النهاردة حاعمل السبانخ بطريقة سهلة وبسيطة للمبتدئات
وطبعا احنا فى موسم السبانخ الخضرا وكلنا عارفين فايدتها علشان كده حاولى تعمليها لولادك ديما
كتير منا بيفتكروا ان السبانخ شغلانة لكن مع ترتيب الشغل فى المطبخ حتلاقيها سهلة جدا
اولا حتغسلى كل الخضرة السبانخ كو يس جدا وتغسلى الكسبرة والشبت وتسيبهم يصفوا الميه بتاعتهم
حتقطعي الخضرة (حزمة كسبرة وشبت )
والسبانخ ممكن تقطعيها كبير مفيش مشكلة
تبشرى البصلة وتجهزى عصير الطماطم وتدقى التوم وكده تجهيزاتك تمام
لو حتعمليها بلحمة اسلقى اللحمة من قبل لانها حنحطها مسلوقة مع السبانخ متنفعش طبعا نية لان السبانخ بتستوى بسرعة
لو من غير لحمة عادى جدا كملى الخطوات بدون اللحمة
تدخلى على الطبخ علطول
دى السبانخ وهى مغسولة وشوفوا انا غسلاها وعيدانها مترتبة علشان تبقى سهلة فى التقطيع
دى الكسبرة والشبت متقطعة
نشوح البصلة مع قرن فلفل بيدى طعم وريحة حلوة للاكل
نحط اللحمة المستوية نشوحها مع البصل وننزل بعصير الطماطم ومعلقتين الصلصة لزوم اللون
ندق فصين التوم ونحطهم ونحط الملح والفلفل الاسود ونسيبها تتسبك
بعد ما اتسبكت حطيت الكسبرة والشبت
انا حطتهم دلوقتى مش من الاول علشان الخضرة ما تفقدش قيمتها الغذائية وهى بتغلى مع الطماطم
باضيف شوية شوربة صغيرين علشان السبانخ متتلسعش منك
لان السبانخ حتنزل مية كمان
هنا ضيفت السبانخ واعملى حسابك الحلة تبقى كبيرة لان السبانخ بتاخد مكان
بس بعد شوية حتلاقيها قلت خالص
شوفوا قلت خالص
اسيبها على نار هادية 10 دقايق وبتكون استوت وطبعا اللحمة مستوية من قبل كده وده شكلها
قدمتها مع رز بالشعرية وسلطة خضراء
نصيحة منى انا جربت السبانخ المجمدة بجميع انواعها معجبتنيش وحشة ومش نظيفة خالص
فاستغلى موسم السبانخ واعمليها وهى طازة
يارب يكون الموضوع مفيد وعجبكم
مواضيع هذا القسم برعاية
فتاة المهمات الصعبة فتاة المهمات الصعبة 190913_15.gif Fatakat 190913 الرياض – السعودية