سلام عليكم يا فتوكات
انا نفسيتى زى الزفت من اللى حصلى النهارده فى دار الطب
كنت بتابع مع دكتور ممتاز اسمه عهدى وهيب وهو حولنى على دار الطب عشان اعمل تلقيح صناعى
لانه هو هيعتزل مهنة الطب اخر الشهر ده
المهم انه قالى اروح لدكتور احمد عوض الله
روحت النهارده الساعه 2 ونص
دفعت كشف 250 جنيه على اساس انى هكشف معاه وقولتلهم انا عايزاه هو
وطلعت فوق عشان ادخل للدكتور لقيتهم بيقولولى لا ادخلى للاستشارى
وكانو مصممين جدا انى لازم ادخل للاستشارى وهو هيبقى يحولنى على احمد عوض الله
المهم انا صممت وقولتلهم لا انا همشى
قامو قالولى الدكتور اصلا مش موجود وخلاص تعالى يوم تانى
بس ادخلى دلوقتى للمساعد ياخد البيانات بتاعتك وكده كده ده لازم تدخليله قبل الدكتور
قولتلهم ماشى وكده ودخلت فعلا
الدكتور المساعد ده صغير جدا فى السن
وكانه بالظبط بيعمل تحقيق معاكى
بيسالك اساله وبتجاوبى باه او لا
مش مدينى فرصه اصلا اتكلم
المهم انه نص حالتى هو معرفهاش اصلا بسبب انه مش بيحاول يفهم
زى انى كانت الانابيب مسدوده عندى وعملت المنظار عشان اسلكها
وزى انى فعلا خدت منشطات كتير بس الانابيب كانت مسدوده فيعتبر انا ماخدتهاش اصلا
وحجات كتير جداا
قلت مش مشكله لما ادخل للدكتور اكيد هيسمع الحاله
المهم خرجت ولقيتهم بيقولولى لو دخلتى للاستشارى النهارده هتدخلى لاحمد عوض المره الجايه
انما لو دخلتى اول مره لاحمد عوض المره اللى بعدها هتدخلى للاستشارى
قلت ادخل وخلاص
دخلت الساعه 6 يعنى بعد 3 ساعات ونص لما استويت
المهم بقى دخلت على الاستشارى بيتكلم بسرعه جداااا
عمرى مشفت دكتور سريع كده
بوريله جواب التحويل بتاعى وان الدكتور بتاعى بيقترح تلقيح صناعى
لقيته بيقولى لالالالا مش انتى خدتى منشطات 6 شهور قبل كده؟
وعملتى اشعة صبغه ومنظار
يبقى خلاص هو حقن مجهرى
( مع انى بعد مسلكت الانابيب انا منشطت 6 شهور لكن هو مدنيش فرصه اقوله كده)
قولتله لا مش مستعده دلوقتى
يقولى لا هو حقن مجرى
(وكمان عندى مناقشه بحث الماجيستير بتاعى الاسبوع او الاسبوعين الجايين ومش هينفع اعمل احقن وبرضو مش مدينى فرضه اتكلم)
اقوله طيب منجرب تلقيح صناعى ولو مره واحده
لا هو حقن مجهرى
ولقيته مره واحده بيقولى انا عارف انتى لا طايقانى ولا عايزه تسمعينى انتى اصلا عايزه تقابلى دكتور احمد وبيقولى مع انى ارتحتلك لله فى الله ( بالذمه فى دكتور يقول كده؟ كنت عايزه اقوله انت هتناسبنى)
ولقيته بيقولى انه هيعمل اللى عليه ويكتبلى الادويه
ولقيته بيكتب الادويه والتحاليل اللى هعملها انا وجوزى عشان الحقن المجهرى
وبعدين خلانى اروح عند الحسابات عشان يقولولى التكاليف
ولقيت الراجل بتاع الحسابات بيقولى انتى ممكن تدفعى ديبوزت وتعملى منظار رحمى دلوقتى
بقوله هو ده مش ببنج؟
بيقولى اه ده 10 دقايق عشان بس نعرف احسن مككان فى الرحم الاجنه تثبت فيه
خلاصه التجربه السيئة دى
ان دار الطب دماغها بس فى حته واحده هى الحقن المجهرى
حالتى هما ميعرفوش عنها حاجه تقريبا ومع كل ده مصممين على الحقن
سمعتها زى الزفت وانا روحت وانا عارفه كده
بس قلت الدكتور بتاعى اكيد مش هيبعتنى مكان وحش
وتغاضيت عن اراء الفتوكات هنا وقلت يمكن حظهم وحش
حاجه تانيه بقى لاحظتها انى لما عملت سيرش على النت على حد عمل تلقيح صناعى هناك ملقتش ولا واحده عملت تلقيح عندهم
فواضح انهم مبيعملوش اصلا
ولاحظت كمان ان كل الناس الكتير اللى كشفت قبلى كانت بعد مبتخلص بيبعتوها على الاوضه بتاعة الحسابات اكيد طبعا عشان تفاصيل الحقن ما عدا حالتين بس مدخلوش
بغض النظر عن كل الكلام ده انا مقابلتش دكتور احمد عوض الله ومقدرش اقول عليه حاجه
لانى مشوفتوش
بس مستحيل بجد احط رجلى فى المكان ده تانى
وادعولى عشان بجد تعبولى نفسيتى النهارده
وحاسه انى غرقانه مش عارفه اعمل تلقيح فين
eng_lolla2016 eng_lolla2016 فتكات رائعة Fatakat 58668 القاهره – ام الدنيا