السلام عليكن
فتوكاتي القمرات وحشتوني الكام يوم دولهمة
ازيكم يا حلوات يا عساسيل
النهاردة زي ما وعدتكم في موضوعي اللي فات تفريز البسلة والجزر
وده اللينك بتاعه يا قمرات
https://fatakat.univanet.com/#5228851
كنت قلت لكم اني هاعمل موضوع عن تفريز الثوم البلدي
وانا وفيت بوعدي ليكم وجبتلكم بالصور طريقتي في تفريز الثوم البلدي
وانا عن نفسي باحتاج الثوم كتيررررر في العدس في الملوخية
في البصارة في المحشي في البامية الويكة في دقة البدنجان
والسمك وكل حاجة مصرية وااااااو
طبعا اليومين دول يومينه " الثوم البلدي" وبيكون سعره بسيط
انا جبته ب4 جنيه الكيلو انا اشتريت 2كيلو ونص ب10 جنيه
وده شكله وهوا لسة ما عملتش فيه ايتها حااااااجة زي ما اشتريته
وبعدين بنقطع عروشه وبنقشره ونفصصه زي اي ثوم عادي
وطبعا لانه جديد لسة فبيكون ب3 قشرات وبيكون طررررري اوووووي
وانا عن نفسي باقشر قشرتين وباسيب القشرة التالتة زي ما هيا
وبعد ما بافصصه بيكون بالشكل ده زي الورد اهو ولا احلى
وبعدين بعد ما خلصت الكمية كلها زي ما انتو شايفيه كدة
بأجيب الكبة اللي هافرمه فيها زي كويكي كدة انا بتاعتي ساشو
ودي صورتها اهيا واللي مش عندها ممكن تفرمها في المفرمة
بتاعة اللحمة والطعمية وكدة او في المطحنة بتاعة الخلاط اللي
هيا المشرشرة عشان مش تنعم اوووووي
وطبعا هاتحطي الثوم في الكبة وتفرميه ومعاه رشة ملح عشان تتفرم
اسهل وهايكون بعد الفرم بالشكل ده
وطبعا هاتحضري البرطمانات اللي هاتحطي فيها الثوم وتكوني محضرة الزيت
اللي هاتلحوسي بيه البرطمان من جوا قبل ما تحطي الثوم عشان تحافظي
عليه وما يبوظش منك ضروري الزيت يا فتوكات سامعين ؟؟؟
وبعدين تحطي الكمية اللي فرمتيها في البرطمنات زي ما قلتلك بنفس الطريقة
وبعد ما تخلصي قبل ما تقفلي البرطمان حطي على الوش شوية زيت
بالشكل ده كدة عشان تحافظي عليه ما يعفنش بين الغطاء والثوم
وبعدين لو اتبقى منك شوية ومش لاقيتي ليهم برطمان على قدهم
حطيهم في اي طبق بلاستيك صغير وغطيهم بالزيت برضه وحطيه في كيس
عشان ما يعملش ريحة في الفريزر
بالشكل ده وانا حطيتهم في قلب بلاستيك بتاع العيال اللي باعملهم فيه الجيلي
وده شكل البرطمنات بعد ما خلصت
وده وهما في الفريزر انا عندي في باب الفريزر مكان برف بأحط فيه بالشكل ده
مهم اووووي يكون في الفريزر مكان تستخدميه بالشكل ده كدة
ودول مع الاتنين القدام اللي كنت مخزيناهم قبل كدة قلت اعمل عليهم
بطرمانين كمان عشان يكفوا باقي السنة ان شاء الله
وادعولي بقى قربت اجيب الديب فريزر عشان الفريزر عندي مش هايكفي
ولما اجيب الديب فريزر هابقى اصوره وافرجكم عليه يا قمرات
وانا التلاجة عندي الفريزر بتاعها عاوزة استغله في تفريز الليمون عشان الصيف
وطريقة تفريز الليمون هأعملكم بيه موضوع وده سر خصوصي يا قمرات
اختراع يا كوتش بس ما يغلاش عليكم
وبكدة انا خلصت يا قمراااات
ما تنسوش التقييم واللي عاوز يسأل عن حاجة يقولي انا خبرة برضه
ومش هأبخل على فتوكاتي حبيباتي
والله تعبت اووووي يا بنات انا نفسي في كوباية شاي
مين بقى هاتعزمني على الشاي؟؟؟؟
مواضيع هذا القسم برعاية
ليلى ام ادم وبلال ليلى ام ادم وبلال 863518_3.gif فتكات رائعة Fatakat 863518 امبابة – مصر