السلام عليكم يا قمرات
انا عايزه افيدكم بموضوعى لانى محبتش استفاد لوحدى
الموضوع ده عن تجربه
انا خسيت من 138 كيلو ووصلت ل 89 بس لسه بكمل .. قولوا بس ماشاء الله الاول عشان اقدر اكمل
انا هحكيلكو البدايه من الاول
انا كنت رياضيه جدا وانا صغيره وكنت نشيطه جدا واما دخلت اعداديه اهتميت بالمذاكره اكتر وسبت الرياضه
ووزنى باه بيزيد بكميات كبيره جدا كل شهر لانى مكنتش بخرج من البيت زى الاول وبقيت بزيد 10 كيلو ف الشهر لحد ما بقيت اد الفيل ووزنى باه 138 كيلو يعنى فيل صغير
المهم كانت الناس بتهرب منى ومكنتش بتحب تتكلم معايا وكنت فاقده الثقه فى نفسى واصابنى الاحباط
وفجاه قررت انى اغير نفسى وروحت لدكتور عشان يساعدنى لانى مكنتش اقدر امشى لوحدى
وروحت لدكتور الله يكرمه يارب وعملت تحاليل الاول طلعت الحمد لله سليمه بس طبعا الكولستيرول عالى عشان الدهون اللى فى جسمى طبعا كتيراااااااااااااااااا
وكتبلى على تظام اكل ومعاه دوا اوميجا 3 عشان يقلل الكوليستيرول
المهم مشيت على النظام ده واحده واحده وكنت بنزل 2 كيلو كل اسبوع ونزلت 35 كيلو فى اول 4 شهور وطبعا انا الحمد لله ارادتى قويه وصبرى كبير
فصاحبت الرجيم واتعودت عليه لحد دلوقتى بكمل
المهم انا هقولكوا على نظام اكل من انظمه الدكتور يمكن تستفادوا
بس اهم من النظام هى الاراااااااااااااااااااااااااااااااااااااااااااااا اااده .. سامعين الاراااااااااااااده
بصوا باه النظام ده بيعتمد على تقليل الاكل مش الحرماااااااان لانك لو اتبعتى الرجيمات الكيميائى اللى هى تقعدى طول اليوم تاكلى نوع اكل واحد بس هتتخنى اكتر من الاول ده غير العذاب اللى هتحسى بيه فى الرجيم
الرجيم هو اولا..
الافطار .. اختارى حاجه من دول ..
-2 بيضه مسلوقه +2 توست سن او رغيف سن طرى + خيار وخس
-4 ملاعق فول بالليمون +2 توست سن او رغيف سن طرى + خيار وخس
-جبنا فيتا لايت او جبنه قريش قطعه وسط + 2 توست سن او رغيف سن طرى+حيار وخس
-2 ملاعق مربى دايت +2 توست سن او رغيف سن طرى
الغداء باه
طبق سلطه خضرا بالخل ده اساسى مع كل وجبه غدا
واختارى معاها خاجه من دول
– خضار سوتيه + ربع فرخه مشويه او مسلوقه منزوعه الجلد او شريحه لحمه بردو مسلوقه او مشويه او سمكه مشويه +من 4 ل 6 ملاعق ارز مش اكتر
-رعيف سن طرى وسلطه تونه . يعنى تجيبى التونه تصفيها من الزيت وتقطعى عليها بصل وفلفل وشويه حل وزره ملح
-4 ملاعق مسقعه دايت +2 توست سن او رغيف سن طرى
-طبق شوربه عدس صغير +2 توست سن او رغيف سن طرى
العشاء باه
اختارى من دول بردو
-كوب بليله باللبن
-2 زبادى لايت +2 بقسماط سن
-رغيف سن+ ملعقتين جبنه فيتا لايت
وبين كل وجبه والتانيه لو حسيتى بالجوع تاكلى ثمره فاكهه او خضار
شويه ملحوظات كده *
1- اشربى مايه على اد ما تقدرى على الاقل 8 اكواب
2_ممنوع اكل السكريات – المخللات_اللنشون -الحلوي – الشبسى والبيبسى – الدهون و السمنه – المسليات واللب والسودانى
3- الخضار الممنوع ( البطاااااااااااااطس والبطاطا – القلقاس )
4- الفاكهه الممنوعه ( المانجا_ الموز _ البطيخ _ الشمام_ البلح _ التين _ العنب)
5- استخدمى سكر دايت وممكن شرب الشاى او القهوه فى اى وقت بس بلاش الافوره يعنى
6-يمكن شرب كوبايه شاى اخضر قبل كل وجبه بنص ساعه هتعمل معاكى شغل
شوفتوا النظام سهل ازاى ؟؟؟
والله العظيم انا خسيت بيه كل ده
متنسوش التقيم الله يخليكو :*
اه نسيت ابقى اعملى رياضه لو حبيتى او حتى ارقصى لو بتحبى الرقص بتاع ربع ساعه كده او اتمشى لان حركه الجسم هتساعدك جداااااااااااااا
يلا اشوفكم على خير وادعولى اوصل ل70 كيلو
متنسوش تقيمو عشان والله تعبت جامد فى الموضوع ده
يلا سلام عليكم يا قمرات
heba saad mahmoud heba saad mahmoud فتكات جديدة Fatakat 1025561 gizah – egypt