنى اول 4 ايام مفيش)
بعد 3 ساعات
ثمرة فاكهة
العشاء بعد 3 ساعات
كوب زبادى + 2 ثمرة فاكهة
تعليمات مهمة
1/الالتزام بالدايت جديا وننسى حاجة اسمها دايت كيميائى احنا عايزين نخس واحنا محافظين على صحتنا من غير ضعف ده غير انك حترجعى اللى خستيه تانى اول ماتبطليه
2/ رياضة لا تقل عن نصف ساعة وياريت لو اكتر مشى او تمارين بطن وارداف
3/شرب 8 اكواب مية
4/3 اكواب شاى اخضر فاليوم
5/ متزوديش عن 3 معالق سكر يوميا
6/الصحيان بدرى يعنى بالكتير الفطار يبقى من 10 ل 11 مش اكتر من كده ومتناميش بعد الساعة 1 بليل
7/الالتزام بوجبة الافطار ده اهم حاجة
8/الابتعاد عن الطبيخ المسبك واللحوم اللى مليانة دهون وعن الكاتشب والمايونيز والمسطردة والتقليل من الملح
9/الابتعاد عن المخلالات والمسليات زى اللب والسودانى وعدم تنازل الاكل قدام التفلزيون
10/ الثقة فى النفس وانك حتقدرى تحققى حلمك ان شاء الله ومتززعليش من اى نقد
الميزان
بيكون عالريق اول ماتصحى كل يوم تلات ان شاء الله وقدامكم يوم التلات كله تقولوا وزنكم كام
الفرى
مفيش حاجة اسمها فرى طول اليوم ده فعلا اكبر مشكلة انا اكتشفت انى ساعات بخس نص كيلو فى الاسبوع وبيزيد 2 كيلو فالفرى فهو بيكون وجبة واحدة بس اختارى الغدا او العشا او الفطار او تختارى حاجة تجيبيها مفسك فيها بس متكونش حاجة كبيرة يعنى شيكولاتة او باكو شيبسى مش اكتر من كده والله ده كلام الدكتورة وان شاء الله حلتزم بيه
تمارين بسيطة
تمارين سهله للتخلص من الكرش..بالصور المتحركه يارب يتثبت بقي
أفضل تمارين لتنحيف الخصر والأرداف قبل يوم الزفاف!
الرابـــح الاكبـــر – تمارين رياضيه فيديو و متحركة لكل اجزاء الجسم
حاجة اخيرة عايزة اقولها
انا مش عايزة بنت تقولى انا عايزة اخس كام كيلو فى اسبوع ولا شهر اللى مبنتعبش فيه بيروح بسرعة يعنى اول ماتحققى هدفك حتلاقى نفسك ريحتى ورجعتى تانى من الاول فافضل حاجة نمشى براحة وعلى مهلنا عشان نبقى زى نظام تثبيت مع الدايت ومنرهقش جسمنا حتى لو بتخسى نص كيلو احسن من مفيش
انا كده خلصت عارفة طولت عليكم
بس احب اعرفكم على نفسى
انا رودى
21 سنة
خريجة تجارة اسكندرية
زنى 79
وهدفى الاول 75
rody 4 design rody 4 design 193589_79.gif فتكات غالية قوي Fatakat 193589 عالم من تصميمى الخاص – اسكندرية