السلام عليكم يا اخواتي في الله
اولا احب اشكر كل اللي دخلوا يدعولي وربنا يكرمكم جميعا ويرزق كل مشتاقه بالذريه الصالحه الخاليه من كل عيب او مرض اللهم آمين
الموضوع الاصلي هنا
https://fatakat.univanet.com/#2617818
اما عن التطورات فهي كالتالي
بعد 3 اسابيع من اكتشاف مرض ابنتي نزلت عليا بقعه دم بسيطه كده فرحت للدكتور وكشف عليا ولقي ان في انفصال جزئي في المشيمه ولكنه اتفاجيء بأن حجم الراس كبر بدرجه كبيره جدا هو مكانش متوقع سرعتها وان حجم الراس فرق عن عمر البنت بحوالي 17 يوم يعني باختصار الاسهل انها تتولد طبيعي دلوقتي لان حجم الراس مناسب وهاتنزل تتحط في حضانه ده لو عندها وظائف تنفس اساسا لان الميه اللي علي المخ دمرته خالص و لو انتظرنا للتاسع مش هاتتولد طبيعي ابدا من كبر حجم راسها ولكن هايعمل قيصريه بفتحه هلاليه كبيره جدا في الرحم هاتخليه ضعيف جدا انه يتحمل بيبي بعد كده لحد الشهر التاسع وهايبقي البيبي يتولد ويوضع في حضانه وهو ونصيبه بأه… او ان الرحم ينفجر لاقدر الله وده من ضعفه وعدم احتماله لحجم البيبي الجديد…ده غير الانتظار بعد القيصريه دي لمده سنه ونص من غير حمل واساسا البيبي هاتموت ومش هاتكمل يعني لا بيبي ولا حمل وانا كمان سني مش صغير وكل سنه بتمر الاحتمالات بتقل وكل شئ بيد الله طبعا بس دي طبيعه الانسان……. بس برضه هو عاوز فتوي شرعيه تقوله ان ده حلال ويريح ضميره وهو نفس كلام جوزي برضه انه مايقدرش يتحمل وزر قتل بنته..
الدكتور كتب تقرير وجوزي راح بيه دار الافتاء وكان التقرير يوضح حاله الجنين وحاجات بسيطه عن حالتي .. كمان جوزي ماشرحش كويس فالشيخ قاله لا يجوز.
ساعتها حسيت ان الدنيا اتهدت علي دماغي وقعدت ادعي يارب افرجها من عندك انت العالم بيا وببنتي يارب يارب ووالدتي جت عندي والدنيا مقلوبه ورحنا تاني يوم انا وهي وحماتي دار الافتاء تاني وشرحنا بصوره اكثر وضوحا فالشيخ قال كده انتوا محتاجين لجنه فتوي وتقرير فيه اجابه لبعض الاسئله اللي كتبهالنا الشيخ والدكتور يجاوب عليها….
رحنا بالليل للدكتور وبرضه هو مصر علي كلامه انه مش هايعمل حاجه وهو مش متأكد انها حلال 100% وانا اقوله يا دكتور يعني انت عارف الحاله والمخاطر اللي انا هاتعرضلها وان البنت كده كده مفيش منها امل وبرضه عاوز فتوي ؟؟ وخلاص انا كنت هاعيط من الحيره
المهم كتب الاجابات عن الاسئله ورحنا بيها تاني يوم وجوزي طلب لجنه الفتوي وحولونا علي نائب الشيخ علي جمعه مفتي الجمهوريه ومعاه شيخ تاني وحكينا القصه من اولها لاخرها
الشيخ قالنا انتطرونا شويه وبعدها بربع ساعه من الانتظار المر دخلونا تاني وقال يجوز في حالتكم دي الولاده المبكره خصوصا اني في اخر السابع
الحمد لله ياما انت كريم يارب
اتصلنا بالدكتور وحكيناله وقال تعالوا بالليل علشان نبدا ناخد ادويه تفتح الرحم واولد ان شاء الله
وهايعمل طلق صناعي
بالله عليكم ادعوا لي اتحمل الام الولاده ويعوضني خيرا عن ابنتي وياريت اللي جربت الولاده بالطلق الصناعي تفيدني لان الدكتور قال ان قدامي 4 او 5 ايام علي ما الرحم يفتح لان انا بكريه ده اولا وثانيا لانه مش معاد ولادتي من اساسه
اللهم ارزق كل مشتاقه اللهم آآآآآمين بذريه سليمه معافاة من كل مرض او زياده او نقص
الحمد لله ولا قوة الا بالله حبيبتنا ولدت والبنت بخير وعايشه
#200 هاااااامة
اخر تطورات بنتا سما
بالله عليكم اوصيكم الدعااااااااء
المشاركة الأصلية كتبت بواسطة المخلصه جدا 
انا والله متشكره اوي علي سؤالكم ودعواتكم والله حسيت بقيمه انه يكون للبني ادم اخوات واصحاب وناس يدعوله من غير مايعرفوه
البنت طلعت من الحضانه 5 ايام وقضتهم معايا في البيت كانوا ايام جميله رغم انها كانت بتبكي باستمرار ومكنتش بنام وكمان هي بترضع بانبوبه من الانف ولكن انا كنت مبسوطه وهي معايا ومكنتش بقوم من جنبها ولما عرضناها علي طبيب المخ والاعصاب وشاف الاشعه المقطعيه بتاعتها قال لازم نعمل العمليه علي طول
العمليه اتعملت من اسبوع والبنت في العنايه المركزه في المستشفي بس من يوم العمليه والبنت بترجع اي حاجه تدخل معدتها ولو حتي بالخرطوم الانفي ومن كتر ما بيدوروا علي اورده في ايديها ورجليها ركبولها كانيولا مركزيه في الرقبه علشان مايغيروهاش كل شويه..
انا قلبي واجعني عليها اوي ولما بشوفها في الحال ده بتعذب وبقول ياتري يابنتي حاسه بايه وانتي مش قادره تتكلمي كده
وبدعي والله اللي فيه الخير ليها ربنا يعمله ويشفيها يارب هي والملايكه اللي زيها آآآآمين يارب
المخلصه جدا المخلصه جدا images/avatars/yellowflower.jpg فتكات متميزة Fatakat 399786 بيتنا – مصر